Jesu o galalediwa mo thabeng
1E rile malatsi a le marataro a sena go feta, Jesu a tseela Petere, Jakobe le Johane monnawe, kwa thoko, a ba tlhatlosetsa mo thabeng e e godileng. 2Mme a ya a fetoga ponalo fa pele ga bone; sefatlhogo sa gagwe sa phatsima jaaka letsatsi, le diaparo tsa gagwe tsa nna ditshweu jaaka lesedi. 3Mme ga bonala kwa go bone Moše le Elija, ba bua mmogo nae. 4Mme Petere a raya Jesu a re: “Morena, go molemo go rona go nna fa; fa o rata, ke tlaa dira metlaagana e le meraro fano; mongwe e nne wa gago, o mongwe e nne wa ga Moše, o mongwe e nne wa ga Elija.”
5Ya re a sa ntse a bua, leru le le sedifetseng la ba tshutifalela; mme bonang, lentswe la tswa mo lerung la re: “Yo ke morwaake yo rategang, yo ke kgatlhegang thata mo go ene; lo utlweng ene.”
6E rile barutwa ba le utlwa, ba wela fa fatshe ka difatlhogo, ba boifa segolo. 7Mme Jesu a tla a ba ama a re: “Tsogang lo eme, se boifeng.” 8Ya re ba tsholetsa matlho, ba se ka ba bona ope fa e se Jesu a le esi fela.
9Ya re ba fologa mo thabeng, Jesu a ba laola a re: “Lo se ka lwa bolelela ope ponalo e lo e bonyeng, Morwa Motho a ba a tle a tsoge mo losong pele.”
10Mme barutwa ba gagwe ba mmotsa, ba re: “Ke go reng fa bakwadi ba re Elija o na le go tla pele?”
11A ba fetola a re: “Ruri Elija o etla, mme o tlaa tsosolosa dilo tsotlhe. 12Ke lo raya ke re: Le jaana Elija o setse a tsile, mme ga ba a ka ba mo itse, ba ne ba mo direla ka fa ba ratang ka teng. Morwa Motho le ene o tlaa bogisiwa ke bone fela jalo.”
13Ke gone barutwa ba tlhaloganya fa a bua nabo ka ga Johane Mokolobetsi.
Jesu o fodisa mosimane yo o karalalang
14E rile ba sena go fitlha kwa bontsing jwa batho, ga tla monna mongwe kwa go ene, a mo khubamela a re: 15“Morena, utlwela morwaake botlhoko; gonne o tle a nne a karalale, mme o utlwa botlhoko thata; gonne o tle a wele mo molelong le mo metsing gantsi. 16Ke ne ka mo lere mo barutweng ba gago, mme ba retelelwa ke go mo fodisa.”
17Jesu a ba fetola a re: “Losika lo lo sa dumeleng, lo lo kgopo ke lona, ke tlaa nna le lona goleele go le kae? Ke tlaa lo itshokela goleele go le kae? Mo lereng kwano go nna.” 18Mme Jesu a kgalemela mowa o o maswe, mme wa tswa mo go ene; mosimane o sa le a fodisiwa fela ka lobaka loo.
19Foo barutwa ba tla mo go Jesu kwa thoko ba re: “E ne e le ka go reng fa rona re sa nonofa go o kgoromeletsa ntle?”
20Mme a ba raya a re: “E ne e le ka ntlha ya bobotlana jwa tumelo ya lona; gonne ammaaruri ke a lo raya: Fa lo na le tumelo e e kanang ka tlhaka ya peo ya mosetara, lo ka raya thaba e lwa re: ‘Tloga fa, o hudugele fale;’ mme e tlaa huduga; mme ga go ketla go nna le sepe se se tlaa lo retelelang.( 21Mme losika lo, ga lo tswe gope fa e se ka thapelo, le ka go ikitsa go ja.)”
Jesu o bolelelapele loso lwa gagwe gape
22Ya re ba sa ntse ba tlhotse kwa Galilea, Jesu a ba raya a re: “Morwa Motho o tloga a neelwa mo diatleng tsa batho; 23mme ba tlaa mmolaya, mme e tlaa re ka letsatsi la boraro o tlaa tsosiwa.” Mme ba hutsafala segolo thata.
Tuelo ya lekgetho la tempele
24E rile ba sena go fitlha mo Kaperenaume, ba ba amogelang lekgetho la tempele ba tla mo go Petere ba re: “A moruti wa lona ga a ntshe lekgetho la tempele?”
25A re: “Ee, o a le ntsha.” Ya re a tsena mo ntlong, Jesu a mo raka ka go bua, a re: “Simone o gopola jang? Ana dikgosi tsa lefatshe di amogela sehuba, kgotsa lekgetho mo go bomang? A ke mo go bomorwaa tsone, kgotsa mo baennyeng?”
26Mme ya re a re: “Mo baennyeng,” Jesu a re: “Fa e le jalo bomorwaa tsone ba gololosegile. 27Le fa go ntse jalo, a re se ba kgopise; ya lewatleng, o konopele kobe, o tseye tlhapi e e tlhatlogang pele; mme o tlaa re o sena go e atlhamolosa molomo, o tlaa fitlhela ledi la bošeleng ba ba bošeleng ba ba 8; tsaya lone leo, o le ba neye, e le la me nao.”
