MATHAIO 22

₁Jesu a ba fetola, a fela a bua nabo gape ka ditshwantsho, a re: ₂“Bogosi jwa legodimo bo tshwantshiwa le kgosi nngwe e e kileng ya direla morwa yone modiro wa nyalo. ₃Ya roma batlhanka ba yone go bitsa ba ba kileng ba lalelediwa modiro wa nyalo, mme ba nna ba gana go ya. ₄Gape a roma batlhanka ba bangwe a re: ‘Rayang ba ba laleditsweng lo re: Bonang, ke baakantse modiro wa me; dipholo tsa me le tse di nonneng di tlhabilwe, dilo tsotlhe di baakantswe; tlang modirong wa nyalo.’ ₅Ba tlhokomologa, ba itsamaela fela, mongwe a ya morakeng wa gagwe, yo mongwe papading ya gagwe. ₆Ba ba setseng ba tshwara batlhanka ba yone, ba ba diraka mo go tlhabisang ditlhong, ba ba bolaya. ₇Mme kgosi ya nna bogale; ya tloga ya bolotsa dintwa tsa yone, ya senya babolai, ya fisa motse wa bone. ₈Foo ya raya batlhanka ba yone ya re: ‘Nyalo yone e baakantswe, mme ba ba neng ba e laleleditswe ba ne ba sa tshwanela. ₉Ke gone yang kwa marakanelong a ditsela, mme botlhe ba lo tlaa ba fitlhelang, lo ba reye lo re ba tle modirong wa nyalo.’ ₁₀Batlhanka bao ba tswela kwa ditseleng, ba phutha botlhe ba ba ba fitlhelang, ba ba bosula le ba ba molemo; mme ba ba laleditsweng ba tlala ka ntlo ya modiro.

₁₁“E rile kgosi e tsena e tla go bona balalediwa, ya bona motho teng yo o sa aparang seaparo sa nyalo. ₁₂Mme ya mo raya ya re: ‘Tsala, o tsenye jang fano o se na seaparo sa nyalo?’ Mme a tlhoka se o se buang. ₁₃Foo kgosi ya raya batlhanka ya re: ‘Mmofeng mabogo le maoto lo mo latlhele kwa ntle, kwa lefifing le le kwa ntlentle; go tlaa nna selelo le phuranyo ya meno gone.’

₁₄“Gonne ba ba biditsweng ba bantsi, mme ba ba itshenketweng ba babotlana.”

₁₅Foo ga tla Bafarisai, ba gakololana ka fa ba ka mo tshwarang mo puong ya gagwe ka teng. ₁₆Ba roma kwa go ene barutwa ba bone ba na le Baherote ba re: “Moruti, re a itse fa o le boammaaruri, o ruta batho tsela ya Modimo ka boammaaruri, o sa tlhokomele ope; gonne ga o re bomangmang jwa ga ope sepe. ₁₇Ke gone re bolelele gore o gopola eng? A go siame go kgethela Kaesare, kgotsa nnyaa?”

₁₈Jesu a lemoga bolotsana jwa bone a re: “Lo ntalelelang, baitimokanyi ke lona? ₁₉Ntshupetsang ledi la lekgetho.” Ba lere thušeleng kwa go ene. ₂₀Mme a ba raya a re: “Setshwantsho se, le sekwalo se, ke tsa ga mang?”

₂₁Ba mo raya ba re: “Tsa ga Kaesare.” Foo a ba raya a re: “Ke gone ntshetsang Kaesare dilo tse e leng tsa ga Kaesare; lo bo lo ntshetse Modimo tse e leng tsa Modimo.”

₂₂Ya re ba utlwa jalo ba gakgamala, ba mo tlogela, ba tsamaya.

₂₃Ya re ka tsatsi leo fela ga tla kwa go ene Basadukai, ba ba reng ga go na tsogo ya baswi. Ba mmotsa, ₂₄ba re: “Moruti, Moše o rile, fa motho a swa, a se na bana, a morwa rraagwe a nyale mosadi wa gagwe, a tsosetse morwa rraagwe losika. ₂₅Jaana go kile ga ne go le banna basupa mo go rona, e le bana ba monna, mme wa ntlha a nyala, a ba a swa; ka a se na ngwana a tlogelela monnawe mosadi wa gagwe. ₂₆Ga nna fela jalo le wa bobedi, le wa boraro, go ya kwa go wa bosupa. ₂₇Morago ga bone botlhe mosadi le ene a swa. ₂₈Mme e tlaa re mo go tsogeng ga baswi, o tlaa nna mosadi wa ga mang mo go bone boo basupa, gonne ba ne ba nna nae botlhe fela?”

₂₉Mme Jesu a ba fetola a re: “Lo a timela ka lo sa itse dikwalo, le fa e le nonofo ya Modimo, ₃₀gonne e tlaa re mo go tsogeng ga baswi ba bo ba sa nyale, le fa e le go neelwa nyalo, mme ba bo ba ntse jaaka baengele kwa legodimong. ₃₁Ka ga go tsoga ga baswi, a ga lo ise lo bale se se kileng sa buiwa le lona ke Modimo, wa re: ₃₂‘Ke nna Modimo wa ga Aberahame, Modimo wa ga Isake, Modimo wa ga Jakobe?’ Modimo ga se Modimo wa baswi, fa e se wa batshedi fela.”

₃₃Mme ya re matshutitshuti a batho a utlwa, a gakgamadiwa ke thuto ya gagwe.

₃₄Bafarisai ba re ba utlwa fa a tlhokisitse Basadukai puo, ba phuthega mmogo. ₃₅Mongwe wa bone, e le mophutholodi wa molao, a mmotsa ka go mo lalela, ₃₆a re: “Moruti, taolo e kgolo mo molaong ke efe?”

₃₇Mme a mo raya a re: “ ‘O rate Morena Modimo wa gago ka pelo yotlhe ya gago, le ka mowa otlhe wa gago, le ka tlhaloganyo yotlhe ya gago.’ ₃₈E ke yone taolo e kgolo le ya ntlha. ₃₉E nngwe ya bobedi e e tshwanang nayo ke e: ‘O rate wa gaeno jaaka o ithata.’ ₄₀Mo ditaolong tse pedi tse, go tshegeletswe molao otlhe le baperofeti mo go tsone.”

₄₁Jaana e rile Bafarisai ba sa ntse ba phuthegile, Jesu a ba botsa, ₄₂a re: “Lo gopola eng ka ga Keresete! Ke morwa mang?” Ba mo raya ba re: “Ke morwa Dafite.”

₄₃A ba raya a re: “Fa e le jalo, Dafite o bua ka Mowa a mmitsa Morena jang? A re:

₄₅“Fa e bo ne ne Dafite a mmitsa Morena, o ntse morwawe jang?”

₄₆Mme ga bo go se ope yo o nonofileng go mo fetola ka lefoko lepe; le gone e sa le ka letsatsi leo ba tshaba go tlhola ba mmotsa dipotso dipe.