MATHAIO 27

₁Jaana e rile bosa bo sele, ditlhogo tsotlhe tsa baperesiti le bagolwane ba batho, ba gakololana ka ga Jesu, go mmolaya. ₂Mme ba mo golega, ba mo tsaya, ba ya go mo neela Pilato molaodi.

₃Foo Jutase yo o mo okileng, o rile a bona fa Jesu a sekisitswe, a ikwatlhaya, a busetsa dipapetlana tsa selefera tse di 30 kwa ditlhogong tsa baperesiti le bagolwane. ₄A re: “Ke leofile, ka ke okile motho yo o se nang molato.” Mme bone ba re: “Ana moo re go dirang? Moo ke dibonwa ke wena.”

₅Mme a piriganyetsa dipapetlana tsa selefera fa fatshe mo felong ga boitshepo, a tsamaya; a ya a ipeta.

₆Ditlhogo tsa baperesiti tsa tsaya dipapetlana tsa selefera, ba re: “Ga go a siama go di tsenya mo letloleng la dikhumo la tempele, ka e le tlhwatlhwa ya madi a motho.” ₇Ba gakololana, ba reka ka tsone sebata sa lefatshe sa mmopi wa dipitsa, go fitlha baeng mo go lone. ₈Ke gone sebata sa lefatshe seo sa bidiwa ga twe: “Lefatshe la madi a motho”, nako e sa le eno.

₉Foo ga dirala se se kileng sa buiwa ke moperofeti Jeremia, fa a re: “Ba tsaya dipapetlana tsa selefera tse di 30, e le tlhwatlhwa ya yo o sekasekilweng; yo bangwe ba bana ba Iseraele ba mo sekaseketseng tlhwatlhwa. ₁₀Ba di ntshetsa sebata sa lefatshe sa mmopi wa dipitsa, jaaka Morena a nketetse.”

₁₁Jaana Jesu a ema fa pele ga molaodi; mme molaodi a mmotsa a re: “A o Kgosi ya Bajuta?” Mme a re: “Ke nna yone.” ₁₂Ya re a newa molato ke ditlhogo tsa baperesiti le bagolwane, a se ka a fetola ka lepe.

₁₃Foo Pilato a mo raya a re: “A ga o utlwe dilo tse dintsi tse ba di supang ka ga gago?”

₁₄A se ka a mo fetola ka lepe, le fa e le ka lefoko le le lengwe fela; molaodi a ba a tla a gakgamala thata.

₁₅Jaana e ne e tle e re ka lobaka lwa modiro, molaodi a tle a gololele batho mogolegwi mongwe yo ba mo ratang. ₁₆Ya re lobaka loo ba bo ba na le mogolegwi yo o tumileng, go twe, Barabase. ₁₇Ke gone e rileng ba phuthegile, Pilato a ba raya a re: “Lo rata ka lo gololela mang? Barabase kgotsa Jesu yo go tweng Keresete?” ₁₈Gonne o ne a itse fa ba mo neetse tshekong ka kilo.

₁₉Ya re Pilato a sa ntse a le mo sennong sa tshekelo, mosadi wa gagwe a roma kwa go ene a re: “O se ka wa dira sepe ka monna yo o siameng yoo, gonne ke bogile dilo di le dintsi gompieno mo torong ka ntlha ya gagwe.”

₂₀Jaana ditlhogo tsa baperesiti le bagolwane ba bo ba tlhotlheletsa matshutitshuti a batho gore ba lope Barabase, mme ba bolaye Jesu. ₂₁Molaodi a ba fetola a re: “Lo rata ka lo gololela ofe mo bobeding jo?” Ba re: “Barabase.”

₂₂Pilato a ba raya a re: “Mme foo, Jesu yo o bidiwang Keresete ke tlaa mo reng?” Botlhe fela ba re: “A a bapolwe.”

₂₃A re: “Ka ntlha yang? O dirile bosula bofe?” Ba tshelela lošalaba godimo thata ba re: “A a bapolwe.”

₂₄Jalo e rile Pilato a bona fa a sa fenye sepe, mme bogolo go bile go tsoga pheretlhego, a tsaya metsi, a tlhapa diatla fa pele ga batho ba bantsi, a re: “Ga ke na molato mo mading a monna yo o siameng yo; a go bone lona koo.”

₂₅Batho botlhe ba fetola ba re: “Madi a gagwe a a nne mo go rona, le mo baneng ba rona.”

₂₆Foo a ba gololela Barabase; mme Jesu ene a mo seola, a ba a mo neela go bapolwa.

₂₇Foo batlhabani ba molaodi ba isa Jesu kwa kgotleng ya molaodi, ba phuthela mophato otlhe kwa go ene. ₂₈Ba mo swatola diaparo, ba mo apesa kobo e khibidu. ₂₉Ba loga serwalo sa mitlwa, ba se mo rwesa mo tlhogong, ba tsenya lotlhaka mo seatleng sa gagwe se se siameng; ba khubama fa pele ga gagwe, ba mo sotla ba re: “Dumela Kgosi ya Bajuta!” ₃₀Ba mo kgwela mathe, ba tsaya lotlhaka, ba mo gatla mo tlhogong. ₃₁Ya re ba sena go mo sotla, ba mo apola kobo, ba mo apesa diaparo tsa gagwe, ba mo gogela koo, ba ya go mmapola.

₃₂Ya re ba tswela kwa ntle, ba fitlhela monna mongwe wa Kurene, go twe Simone; mme ene ba mo patikela go tsamaya nabo, gore a sikare mokgoro wa gagwe. ₃₃E rile ba sena go fitlha felong fa go tweng Golegotha, ke go re, “Felo ga logata”, ₃₄ba re ba mo nosa bojalwa jwa mofine jo bo tlhakantsweng le santlhokwe; ya re a sena go bo leka ka legano a gana go bo nwa.

₃₅E rile ba sena go mmapola, ba kgaogana diaparo tsa gagwe ba di laola ka bola. ₃₆Ba dula, ba mo lebelela teng. ₃₇Fa godimo ga tlhogo ya gagwe ba pega lokwalo lo lo supang molato wa gagwe, lwa re: “YO, KE KGOSI YA BAJUTA”. ₃₈Foo ga bapolwa nae dinokwane di le pedi, sengwe ka fa letsogong la gagwe le legolo, se sengwe ka fa go la molema.

₃₉Mme ba ba fetang ba mo kgala, ba tshikinya ditlhogo tsa bone, ₄₀ba re: “Wena yo o senyang tempele, o ba o e aga ka malatsi a le mararo, ipoloke; fa o le Morwa Modimo, fologa mo mokgorong.”

₄₁Ditlhogo tsa baperesiti le bone, ba na le bakwadi le bagolwane, ba mo sotla fela jalo, ba re: ₄₂“O ntse a nna a boloka ba bangwe; o retelelwa ke go ipoloka ka esi. Ke ene Kgosi ya Iseraele; a a ke a fologe jaana mo mokgorong, mme re tlaa mo dumela. ₄₃O ikantse Modimo; a o ko o mo golole jaanong, fa o mo eletsa, ka a rile: ‘Ke Morwa Modimo.’ ”

₄₄Dinokwane le tsone tse di bapotsweng nae, tsa latlhela dikgobo tse di ntseng jalo mo go ene.

₄₅Jaana go tswa nakong ya motshegare o mogolo go ya nakong ya boraro maitseboa, lefifi la khurumetsa lefatshe lotlhe. ₄₆Ya re e ka ne e le ka nako ya boraro maitseboa, Jesu a goa ka lentswe le legolo a re: “Eli, Eli, lama sabakathani?” Ke go re: “Modimo wa me, Modimo wa me, o ntatlhetseng?”

₄₇Bangwe ba ba emeng teng ya re ba utlwa, ba re: “Monna yo, o bitsa Elija.” ₄₈Mongwe wa bone a akofa a siana a tsaya ngami, a e ina mo bojalweng jo bo botšarara, a e tlhomela ka lotlhaka, a re o a mo nosa.

₄₉Ba bangwe ba re: “Lesa; re bone gore a Elija o tlaa tla go mo golola.”

₅₀Mme Jesu a ba a goa gape ka lentswe le legolo, mme a neela mowa.

₅₁Mme bonang, sesiro sa tempele sa gagoga ka bogare, go simolola kwa godimo go ya kwa tlase; le lefatshe la roroma; le mafika a phatloga; ₅₂le diphupu tsa atlhamologa; le mebele e le mentsi ya baitshepi ba ba neng ba robetse ya tsosiwa. ₅₃Ba tswa mo diphupung morago ga go tsoga ga gagwe, ba tsena mo motseng o o boitshepo, ba bonwa ke batho ba le bantsi.

₅₄Mme jaana, molaodi wa mophato le ba o lebeletseng Jesu nabo, ba re ba bona thoromo ya lefatshe, le dilo tse di dirafetseng, ba boifa thata, ba re: “Ruri yo e ne e le Morwa Modimo.”

₅₅Le basadi ba le bantsi ba bo ba le teng ba lebile ba le kgakala, e le ba ba setseng Jesu morago ba mo direla, ba tswa Galilea. ₅₆Mo go bone ga bo go le Maria Magetalene, le Maria mma boJakobe le Josese, le mma bomorwa Sebete.

₅₇E rile go le maitseboa ga tla monna mongwe wa mohumi, yo go tweng, Josefe wa Arimathea, yo le ene ka esi e ne e le morutwa wa ga Jesu. ₅₈Monna yo, a ya kwa go Pilato, a lopa setoto sa ga Jesu. Mme Pilato a laola gore a se neelwe. ₅₉Josefe a tsaya setoto a se phuthela ka letsela le lentle la leloba, ₆₀a se baya mo phupung e e leng ya gagwe e ntšha, e o ne a e gabile mo lefikeng; mme a pitikela lentswe le legolo mo molomong wa phupu, a tsamaya. ₆₁Maria Magetalene a bo a le teng, le Maria yo mongwe, ba dutse go lebagana le phupu.

₆₂Jaana ya re ka moso, e le letsatsi le le rulaganang le letsatsi la Iketleetso, ditlhogo tsa baperesiti le Bafarisai ba phuthegela kwa go Pilato, ₆₃ba re: “Morena, re gakologetswe fa e rile leferefere leo le sa ntse le tshedile, la re: ‘Morago ga malatsi a le mararo ke tlaa ba ke tsoga.’ ₆₄Ke gone laola gore phupu e disiwe thata, go ya go fitlha mo letsatsing la boraro, e ka tla ya re gongwe barutwa ba gagwe ba ya go mo utswa, mme ba raya batho ba re: ‘O tsogile mo losong;’ mme timetso ya tla ya bifa bogolo go ya ntlha.”

₆₅Pilato a ba raya a re: “Lo na le lekoko la badisa, tsamayang lo ye go disa ka fa lo itseng ka teng.”

₆₆Jalo ba tsamaya, ba ya go disa phupu, ba kana lentswe, le lekoko la badisa ba bo ba na nabo.