Jesu o fodisa monna yo o teteselang
1A tsena mo mokorong, a kgabaganya letsha, a tla go fitlha mo motseng wa ga gabo. 2Foo ba lere mo go ene monna mongwe yo o lwalang bolwetse jwa teteselo, a tshotswe ka bolao. Jesu ka a bona tumelo ya bone, a raya yo o teteselang a re: “Ngwana, nametsega, dibe tsa gago o di itshwaretswe.”
3Mme bangwe ba bakwadi ba ithaya ba re: “Monna yo o a tlhapatsa.”
4Jesu ka a itse megopolo ya bone a re: “Lo gopolelang bosula mo dipelong tsa lona? 5Mo go ka nnang bofefo ke gofe, fa go ka twe: ‘Dibe tsa gago o di itshwaretswe;’ le fa go ka twe: ‘Tsoga o tsamaye’? 6Mme gore lo itse fa Morwa Motho a na le thata mo lefatsheng go itshwarela dibe,” - foo a raya yo o teteselang a re: “Tsoga o tseye bolao jwa gago o ye kwa ntlong ya gago.”
7Mme a tsoga a ya kwa ntlong ya gagwe. 8E rile batho ba bantsintsi ba bona jalo, ba boifa, ba galaletsa Modimo o o neileng batho thata e e ntseng jalo.
Go bidiwa ga Mathaio
9Mme Jesu ya re a feta a tswa foo, a bona monna yo o bidiwang Mathaio, a dutse fa go kgethelwang teng; a mo raya a re: “Ntshala morago.” Mme a ema a mo sala morago.
10Ga dirala, ya re a dutse a ja mo ntlong, bonang, bakgethisi ba le bantsi le baleofi ba le bantsi ba tla ba dula le Jesu le barutwa ba gagwe. 11E rile Bafarisai ba bona jalo, ba raya barutwa ba gagwe ba re: “Kana moruti wa lona o jelang le bakgethisi le baleofi?”
12Ya re a go utlwa a re: “Ba ba itekanetseng ga ba dire ngaka sepe, fa e se ba ba lwalang fela. 13Tsamayang lo ithute gore le a reng lefoko le: ‘Ke eletsa boutlwelobotlhoko e seng setlhabelo;’ gonne ga ke a tla go bitsa basiami, fa e se baleofi fela.”
Potso ka ga go itima dijo
14Foo ga tla kwa go ene barutwa ba ga Johane ba re: “Ana rona le Bafarisai re tle re ikeletseng go ja gantsi, mme barutwa ba gago ga ba ikitse go ja?”
15Jesu a ba raya a re: “A bagwe ba ka lela fa monyadi a sa ntse a na nabo? Metlha e tlaa tla e monyadi o tlaa tlosiwang mo go bone ka yone, ke gone ba tlaa ikitsang go ja.
16“Ga go ope yo o bitielang seaparo se se onetseng ka sebata se se kweletlanyeng, se le magwata; gonne se se kabong se se bitiela, se tlaa se garola, mme kgagogo ya gale e oketsege. 17Le gone batho ga ba ke ba thela bojalwa jwa mofine jo boša mo mefalong e e onetseng; gonne mefalo e tlaa phanyega, bojalwa jwa mofine bo tshologe, le mefalo e senyege; mme ba tle ba thele bojalwa jwa mofine jo boša mo mefalong e meša, mme go bolokege gotlhe.”
Morwadia molaodi le mosadi yo o amileng diaparo tsa ga Jesu
18Ya re a sa ntse a bua dilo tse nabo, bonang ga tla molaodi mongwe, a mo obamela a re: “Morwadiake ke gone o swang fela jaana, a ko o tle o mmeye seatla, mme o tlaa tshela.”
19Jesu a ema a mo sala morago, barutwa ba gagwe le bone ba ya nae.
20Mme bonang, mosadi mongwe yo o sa leng a tshologa madi ka dinyaga di le 12, a tla fa morago ga gagwe, a ama makantsa a seaparo sa gagwe; 21gonne a ithaya a re: “Fa nka ama fela seaparo sa gagwe, ke tlaa fola.”
22Mme Jesu a retologa a mmona a re: “Morwadiaka, nametsega, tumelo ya gago e go fodisitse.” Mme mosadi o sa le a fodisiwa fela ka lobaka loo.
23E rile Jesu a tsena mo ntlong ya molaodi, mme a bona ba ba letsang ditlhaka, le lekoko la batho le tsositse modumo, 24a ba raya a re: “Thibogang, gonne morweetsana ga a a swa, o robetse.” Ba mo tshega ka tshotlo. 25Ya re lekoko la batho le sena go ntshiwa, a tsena a tshwara morweetsana ka seatla; mme morweetsana a tsoga. 26Mme tumo ya gone mo ya tswa, ya utlwala mo lefatsheng leo lotlhe fela.
Jesu o fodisa difofu tse pedi
27E rile Jesu a feta a tswa foo, banna ba le babedi ba ba difofu ba mo sala morago, ba goa ba re: “Morwa Dafite, re utlwele botlhoko!”
28Ya re a sena go fitlha mo ntlong, difofu tsa tla kwa go ene; mme Jesu a di raya a re: “A lo a dumela fa ke nonofile go dira selo se?” Ba mo raya ba re: “Ee, Morena.”
29Foo a ama matlho a bone a re: “A go lo dirafalele ka fa tumelong ya lona.” 30Matlho a bone a buduloga. Mme Jesu a ba laya thata a re: “Lo bone, gore golo mo go se ka ga itsiwe ke ope.”
31Mme ba tswa, ba utlwatsa tumo ya gagwe mo lefatsheng leo lotlhe fela.
Jesu o fodisa semumu
32E rile ba tswa, bonang, ga leriwe mo go ene monna mongwe wa semumu, a tsenywe ke mowa o o maswe. 33Ya re mowa o o maswe a sena go kgoromelediwa ntle, semumu sa bua; mme batho ba bantsintsi ba gakgamala ba re: “Ga go ise go ke go bonwe jalo gope mo go Baiseraele.”
34Mme Bafarisai bone ba re: “O kgoromeletsa mewa e e bosula ntle ka kgosana ya mewa e e busula.”
Jesu o tlhomogela batho pelo
35Mme Jesu a tlhatlologanya metse le metsana yotlhe, a eta a ruta mo matlong a bone a thuto, a rera Mafoko a a Molemo a bogosi, a fodisa dipobolo dingwe le dingwe tsotlhe, le malwetse mangwe le mangwe otlhe fela. 36Ya re a bona matshutitshuti a batho, a ba tlhomogela pelo, ka ba patikegile ba gasagasame jaaka dinku tse di se nang modisa. 37Foo a raya barutwa ba gagwe a re: “Thobo e kgolo ruri, mme barobi ba a tlhaela. 38Ke gone, rapelang Morena wa thobo, gore a rome barobi mo thobong ya gagwe.”
