MAREKO 9

₁A ba raya a re: “Ammaaruri ke a lo raya, go na le bangwe mo go ba ba emeng fa, ba ba se ketlang ba utlwa loso gope, ba ise ba bone bogosi jwa Modimo bo tla ka nonofo pele.”

₂Ya re malatsi a le marataro a sena go feta, Jesu a tsaya Petere, le Jakobe, le Johane, a tlhatlogela nabo mo thabeng e e godileng, kwa thoko ba le bosi; mme a ya a fetoga ponalo fa pele ga bone; ₃diaparo tsa gagwe tsa tsabakela, tsa nna bosweu thata; mo go se nang mosweufatsi ope mo lefatsheng yo o ka di sweufatsang jalo. ₄Mme ga bonala kwa go bone Elija a na le Moše; mme ba ba ba bua le Jesu. ₅Petere a bua a raya Jesu a re: “Moruti, go molemo go rona go nna fa; o mme re dire metlaagana e le meraro: mongwe e nne wa gago, mongwe e nne wa ga Moše, o mongwe e nne wa ga Elija.” ₆Gonne a sa itse se o ka se buang, ka ba ne ba boifa thata.

₇Mme ga tla leru la ba tshutifalela; mme ga tswa lentswe mo lerung la re: “Yo ke Morwaake yo o rategang, utlwang ene.” ₈Ka tshoganetso ba leba ka fa le ka fa, mme ba se ka ba tlhola ba bona ope, fa e se go ipona ba le bosi fela le Jesu.

₉Ya re ba fologa mo thabeng, a ba laya gore ba se bolelele ope dilo tse ba di bonyeng, fa e se mo lobakeng lo Morwa Motho o tlaa bong a setse a tsogile mo losong ka lone.

₁₀Ba tshegetsa lefoko leo, ba botsanya gore, go ba go tsoga mo baswing go ka ne go kaya eng? ₁₁Mme ba mmotsa, ba re: “Bakwadi ba reng fa ba re, Elija o na le go tla pele?”

₁₂A ba raya a re: “Ruri Elija o tla pele, mme o tsosolosa dilo tsotlhe. Go kwadilwe jang ka ga Morwa Motho fa a tlaa boga dilo di le dintsi, a ba a nyadiwa? ₁₃Ke a lo raya ka re, Elija o setse a tsile, mme ba bile ba mo diretse jaaka ba rata, fela jaaka go kwadilwe ka ga gagwe.”

₁₄Ya re ba tla mo barutweng, ba fitlhela bontsi jo bogolo jwa batho bo ba dikanyeditse, le bakwadi ba tatalalanye nabo. ₁₅Fela ka bonako ya re batho ba bantsi botlhe ba mmona, ba gakgamala thata, ba tabogela kwa go ene, ba mo dumedisa. ₁₆Mme a ba botsa a re: “Lo tatalanetseng nabo?”

₁₇Mongwe wa bontsi a mo fetola a re: “Moruti, ke lerile morwaake kwa go wena; o na le mowa wa semumu. ₁₈Gongwe le gongwe kwa o mo tshwarang teng, o mo piriganyetsa fa fatshe; mme a phoke mafulo, a phuranye meno, a kwatlalale. Mme ke buile le barutwa ba gago gore ba o kgoromeletse ntle, mme ba palelwa.”

₁₉A bua nabo a re: “Ao! a losika lo lo se nang tumelo ke lona, ke tlaa nna le lona goleele go le kae? Ke tlaa lo itshokela goleele go le kae? Mo lereng kwano go nna.” ₂₀Ba mo isa kwa go ene; mme ya re a mmona ka bonako mowa wa mo tsibiketsa mo go botlhoko; mme a wela fa fatshe a bidikama, a phoka mafulo. ₂₁Mme a botsa rraagwe a re: “Go fetile lobaka lo lokae, golo mo go sena go tlaa mo go ene?” Mme a re: “E sa le ka bonyana jwa gagwe. ₂₂Gantsintsi o mo digetse mo molelong le mo metsing go mo senya; mme fa o nonofile go dira sengwe, o re tlhomogele pelo, o re thuse.”

₂₃Jesu a mo raya a re: “Wa re: ‘Fa o nonofile!’ Aitse dilo tsotlhe di ka diralela yo o dumelang.”

₂₄Foo rra ngwana a goa a re: “Ke a dumela; thusa go tlhoka go dumela ga me.”

₂₅Ya re Jesu a bona fa bontsi jwa batho bo tabogela mmogo teng, a kgalemela mowa o o maswe a re: “Wena mowa wa semumu, o o bosusu, ke a go laola, tswa mo go ene, mme o se ka wa tlhola o tsena mo go ene.”

₂₆Ya re o sena go goa, le go mo tsibiketsa thata, wa tswa, mme ngwana a nna jaaka moswi fela; bontsi jwa batho jwa ba jwa tla jwa re: “O sule.” ₂₇Mme Jesu a mo tshwara ka seatla, a mo kakatlolola, mme a ema.

₂₈Ya re a sena go tsena mo ntlong, barutwa ba gagwe ba mmoletsa kwa thoko, ba re: “Re ne re sa nonofa ka ntlha yang go o kgoromeletsa ntle?”

₂₉A ba raya a re: “O o ntseng jaana ga o ka ke wa tswa ka sepe, fa e se ka thapelo, (le ka go ikitsa go ja).”

₃₀Mme a tswa teng, a ya a ralala lefatshe la Galilea; mme a bo a rata ga se ka ga itse ope. ₃₁Gonne a ruta barutwa ba gagwe, a ba raya a re: “Morwa Motho o neetswe mo diatleng tsa batho, mme ba tlaa mmolaya; mme o tlaa re a sena go bolawa, go fete malatsi a le mararo, mme a ba a tsoge gape.” ₃₂Mme ba se ka ba tlhaologanya lefoko leo, mme ba boifa go mmotsa.

₃₃Ba fitlha mo Kaperenaume; mme a re a le mo ntlong, a ba botsa a re: “Lo ne lo ganetsanya eng mo tseleng?”

₃₄Ba didimala fela, gonne ba ne ba ganetsantse mo tseleng kgang ya go re, yo mogolo ke mang? ₃₅Mme a dula, a bitsa ba ba 12; a ba raya a re: “Fa motho mongwe le fa e le mang a rata go nna wa kwa pele, a ene a nne wa moragorago, a ba a nne modiredi wa botlhe.” ₃₆Mme a tsaya ngwanyana, a mmaya fa gare ga bone; a mo tsaya mo mabogong a gagwe; a ba raya a re: ₃₇“Le fa e le mang yo o tlaa tsholang mongwe wa banyana ba ba ntseng jaana, ka leina la me, o tshola nna; le gone le fa e le mang yo o tsholang nna, ga a tshole nna, o tshola ene yo o nthomileng.”

₃₈Johane a mo raya a re: “Moruti re bonye mongwe a kgoromeletsa mewa e e maswe ntle ka leina la gago; mme ra mo itsa, ka gobo a sa re sale morago.”

₃₉Mme Jesu a re: “Lo se ka lwa mo itsa; gonne ga go na motho ope yo o ka reng a dira tiro ya nonofo, ka leina la me, a ba a ka bua bosula ka ga me ka bofefo. ₄₀Gonne yo o sa tlhabaneng le rona, o ntlheng ya rona. ₄₁Gonne le fa e le mang yo o tlaa lo nosang metsi ka senwelo, ka gobo lo le ba ga Keresete, ammaaruri ke a lo raya, ga a ketla a tlhoka tuelo ya gagwe gope.

₄₂“Mme le fa e le mang yo o tlaa kgopang mongwe wa ba babotlana ba, ba ba dumelang mo go nna, go ka nna molemo bogolo mo go ene fa lolwala lo logolo lo ka gokelelwa mo thamong ya gagwe, mme a thabuediwa mo lewatleng. ₄₃Fa seatla sa gago se go kgopa, o se kgaole; go ka nna molemo mo go wena go tsena mo botshelong o le segole, bogolo go go tsena o le diatla tsoo pedi mo moleteng, mo molelong o o sa ka keng wa tingwa; ₄₄(kwa seboko sa bone se sa sweng teng, le kwa molelo o sa tingweng teng.) ₄₅Mme fa lonao lwa gago lo go kgopa, o lo kgaole; go ka nna molemo mo go wena go tsena mo botshelong o le setlhotsa, bogolo go go latlhelwa o le dinao tsoo pedi mo moleteng. ₄₆(Kwa seboko sa bone se sa sweng teng le kwa molelo o sa tingweng teng.) ₄₇Fa leitlho la gago le go kgopa, o le gonye; go ka nna molemo mo go wena go tsena mo bogosing jwa Modimo o le moitlho, bogolo go go latlhelwa o le matlho mabedi mo moleteng. ₄₈Kwa seboko sa bone se sa sweng teng, le kwa molelo o sa tingweng teng.

₄₉“Gonne mongwe le mongwe o tlaa lokwa ka molelo, (le setlhabelo sengwe le sengwe se tlaa lokwa ka letswai.)

₅₀“Letswai le molemo; mme fa letswai le senyegile molodi, le tlaa lokwa ka eng? Nnang le letswai mo go lona, mme lo agisanye.”