DIPALO 2

₁Jehofa a bua le Moše le Arone, a re: ₂“A bana ba Iseraele ba itlhomele megope, mongwe le mongwe fa mokgeleng o e leng wa ga gabo, ba tlhome le ditshupo tsa dikgotla tsa borra ba bone; a ba thibelele bolebagana le mogope wa bophuthegelo mo tikologong.

₃“Ba ba tlhomang ntlheng ya botlhabatsatsi, bolebagana le kwa letsatsi le tlhabang, a e nne ba mokgele wa bothibelelo jwa ga Juta, ka fa masomosomong a bone, mme kgosana ya bana ba ga Juta, a e nne Našone morwa Aminatabe. ₄Lesomosomo la gagwe, le ba ba badilweng mo go bone, e ne e le 74 600. ₅Ba ba tlaa tlhomang go bapa nae a e nne lotso lwa ga Isakare; kgosana ya bana ba ga Isakare a e nne Nethanele morwa Suare. ₆Lesomosomo la gagwe le ba ba badilweng mo go bone, e ne e le 54 400. ₇Le lotso lwa ga Sebulone; kgosana ya bana ba ga Sebulone a e nne Eliabe morwa Helone. ₈Lesomosomo la gagwe, le ba ba badilweng mo go bone, e ne e le 57 400. ₉Botlhe ba ba badilweng ba bothibelelo jwa ga Juta, e ne e le 186 400, ka fa masomosomong a bone. Ke bone ba ba tlaa bothologang pele.

₁₀“Ntlheng ya borwa a go nne mokgele wa bothibelelo jwa ga Rubene, ka fa masomosomong a bone; kgosana ya bana ba ga Rubene a e nne Elisure morwa Shedure. ₁₁Lesomosomo la gagwe le ba ba badilweng mo go bone, e ne e le 46 500. ₁₂Ba ba tlaa tlhomang go bapa nae, a e nne lotso lwa ga Simeone; kgosana ya bana ba ga Simeone a e nne Shelumiele morwa Surišatai. ₁₃Lesomosomo la gagwe, le ba ba badilweng mo go bone e ne e le 59 300. ₁₄Le lotso lwa ga Gate; kgosana ya bana ba ga Gate a e nne Eliasafe morwa Reuele. ₁₅Lesomosomo la gagwe, le ba ba badilweng mo go bone e ne e le 45 650. ₁₆Botlhe ba ba badilweng ba bothibelelo jwa ga Rubene e ne e le 151 450, ka fa masomosomong a bone. Mme a e nne bone ba bobedi mo go bothologeng.

₁₇“Foo a mogope wa bophuthegelo o bothologe, o na le ba bothibelelo jwa Balefi mo gare ga mathibelelo; jaaka ba tle ba thibelele, a ba bothologe fela jalo, motho mongwe le mongwe a le mo bonnong jwa gagwe, fa mekgeleng ya bone.

₁₈“Ntlheng ya bophirimatsatsi a go nne mokgele wa bothibelelo jwa ga Eferaime ka fa masomosomong a bone; kgosana ya bana ba ga Eferaime a e nne Eliašama morwa Amihute. ₁₉Lesomosomo la gagwe, le bone ba ba badilweng mo go bone e ne e le 40 500. ₂₀Go bapa nae a go nne lotso lwa ga Manase; kgosana ya bana ba ga Manase a e nne Gamaliele morwa Petasure. ₂₁Lesomosomo la gagwe, le ba ba badilweng mo go bone e ne e le 32 200. ₂₂Le lotso lwa ga Benjamine; kgosana ya bana ba ga Benjamine a e nne Abitana morwa Giteoni. ₂₃Lesomosomo la gagwe, le ba ba badilweng mo go bone e ne e le 35 400. ₂₄Botlhe ba ba badilweng ba bothibelelo jwa ga Eferaime e ne e le 108 100, ka fa masomosomong a bone. A e nne bone ba boraro mo go bothologeng.

₂₅“Ntlheng ya botsheka a go nne mokgele wa bothibelelo iwa ga Dane ka fa masomosomong a bone; kgosana ya bana ba ga Dane a e nne Ahiesere morwa Amišatai. ₂₆Lesomosomo la gagwe le ba ba badilweng mo go bone e ne e le 62 700. ₂₇Ba ba tlhomang go bapa nae a e nne lotso lwa ga Ašere; kgosana ya bana ba ga Ašere a e nne Pagiele morwa Okerane. ₂₈Lesomosomo la gagwe, le ba ba badilweng mo go bone e ne e le 41 500. ₂₉Le lotso lwa ga Nafetali; kgosana ya bana ba ga Nafetali a e nne Ahira morwa Enane. ₃₀Lesomosomo la gagwe le ba ba badilweng mo go bone e ne e le 53 400. ₃₁Botlhe ba ba badilweng ba bothibelelo jwa ga Dane e ne e le 157 600. Ke bone ba ba tlaa nnang ba morago mo go bothologeng fa mekgeleng ya bone.”

₃₂Ba ke bone ba ba badilweng ba bana ba Iseraele, ka dikgotla tsa borra ba bone; botlhe ba ba badilweng ba mathibelelo ka fa masomosomong a bone, e ne e le 603 550. ₃₃Mme Balefi ba se ka ba balelwa mo baneng ba Iseraele, jaaka Jehofa a ne a laotse Moše.

₃₄Bana ba Iseraele ba dira jaana, jaaka tsotlhe tse Jehofa o di laoletseng Moše, ba tlhoma jalo ka fa mekgeleng ya bone, mme ba bothologa jalo, mongwe le mongwe ka ditshika tsa bone, ka fa dikgotleng tsa borra ba bone.