DIPALO 21

₁Mme Mokanana, kgosi ya Arate yo o neng a agile ntlheng ya borwa, a utlwa go twe Iseraele o tla ka tsela ya Atharime; a tlhabana le Iseraele, a tshwara bangwe ba bone. ₂Iseraele a ikanela Jehofa ka ikano, a re: “Fa ruri o tlaa ntsenya tšhaba e mo seatleng, foo metse ya bone ke tlaa e senyetsa ruri.” ₃Jehofa a reetsa lentswe la Iseraele, a ba neela Bakanana; ba ba senyetsa ruri le metse ya bone; leina la felo foo la bidiwa ga twe, Horema.

₄Ba tloga ba tswa fa thabeng ya Hore ka tsela e e yang Lewatleng le Lehibidu, go potologa lefatshe la Etome; mowa wa batho wa ngodiega thata ka ntlha ya tsela. ₅Batho ba kgobotla Modimo le Moše, ba re: “Lo re tlhatloseditseng kwa Egepeto re tla go swela mo nageng? Gonne ga go na dijo, ga go na metsi; mowa wa rona o nkgelwa sebodu ke dijo tse di motlhofo tse.” ₆Jehofa a roma dinoga tse di bolayang mo go bone, mme tsa loma batho ba Iseraele ba swa ba le bantsi. ₇Batho ba ya kwa go Moše ba re: “Re leofile, ka re buile ka go kgobotla Jehofa le wena; rapela Jehofa gore a tlose dinoga mo go rona.” Moše, a rapelela batho. ₈Jehofa a raya Moše, a re: “Itirele noga ya kgotlho o e pege mo mokgorong; go tlaa dirafala gore mongwe le mongwe yo o lomilweng, o tlaa re a e bona a tshele.” ₉Moše a dira noga ya kgotlho, a e pega mo mokgorong, ga dirala e ne e re fa noga e lomile motho mongwe, e re a leba noga ya kgotlho a tshele.

₁₀Bana ba Iseraele ba tsamaya, ba ya ba thibelela mo Obothe. ₁₁Ba tloga ba tswa Obothe, ba thibelela kwa Iye-abarime, mo nageng e e fa pele ga Moabe, ntlheng ya botlhabatsatsi. ₁₂Ba tloga ba tswa teng, ba thibelela mo molapong wa Serete. ₁₃Ba tloga ba tswa gone, ba tlhoma kwa moseja ga Arenone o o mo nageng e e tswang mo molelwaneng wa Baamore, gonne Arenone ke molelwane wa Moabe, fa gare ga Moabe le Baamore. ₁₄Ke gone ka fa go builweng ka gone mo lokwalong lwa Dintwa tsa ga Jehofa, ga twe: “Wahebe mo Sufa, le melapo ya Arenone, ₁₅le kinamelo ya melapo e e lebang kwa bonnong jwa Are, e ikamile molelwane wa Moabe.”

₁₆Go tloga foo ba ya kwa Beere; ke sone sediba se Jehofa o buileng le Moše ka ga sone, a re: “Phutha batho, mme ke tlaa ba naya metsi.” ₁₇Foo Iseraele a opela sehela se, a re:

Go tswa nageng eo ba ya kwa Matana; ₁₉go tswa Matana ba ya kwa Nahaliele; go tswa kwa Nahaliele ba ya kwa Bamothe; ₂₀go tswa Bamothe ba ya kwa molapong o o mo nageng ya Moabe go ya kwa tlhoreng ya Pisega, o o okameng sekaka.

₂₁Iseraele a roma barongwa kwa go Sihone kgosi ya Baamore, a re: ₂₂“Mma ke ralale lefatshe la gago; ga re ketla re fapogela mo lotlhagareng kgotsa mo tshimong ya mafine; ga re ketla re nwa metsi a didiba; re tlaa feta ka tsela e kgolo ya kgosi go tsamaya re fapaanya molelwane wa gago.” ₂₃Mme Sihone a gana go leseletsa Iseraele go tlola molelwane wa gagwe. Sihone a phutha batho ba gagwe botlhe, a bololela Iseraele kwa nageng, ba fitlha kwa Jahase, mme a tlhabana le Iseraele. ₂₄Iseraele a mo kgemetha ka bogale jwa tšhaka, a rua lefatshe la gagwe go tswa Arenone go ya Jaboke, e bong kwa go bana ba ga Amone, gonne molelwane wa bana ba ga Amone o ne o le thata. ₂₅Iseraele a thopa metse eo yotlhe, mme Iseraele a thopa metse eo yotlhe, mme Iseraele a aga mo metseng yotlhe ya Baamore, mo Hešebone le mo metseng yotlhe ya teng. ₂₆Gonne Hešebone e ne e le motse wa ga Sihone kgosi ya Baamore, yo o ne a tlhabanye le kgosi ya Moabe ya pele, mme a mo tseetse lefatshe la gagwe lotlhe fela, e bong go ya kwa Arenone. ₂₇Ke gone ka moo, ba ba tlhabang diane ba tle ba re:

₃₁Jalo Iseraele a aga mo lefatsheng la Baamore. ₃₂Moše a roma a ya go tlhola Jasere, mme ba thopa metse ya gone, ba leleka Baamore ba teng. ₃₃Ba menoga, ba tlhatloga ka tsela ya Bašane; Oge kgosi ya Bašane a ba bololela, ene le batho botlhe ba gagwe, ba tlhabana nabo kwa Eterei. ₃₄Mme Jehofa a raya Moše a re: “O se ka wa mmoifa, gonne ke mo tsentse mo seatleng sa gago, le batho botlhe ba gagwe, le lefatshe la gagwe; o tlaa mo direla jaaka o diretse Sihone kgosi ya Baamore yo o neng a agile mo Hešebone.” ₃₅Jalo ba mo kgemetha, ene le bomorwawe le batho ba gagwe botlhe fela, a ba a tla a se ka a salelwa ke ope; mme ba rua lefatshe la gagwe.