DIPALO 31

₁Jehofa a bua le Moše, a re: ₂“Busolosetsa bana ba Iseraele mo go Bamidiane, morago ga moo o tlaa kopanngwa le batho ba gaeno.” ₃Moše a bua le batho, a re: “Tlhomedisang banna mo go lona gore ba bolole ntwa, ba bololele Bamidiane ba ye go dira pusoloso ya ga Jehofa mo go Bamidiane. ₄A go tswe banna ba le 1 000 mo lotsong longwe le longwe mo ditsong tsotlhe tsa Iseraele, e le ba lo tlaa ba bolotsang ntwa.” ₅Mme mo masomosomong a Baiseraele ga tlhaolwa 1 000 fela mo lotsong longwe le longwe, ke gore batho ba le 12 000 ba ba tlhomeletseng ntwa. ₆Moše a ba bolotsa ntwa, ba le 1 000 fela ba lotso longwe le longwe, bone le Finease morwa Eleasare moperesiti, ba ya ntweng, ba tshotse dilwana tsa ntlo e e boitshepo, le dinaka tsa go opa mokgosi. ₇Ba tlhabana le Bamidiane, jaaka Jehofa a laotse Moše; mme lonna lotlhe ba lo bolaya. ₈Dikgosi tsa Midiane ba di bolaela mo go ba bangwe ba ba bolailweng e bong Efi, le Rekeme, le Sure, le Hure le Reba, dikgosi tse tlhano tsa Midiane. Balaame morwa Beore le ene ba mmolaya ka tšhaka. ₉Bana ba Iseraele ba tshwara basadi ba Midiane le banyana ba bone; le dikgomo tsotlhe tsa bone, le matlhape otlhe a bone, le dithoto tsotlhe tsa bone, ba di gapa. ₁₀Metse ya bone yotlhe kwa ba ne ba agile gone, le manno a bone ba a fisa ka molelo. ₁₁Ba tsaya kgapo yotlhe, le thopo yotlhe, ya batho le ya dikgomo. ₁₂Batshwarwa, le thopo, le kgapo, ba isa gotlhe kwa go Moše, le kwa go Eleasare moperesiti, le kwa phuthegong ya bana ba Iseraele, kwa bothibelelong mo dipaleng tsa Moabe, tse di fa Joretane kwa Jeriko.

₁₃Moše le Eleasare moperesiti, le dikgosana tsotlhe tsa phuthego, ba tswa ba ya go ba kgatlhantsha kwa ntle ga bothibelelo. ₁₄Moše a nna bogale le bagolwane ba ntwa, balaodi ba dikete, le balaodi ba makgolo ba ba tswang kwa tirong ya ntwa. ₁₅Moše a ba raya a re: “A lo tshedisitse basadi botlhe? ₁₆Bonang, bao ba tlodisitse bana ba Iseraele tlolo fa pele ga Jehofa, mo tirong ele ya ga Peore, ka kgakololo ya ga Balaame, jalo sebetso sa tla mo phuthegong ya Jehofa. ₁₇Ke gone jaana bolayang bana botlhe ba basimane, le basadi botlhe ba ba itsileng monna ka go lala nae. ₁₈Mme bana botlhe ba basetsana, ba ba sa itseng monna ka go lala nae, lo ba itsheditsetse. ₁₉Lo thibelele kwa ntle ga bothibelelo ka malatsi a supa; le fa e le mang wa lona yo o bolaileng motho, le gone le fa e le mang yo o amileng motho yo o bolailweng, lo iitshekise ka letsatsi la boraro le ka letsatsi la bosupa, lona le batshwarwa ba lona. ₂₀Ka ga seaparo sengwe le sengwe, le tsotlhe tse di dirilweng ka letlalo, le tiro yotlhe ya maodi a dipodi, le dilo tsotlhe tse di dirilweng ka logong lo di itshekise.”

₂₁Eleasare moperesiti a raya batlhabani ba ba tswang ntweng, a re: “E ke yone taolo e e tlhomamisitsweng ya molao, e Jehofa o e laoletseng Moše; ₂₂le fa go ntse jalo gouta, le selefera, le kgotlho, le tshipi, le boleke le lotwe, ₂₃tsotlhe tse di sa senngweng ke molelo, lo di ralatse molelo, di tlaa nna boitsheko; le fa go ntse jalo a di itshekisiwe ka metsi a tomololo; mme tsotlhe tse di ka senngwang ke molelo, lo di ralatse metsi. ₂₄Lo tlhatswe diaparo tsa lona ka letsatsi la bosupa, mme lo tlaa nna boitsheko, morago ga moo lo ka tla mo bothibelelong.”

₂₅Jehofa a bua le Moše, a re: ₂₆“Wena le Eleasare moperesiti, le ditlhogo tsa makgotla a borra batho, lo dire palo ya kgapo e e gapilweng, ya batho le ya dikgomo; ₂₇lo kgaoganye kgapo eo sebedi: ntlha nngwe lo e kgaoganyetse banna ba ba maano mo tlhabanong, ba ba neng ba bolotse ntwa, ntlha e nngwe e nne ya phuthego yotlhe. ₂₈Lo tseele Jehofa lekgetho mo batlhabaning ba ba tswang ntweng; mo makgolong a matlhano mangwe le mangwe lo tseye setshedi se le sengwe fela sa batho, sa dikgomo, sa diesela le sa matsomane. ₂₉Lo di tseye mo kabelong ya bone, lo di neye Eleasare moperesiti, e le tshupelo ya tsholetso ya ga Jehofa. ₃₀Mo kabelong ya bana ba Iseraele, mo masomeng a matlhano mangwe le mangwe o tseye setshedi se le sengwe fela, sa batho, sa dikgomo, sa diesela, sa matsomane, e bong ditshedi tsotlhe, mme lo di neye Balefi ba ba tshegetsang tebelo ya motlaagana wa ga Jehofa.” ₃₁Moše le Eleasare moperesiti ba dira jaaka Jehofa a laotse Moše.

₃₂Jaana kgapo e e setseng batlhabani ba sena go tsaya kgapo ya bone, e ne e le dinku di le 675 000, ₃₃le dikgomo di le 72 000, ₃₄diesela di le 61 000, ₃₅batho ba le mmogo ba le 32 000, ba basadi ba ba neng ba sa itse monna ka go lala nae. ₃₆Bontlhanngwe jo e neng e le kabelo ya ba ba tswang ntweng e ne e le dinku di le 337 500. ₃₇Lekgetho la ga Jehofa la dinku e le 675. ₃₈Dikgomo di ne di le 36 000; lekgetho la ga Jehofa la tsone e le 72. ₃₉Diesela di ne di le 30 500; lekgetho la ga Jehofa la tsone e le 61. ₄₀Batho ba le 16 000; lekgetho la ga Jehofa la bone e le batho ba le 32. ₄₁Lekgetho le e neng e le tshupelo ya ga Jehofa ya tsholetso, Moše a le naya Eleasare moperesiti, jaaka Jehofa a laotse Moše.

₄₂Bontlhanngwe jo bo abetsweng bana ba Iseraele, jo Moše o bo lomolotseng mo go tsa banna ba ba tlhabanyeng, ₄₃(mme bontlhanngwe jo bo abetsweng phuthego e ne e le dinku di le 337 500, ₄₄dikgomo di le 36 000, ₄₅diesela di le 30 500, ₄₆batho ba le 16 000); ₄₇e bong mo go jone bontlhanngwe jo bo abetsweng bana ba Iseraele, Moše a somola go le gongwe fela mo go masome matlhano mangwe le mangwe, ga batho le ga diruiwa, a go naya Balefi ba ba tshegetsang tebelo ya motlaagana wa ga Jehofa, jaaka Jehofa a laotse Moše.

₄₈Bagolwane ba ba laolang ba dikete ba ntwa, balaodi ba dikete le balaodi ba makgolo, ba atamela kwa go Moše. ₄₉Ba raya Moše ba re: “Batlhanka ba gago ba badile palo ya batlhabani ba ba mo taolong ya rona, mme ga go tlhokafale monna ope mo go rona. ₅₀Re lerile seromololo sa ga Jehofa se motho mongwe le mongwe o se bonyeng, mekgabo ya gouta, bompolokwane ba magwejana, mefitshana ya mabogo, dipalamenwana tsa sekanelelo, manyena a ditsebe le mefitshana ya thamo, go tla re direla mewa ya rona tetlanyo fa pele ga Jehofa.” ₅₁Moše le Eleasare moperesiti ba amogela gouta mo go bone, e bong mekgabo yotlhe e e thudilweng. ₅₂Gouta yotlhe ya tshupelo ya tsholetso e ba ne ba e isetsa Jehofa, ya balaodi ba dikete, le balaodi ba makgolo, e ne e le dikilokerama di le 190. ₅₃(Gonne batlhabani ba ne ba ikgapetse thopo, mongwe le mongwe a itseela ka esi.) ₅₄Moše le Eleasare moperesiti ba amogela gouta mo balaoding ba dikete, le balaoding ba makgolo, ba e isa mo mogopeng wa bophuthegelo gore e nne morafolo fa pele ga Jehofa, o o tswang baneng ba Iseraele.