DIANE 12

₁Le fa e le mang yo o ratang thuto o rata kitso, mme yo o ilang kgalemelo o seholofolo fela.

₂Motho yo o molemo o tlaa bona botsalano mo go Jehofa, mme o tlaa sekisa motho yo o maano a boikepo.

₃Motho ga a ketla a tlhomamisiwa ka boikepo, mme motswe wa mosiami ga o ketla o tshikinngwa gope.

₄Mosadi yo o mokgwa montle o o iphaphileng ke serwalo sa tlhogo mo monneng wa gagwe, mme yo o tlhabisang ditlhong o ntse jaaka sebodu mo marapong a gagwe.

₅Megopolo ya basiami e lekalekanye, mme dikgakololo tsa baikepi ke tsietso.

₆Mafoko a baikepi ke a go lalela madi a motho go a tsholola, mme molomo wa bathokgami o tlaa ba golola.

₇Baikepi ba ribegeditswe, mme ga bayo, mme ntlo ya mosiami e tlaa ema.

₈Motho o tlaa bolelwa ka molemo ka fa botlhaleng jwa gagwe, mme yo o pelo e e lesoko o tlaa nyadiwa.

₉Motho yo o kobelwang tlase, mme a na le motlhanka, o gaisa yo o itlotlang, mme a tlhoka dijo.

₁₀Motho yo o siameng o tle a gopole botshelo jwa kgomo yabo, mme mautlwelobotlhoko a moikepi ke bolalome fela.

₁₁Yo o lemalemang masimo a gagwe o tlaa bona letlotlo la dijo, mme yo o salang maithamako morago ga a na tlhaloganyo.

₁₂Moikepi o eletsa tsa lotloa lwa batho ba ba bosula, mme motswe wa mosiami o ungwa loungo.

₁₃Seru sa motho yo o bosula se mo tlolong ya dipounama, mme mosiami o tlaa tswa mo tlalelong.

₁₄Motho o tlaa kgora molemo ka loungo lwa molomo wa gagwe, mme madiro a diatla tsa motho o tlaa a busediwa.

₁₅Tsela ya lesilo e siame mo matlhong a lone, mme yo o botlhale o tle a reetse kgakololo.

₁₆Go kgoberega ga lesilo go itsiwe ka bonako, mme motho yo o ikgapang o fitlha ditlhong.

₁₇Yo o bolelang boammaaruri o bonatsa tshiamo, mme mosupi wa kako o bonatsa tsietso.

₁₈Go na le go bua ka kgakgabuelo jaaka ditlhabo tsa putlela, mme loleme lwa motho yo o botlhale ke phodiso.

₁₉Pounama ya boammaaruri e tlaa tlhomama ka bosakhutleng, mme loleme lo lo akang lo ema ka ponyo ya leitlho fela.

₂₀Tsietso e mo pelong tsa ba ba logang bosula, mme bagakolodi ba kagiso ba na le boitumelo.

₂₁Basiami ga ba ketla ba diralelwa ke bosenyi bope, mme baikepi ba tlaa tlalelwa ke bosula.

₂₂Dipounama tse di akang ke sefedisa pelo mo go Jehofa, mme ba ba dirang ka boammaaruri ba a mo natefela.

₂₃Motho yo o ikgapang o loba kitso, mme dipelo tsa dieleele di bolela bosilo.

₂₄Seatla sa motlhoafadi se tlaa busa, mme seramatla se tlaa dirisiwa tiro ka thata.

₂₅Boimelesego mo pelong ya motho bo tle bo e inamise, mme lefoko le le molemo le e ipedise.

₂₆Mosiami ke mokayatsela mo go wa ga gabo, mme tsela ya baikepi e a ba timetsa.

₂₇Yo o seramatla ga a ke a besa se o se bolaileng a ile go tsoma, mme dithoto tse di tlhokegang tsa batho di tle di nne kwa batlhoafading.

₂₈Botshelo bo mo tseleng ya tshiamo, le mo tselaneng ya yone ga go na loso.