DIANE 17

₁Go molemo thathana e e omeletseng fa e na le boiketlo, bogolo go ntlo e go jelwang dijo tse di tletsetletseng mo go yone, fa go na le komano.

₂Motlhanka yo o dirang ka botlhale o tlaa busa yo e leng ngwana wa kgotla yo o tlhabisang ditlhong, mme o tlaa arogana boswa le bomorwa motho.

₃Pitsa e e tlhaolosang e diretswe selefera, le boubelo bo diretswe gouta, mme Jehofa o leka dipelo.

₄Modirabosula o ela dipounama tsa boikepo tlhoko, le moaki o sekegela loleme lwa basenyi tsebe.

₅Le fa e le mang yo o sotlang mohumanegi o kgoba Mmopi wa gagwe, mme yo o itumelelang tshenyegelo ga a ketla a tlhoka petso.

₆Bana ba bana ke serwalo sa tlhogo sa bagolo, mme kgalalelo ya bana ke borraabo.

₇Puo e e maatlametlo ga e a tshwanela lesilo, bogolo jang dipounama tse di akang ga di a tshwanela kgosana.

₈Neo e ntse jaaka lentswana le le tlhokegang mo matlhong a gagwe yo o nang nayo, le fa e leba kae le kae e ntse e kokotlegela fela.

₉Yo o bipang tlolo o batla lorato, mme yo o toutang sengwe o kgaoganya ditsala tse dikgolo.

₁₀Kgalemelo e tsena kwa teng ga motho yo o nang le tlhaloganyo, go feta dithupa di le lekgolo mo seeleeleng.

₁₁Motho yo o bosula o batla tsuololo fela; ke gone ka moo morongwa yo o bolalome o tlaa rongwang kwa go ene.

₁₂A bera e e gapetsweng bana e kopane le monna, bogolo go seeleele mo boeleeleng jwa sone.

₁₃Le fa e le mang yo o duelang molemo ka bosula, bosula ga bo ketla bo tloga mo ntlong ya gagwe.

₁₄Tshimologo ya komano e tshwana jaaka fa motho a kabolola metsi; mme ke gone lesang go tatalalana lo ise lo ye go lwa.

₁₅Yo o siamisetsang moikepi, le yo o sekisang mosiami, boo babedi ke sefedisapelo mo go Jehofa, ba tshwana fela.

₁₆Ke ka ntlha yang fa mo seatleng sa seeleele go na le tlhwatlhwa ya go reka botlhale, le mororo se se na tlhaloganyo epe?

₁₇Tsala e rata motho ka metlha yotlhe, le morwa rra motho o tsaletswe motlha wa pitlagano.

₁₈Motho yo o se nang tlhaloganyo o opa legofi a ba a nna moemedi wa motho mo ponong ya wa ga gabo.

₁₉Yo o ratang komano o rata tlolo, yo o godisetsang setswalo sa gagwe kwa godimo o senka tshenyego.

₂₀Yo o nang le pelo e e lesoko ga a bone molemo ope, le yo o nang le loleme lo lobe, o wela mo bosenying.

₂₁Yo o tsalang seeleele o go direla go tla a bona bohutsana, le rraaso seeleele ga a na boitumelo bope.

₂₂Pelo e e ntseng mokete ke kalafo e e molemo, mme mowa o o phatlogileng o omeletsa marapo.

₂₃Moikepi o ntsha neo mo sehubeng gore a fapose ditsela tsa katlholo.

₂₄Botlhale bo fa pele ga sefatlhogo sa yo o nang le tlhaloganyo, mme matlho a seeleele a kwa dikhutlong tsa lefatshe.

₂₅Mosimane yo o seeleele o ledisa rraagwe, o bile o tsosa pelo e e galakang mo go ene yo o mmelegeng.

₂₆Le gone ga go molemo go betsa mosiami, le fa e le go itaya ba ba tlotlegang ka ntlha ya thokgamo ya bone.

₂₇Yo o rekegelang mafoko a gagwe o na le kitso, le yo o mowa o o tsididi ke motho wa tlhaloganyo.

₂₈Le e leng lesilo, motlhang le didimetseng, le kaiwe botlhale, motlhang le momang molomo le kaiwe go re le bonokopela.