DIANE 2

₁Morwaaka, fa o ka tshola mafoko a me, wa ba wa ipeela ditaolo tsa me fa go wena, ₂wa sekegela botlhale tsebe, mme wa lebisa pelo ya gago kwa tlhaloganyong; ₃ee, fa o tlhaeletsa tlhalemaleje, mme wa tsholeletsa tlhaloganyo lentswe la gago; ₄fa o mmatla jaaka e ka bo e le selefera, fa o mo hukuletsa jaaka e kabo e le dikhumo tse di subegileng; ₅foo o tlaa tlhaloganya go boifa Jehofa, mme o tlaa bona kitso ya Modimo. ₆Gonne Jehofa o aba botlhale; kitso e tswa mo molomong wa gagwe, le tlhaloganyo. ₇O beela bathokgami botlhale jo bo itekanetseng, ke ene thebe kwa go ba ba tsamayang ka boitekanelo, ₈gore a femele ditselana tsa katlholo, a dibele tsela ya baitshepi ba gagwe.

₉Foo o tlaa tlhaloganya tshiamo le katlholo, le tekatekanyo, ee, tselana nngwe le nngwe e e molemo. ₁₀Gonne botlhale bo tlaa go tsena mo pelong, le kitso e tlaa nna monate mo moweng wa gago; ₁₁tlhalemaleje e tlaa go tlhodumela, tlhaloganyo e tlaa go boloka, ₁₂go go golola mo tseleng ya bosula, mo banneng ba ba buang dilo tsa lesoko, ₁₃ba ba tlogelang ditsela tsa thokgamo, gore ba tsamaye mo ditseleng tsa lefifi; ₁₄ba ba itumelang go dira bosula, ba ipela mo lesokong la bosula. ₁₅Ba ba kgopo mo ditseleng tsa bone, ba logwadi mo ditselaneng tsa bone.

₁₆Go go golola mo mosading yo o leng o sele, e bong mo mosading yo o leng o sele yo o rethefatsang mafoko a gagwe; ₁₇yo o latlhang tsala ya bokau jwa gagwe, a lebale kgolagano ya Modimo wa gagwe; ₁₈gonne ntlo ya gagwe e ganelela kwa losong, le ditselana tsa gagwe kwa baswing. ₁₉Mo go ba ba yang kwa go ene, ga go ope yo o bowang, le gone ga ba ke ba ye go wela ditselana tsa botshelo. ₂₀Gore o tle o tsamaye mo tseleng ya batho ba ba molemo, o tatamale fela le ditselana tsa basiami, ₂₁gonne bathokgami ba tlaa aga mo lefatsheng, le baitekanedi ba tlaa sala ba ntse ruri mo go lone. ₂₂Baikepi ba tlaa kgaolwa ba tlosiwa mo lefatsheng, le ba ba dirang ka bonongwana ba tlaa khumolwa mo go lone.