DIANE 3

₁Morwaaka, o se ka wa lebala molao wa me; mme a pelo ya gago e tshegetse ditaolo tsa me, ₂gonne di tlaa go okeletsa boleele jwa malatsi, le dinyaga tsa botshelo, le kagiso. ₃A boutlwelobotlhoko bo se go tlogele le boammaaruri; o di bofelele mo thamong ya gago; o di kwale mo sekwalelong sa pelo ya gago; ₄jalo o tlaa bona botsalano le tlotlego mo ponong ya Modimo le ya motho.

₅O ikanye Jehofa ka pelo yotlhe ya gago, o se ka wa ikaega tlhaloganyo ya gago fela. ₆Mo ditseleng tsotlhe tsa gago o ipolele ene, mme o tlaa siamisa ditselana tsa gago. ₇O se ka wa nna botlhale mo matlhong a gago; boifa Jehofa, o bo o kgaogane le bosula. ₈E tlaa nna phodiso mo khubung ya gago, le moko mo marapong a gago. ₉Tlotla Jehofa ka thoto ya gago, le ka tsa ntlha tsa totafalelo yotlhe ya gago. ₁₀Jalo mabolokelo a gago a tlaa tlala letlotlo, le dithatholelo tsa gago di tlaa penologa bojalwa jo boša.

₁₁Morwaaka, o se ka wa nyatsa kwatlhao ya ga Jehofa; le gone o se ka wa lapisiwa ke kgalemo ya gagwe; ₁₂gonne yo Jehofa o mo ratang o tle a mo kgalemele; fela jaaka rra motho a tle a kgalemele morwawe yo o mo natefelang. ₁₃Go tlhogonolo motho yo o bonang botlhale, le motho yo o bapalang tlhaloganyo. ₁₄Gonne tlhwatlhwa ya yone e gaisa tlhwatlhwa ya selefera, le papadi ya lone e gaisa papadi ya gouta e e itshekileng. ₁₅O tlhokega bogolo go diperela; mme mo dilong tsotlhe tse o ka di eletsang ga go na sepe se se ka tshwantshiwang nae. ₁₆Boleele jwa malatsi bo mo seatleng sa gagwe se se siameng; mo seatleng sa gagwe sa molema go dikhumo le tlotlo. ₁₇Ditsela tsa gagwe ke ditsela tsa monate, le ditselana tsa gagwe tsotlhe ke kagiso. ₁₈O setlhare sa botshelo mo go ba ba mo tshwarang; go tlhogonolo mongwe le mongwe yo o mo itshadisetsang. ₁₉Jehofa o thaile lefatshe ka botlhale; a tlhomamisa magodimo ka tlhaloganyo. ₂₀Mateng a ne a phunyakwa ka kitso ya gagwe, mme loapi lo rotha monyo.

₂₁Morwaaka, a di se tloge mo matlhong a gago; o tshware botlhale jo bo itekanetseng le pharologanyo. ₂₂Jalo di tlaa nna botshelo mo moweng wa gago, le bontle mo thamong ya gago. ₂₃Foo o tlaa tsamaya mo tseleng ya gago ka thagamo, le lonao lwa gago ga lo ketla lo kgotswa. ₂₄E tlaa re o rapama ga o ketla o boifa; ee, o tlaa rapama fela, mme boroko jwa gago bo tlaa nna monate. ₂₅O se ka wa boifa poifo e e tshoganetsang, le fa e le go swafadiwa ga baikepi motlhang go tlang; ₂₆gonne Jehofa o tlaa nna boikanngo jwa gago, o tlaa boloka lonao lwa gago, gore lo se ka lwa tshwarwa.

₂₇Ba ba tshwanetsweng ke go direlwa molemo, o se ka wa gana ka one, fa go le mo thateng ya seatla sa gago go o dira. ₂₈O se ka wa raya wa gaeno wa re: “Tsamaya, o bo o tle gape, ka moso ke tlaa go naya;” le mororo selo o na naso. ₂₉O se ka wa logela wa gaeno maano a a bosula, e tswa a agile fa go wena ka thagamo. ₃₀O se ka wa lwela le motho lefela, fa a sa go direla molato ope. ₃₁O se ka wa rata wa bo o ka nna jaaka motho wa sesenyi, o bo o se ka wa itshenkela ditsela dipe tsa gagwe. ₃₂Gonne yo o logwadi ke mofedisa pelo mo go Jehofa; leoma la gagwe le na le yo o thokgameng. ₃₃Phutso ya ga Jehofa e mo ntlong ya moikepi; mme o segofatsa boago jwa mosiami. ₃₄Ruri o sotla basotli, mme o naya bakgobaladi bontlafalo. ₃₅Ba ba botlhale ba tlaa rua kgalalelo; mme dieleele di tlaa godisediwa ditlhonnyeng.