DIANE 30

₁Mafoko a ga Agure morwa Jake: polelo ya boitseanape. Monna a raya Ithiele, Ithiele le Ukale, ₂a re: “Ruri nna ke lesilo bogolo go batho botlhe, ke bile ke se na tlhaloganyo ya motho, ₃ga ke a ithuta botlhale, le gone ga ke na kitso ya go itse Moitshepi.” ₄E mang yo o tlhatlogetseng legodimong, a ba a fologa? E mang yo o huparetseng diphefo mo matsweleng a gagwe? E mang yo o bofeletseng metsi mo seaparong sa gagwe? E mang yo o tlhomamisitseng dikhutolo tsotlhe tsa lefatshe? E mang leina la gagwe, le leina la ga morwawe e mang fa o itse?

₅Lefoko lengwe le lengwe la Modimo le lekilwe; one, ke thebe ya ba ba o ikanyang. ₆O se ka wa oketsa mafoko a one, o ka tla wa go kgalemela, mme wa fitlhelwa o le moaki.

₇Ke go lopile dilo di le pedi; o se ka wa di ntatolela ke ise ke swe; ka re, ₈boithamako le maaka o di beye kgakala le nna; o se ka wa nnaya khumanego le fa e le khumo; nkotla ka dijo tse di ntekanyeng; ₉nka tla ka kgora, mme ka go itatola, ka re: “Jehofa e mang?” Kgotsa fa ke humanegile nka tla ka utswa, mme ka dira leina la Modimo wa me matlhapa.

₁₀O se ka wa seba motlhanka kwa go mong wa gagwe, o ka tla a go roga, mme wa nna molato.

₁₁Go na le losika lwa batho ba ba rogang borraabo, mme ba sa segofatse bommaabo.

₁₂Go na le losika lwa batho ba ba iponang boitsheko, le fa go ntse jalo ba sa tlhapisiwa maswe a bone.

₁₃Go na le losika lwa batho, ana matlho a bone a kalegile jang, le dintshi tsa matlho a bone di tsholetsegile jang!

₁₄Go na le losika lwa batho ba meno a bone a ntseng jaaka ditšhaka, le ba meno a ditlhaya tsa bone a ntseng jaaka dithipa tsa go ja bahumanegi go ba tlosa mo lefatsheng, le batlhoki gore ba tswe mo bathong.

₁₅Monopi o na le bana ba basetsana ba le babedi, ba ba goang, ba re: “Naya, naya.” Go na le dilo di le tharo tse di sa kgoreng gope. Ee, dilo di le nne tse di se keng di re: “Go lekanye:” ₁₆Phupu; le sebopelo sa boopa; lefatshe le le sa kgoreng metsi; le molelo o o se keng o re: “Go lekanye.”

₁₇Leitlho la motho yo o sotlang rraagwe, le la yo o nyatsang go utlwa mmaagwe, mahukubu a molapo a tlaa le gonya, le manonyana a tlaa le ja.

₁₈Go dilo di le tharo tse di gakgamatsang bobe mo go nna, ee, go di le nne tse ke sa di itseng: ₁₉Tsela ya ntswi yo motona mo loaping; tsela ya noga mo lefikeng; tsela ya sekepe mo gare ga lewatle; le tsela ya monna a na le morweetsana.

₂₀Tsela ya mosadi wa seaka e ntse jalo; o tle a je, mme a iphimole molomo a re: “Ga ke a dira boikepo bope.”

₂₁Lefatshe le roromisiwa ke dilo di le tharo, le ke di le nne, tse le retelelwang ke go di belega: ₂₂Ke motlhanka fa a le kgosi; le yo o logaba fa a kgotshe dijo; ₂₃ke mosadi yo o maswe fa a nyetswe; le lelata le e leng mojaboswa wa mohumagadi wa lone.

₂₄Go dilo di le nne tse di leng dipotlana mo lefatsheng, mme di botlhale jo bo feteletseng. ₂₅Ditshoswane ke tšhaba e e seng thata, le fa go ntse jalo di tle di baakanye dijo tsa tsone selemo. ₂₆Dipela ke dilo tse di bokoa, le fa go ntse jalo di tle di age matlo a tsone mo meoleng ya mafika. ₂₇Tsie ga e na kgosi, le fa go ntse jalo e tle e tswelele yotlhe ka masomo. ₂₈Ntseane o tshwara ka diatla, le fa go ntse jalo o tle a nne mo matlong a dikgosi.

₂₉Go dilo di le tharo tse di motsamao o gwantang, ee, di le nne tse di gwantang mo go tsamayeng ga tsone: ₃₀Tau, e e leng yone e thata bogolo mo dibataneng, mme e sa itse go thibogela sepe; ₃₁le ntša ya phefo; le phoko; le kgosi e e se nang ope yo o ka e tsogelang go tlhabana nayo. ₃₂Fa o dirile bosilo ka go ikokomatsa, kgotsa fa o gopotse bosula, ipeye seatla mo molomong. ₃₃Gonne go itaanngwa ga maši go tle go ntshe serethe, le go sokwa ga nko go tle go ntshe madi, le go tlhotlhelediwa ga bogale go tle go tsose ntwa.