DIANE 7

₁Morwaaka, tshegetsa mafoko a me, o beye ditaolo tsa me fa go wena. ₂Tshegetsa ditaolo tsa me o tshele; le molao wa me jaaka thaka ya leitlho la gago. ₃O di bofelele mo menwaneng ya gago; o di kwale mo sekwalelong sa pelo ya gago. ₄Raya botlhale o re: “O kgaitsadiake;” o reye tlhaloganyo o re: “O wa bana ba ga mme;” ₅gore ba go dibele mo mosading wa seeng, mo moennyeng yo o fakang ka mafoko a gagwe.

₆Gonne e kile ya re ka fa seiponing sa ntlo ya me ka okomela ka marofana, ₇mme ka bona mo go ba ba sa tlhalefang, ka lemoga mo makaung, motho mongwe wa lekau yo o se nang tlhaloganyo, ₈a feta le mmila gaufi le kgokgotsho ya mosadi yoo, mme a otobela kwa tseleng e e yang kwa ntlong ya gagwe; ₉ka lotlatlana, ka maabanyane, mo bontshong jwa bosigo, le jwa lefifi. ₁₀Mme bonang, a kgatlhantshiwa ke mosadi a apere diaparo tsa seaka, mme a le pelo e e boitobo. ₁₁O a tle a phokelele, a itaole, dinao tsa gagwe ga di ke di nna mo ntlong ya gagwe: ₁₂Jaana o mo mebileng, kgantele o mo dipatlelong, mme a lalele fa marakanelong a otlhe. ₁₃Jalo a mo tshwara a mo atla, a iphimola sefatlhogo, a mo raya a re: ₁₄“Ditlhabelo tsa ditshupelo tsa kagiso di kwa go nna; ke lefetse maikano a me ka tsatsi leno. ₁₅Ke gone ke moo ke duleng go go kgatlhantsha, go batla sefatlhogo sa gago ka tlhoafalo, jaanong ke go fitlhetse. ₁₆Ke adile bolao jwa me ka diphate tse di matsabatsaba, le ka matsela a a mebalabala a tlhale ya Egepeto. ₁₇Ke natefesitse bolao jwa me ka malao a mera, le aloe, le kinamone. ₁₈Ntlo, re ineele mo thatong ka botlalo go ya mosong; a re ikgomotse ka marato. ₁₉Gonne monna ga a yo mo gae, o ile loetong lo loleele. ₂₀O tshotse kgetsi ya madi; o tlaa boela gae kgwedi e le tshweu.” ₂₁A mo kgona ka go bua sentle ga gagwe mo gogolo, a mo kgola ka go haka ga dipounama tsa gagwe. ₂₂A mo sala morago ka bonako, jaaka kgomo e ya go tlhajwa, kgotsa jaaka seiaie fa se ya dikgolegong tsa kwatlhao; ₂₃go tsamaya motswi o mo phololetsa sebete; jaaka nonyane e tle e itlhaganelele seru, e sa itse fa e le tatlhego ya botshelo.

₂₄Ke gone jaana bomorwaaka, ntheetsang, lo tlhokomele mafoko a molomo wa me. ₂₅A pelo ya gago e se ka ya fapogela kwa tseleng ya gagwe, o se ka wa timelela mo ditselaneng tsa gagwe. ₂₆Gonne o digile batho ba le bantsi ba ntshitswe dintho; ee, ba ba bolailweng ke ene ke bontsi jo bogolo. ₂₇Ntlo ya gagwe ke tsela e e yang Bobipong, e fologela mo matsatseng a loso.