Pesalema 115

₁E seng rona Jehofa, e seng rona,

mme naya leina la gago kgalalelo

ka ntlha ya kutlwelobotlhoko

ya gago, le ka ntlha ya

boammaaruri jwa gago.

₂Ana merafe e tlaa bo e buelang,

e re:

“Ana jaana Modimo wa bone

o a bo o le kae?”

₃Modimo wa rona o kwa

magodimong;

o dirile ka fa o ratileng ka gone.

₄Medimo ya bone ya disetwa

ke selefera le gouta,

ke tiro ya diatla tsa batho fela.

₅E na le melomo, mme ga e bue;

e na le matlho, mme ga e bone;

₆e na le ditsebe, mme ga e utlwe;

e na le dinko, mme ga e dupe;

₇e na le diatla, mme ga e tshware;

e na le dinao, mme ga e tsamaye;

le gone

ga e bue ka memetso ya yone.

₈Ba ba e dirang

ba tlaa tshwana nayo fela,

ee, le mongwe le mongwe

yo o ikanyang mo go yone.

₉Wena Iseraele, o ikanye Jehofa;

ke ene thuso ya bone,

le thebe ya bone.

₁₀Lona ba ntlo ya ga Arone,

ikanyeng Jehofa;

ke ene thuso ya bone,

le thebe ya bone.

₁₁Lona ba lo boifang Jehofa,

ikanyeng Jehofa;

ke ene thuso ya bone,

le thebe ya bone.

₁₂Jehofa o ntse a re gopotse;

o tlaa re segofatsa;

o tlaa segofatsa ntlo ya Iseraele;

o tlaa segofatsa ntlo ya ga Arone.

₁₃O tlaa segofatsa

ba ba boifang Jehofa,

bannye le bagolo.

₁₄A Jehofa a lo atise segolo bogolo,

lona le bana ba lona.

₁₅Lo segofadiwe ke Jehofa

yo o dirileng legodimo le lefatshe.

₁₆Magodimo ke magodimo

a ga Jehofa; mme lefatshe

o le neile bana ba batho.

₁₇Baswi ga ba bake Jehofa,

le fa e le ope

yo o fologelang mo tuulalong.

₁₈Mme rona re tlaa baka Jehofa,

go tloga fano gompieno

go ya bosakhutleng.

Bakang Jehofa.