Pesalema 116

₁Ke rata Jehofa,

gonne o utlwile lentswe la me,

le mekokotlelo ya me.

₂Ka a ntshekegetse tsebe ya gagwe,

ke gone ke tlaa nnang ke mmitsa

ka ke sa ntse ke tshedile.

₃Dikgole tsa loso

di ne di ntsentse gare,

matlhoko a Bobipo a ntshwere;

ka bona tlalelo le bohutsana.

₄Foo ka bitsa leina la ga Jehofa;

ka re: “Jehofa, ke a go rapela,

golola mowa wa me.”

₅Jehofa o pelotshweu, o tshiamo;

ee, Modimo wa rona

o kutlwelobotlhoko.

₆Jehofa o boloka

ba ba sa tlhalefang;

ke ne ke ngotlilwe,

mme a mpoloka.

₇Boela mo boikhutsong jwa gago,

wena mowa wa me,

gonne Jehofa o go diretse sentle

ka mo go feteletseng.

₈Gonne o golotse mowa wa me

mo losong,

le matlho a me mo dikeleding,

le dinao tsa me gore ke se we.

₉Ke tlaa sepela fa pele ga Jehofa

mo lefatsheng la batshedi.

₁₀Ke a dumela, gonne ke tlaa bua:

“Ke ne ke patikegile thata;”

₁₁ka bua mo go potlakeng ga me,

ka re:

“Batho botlhe ke maaka fela.”

₁₂Ke tlaa ntshetsa Jehofa eng

ka ntlha ya masego otlhe a gagwe

a o a ntiretseng?

₁₃Ke tlaa tsaya senwelo sa poloko,

mme ke tlaa bitsa leina la ga Jehofa.

₁₄Ke tlaa lefela Jehofa maikano a me,

ee, fa pele ga batho botlhe

ba gagwe.

₁₅Loso lwa baitshepi ba gagwe

lo tlotlega thata

mo matlhong a ga Jehofa.

₁₆Jehofa, ruri ke motlhanka wa gago;

ke motlhanka wa gago,

ke ngwana wa lelata la gago;

o hunolotse dikgolego tsa me.

₁₇Ke tlaa go isetsa

setlhabelo sa tebogo,

mme ke tlaa bitsa leina la ga Jehofa.

₁₈Ke tlaa lefela Jehofa maikano a me,

ee, fa pele ga batho botlhe

ba gagwe;

₁₉mo malwapeng a ntlo ya ga Jehofa,

mo gare ga gago, wena Jerusalema.

Bakang Jehofa.