Pesalema 118

₁A ko lo ntshetseng Jehofa

malebogo; gonne o molemo,

gonne boutlwelobotlhoko jwa gagwe

bo eme ka bosakhutleng.

₂A jaanong Iseraele a bue, a re:

“Boutlwelobotlhoko jwa gagwe

bo eme ka bosakhutleng.”

₃A jaanong ntlo ya ga Arone

e bue e re:

“Boutlwelobotlhoko jwa gagwe

bo eme ka bosakhutleng.”

₄A jaanong ba ba boifang Jehofa

ba bue ba re:

“Boutlwelobotlhoko jwa gagwe

bo eme ka bosakhutleng.”

₅Ke ne ka bitsa leina la ga Jehofa

mo pitlaganong ya me;

Jehofa a nkaraba, mme a mpaya

mo felong fa go atlhameng.

₆Jehofa o ntlheng ya me;

ga nketla ke boifa;

kana motho o ka ntirang?

₇Jehofa o ntlheng ya me

mo go ba ba nthusang;

ke gone ka mo

ke tlaa bonang keletso ya me

mo go ba ba nkilang.

₈Go molemo go ikanya Jehofa

bogolo go go ikanya motho.

₉Go molemo go ikanya Jehofa

bogolo go go ikanya dikgosana.

₁₀Merafe yotlhe e kile

ya ntikanyeletsa; mo ineng

la ga Jehofa ke tlaa e pomaganya.

₁₁E ne ya ntikanyeletsa;

ee, ya ntikanyeletsa;

mo ineng la ga Jehofa

ke tlaa e pomaganya.

₁₂Ya ntikanyeletsa

jaaka dintshi tsa dinotshe;

e timilwe jaaka molelo wa mitlwa;

mo ineng la ga Jehofa

ke tlaa e pomaganya.

₁₃O ne wa nkhutla thata

gore ke we;

mme Jehofa a nthusa.

₁₄Jehofa ke thata ya me le kopelo;

mme o diregile poloka ya me.

₁₅Lentswe la tuduetso le la poloko

le mo megopeng ya basiami:

“Seatla se segolo sa ga Jehofa

se dira ka bonatla.

₁₆Seatla se segolo sa ga Jehofa

se goletsegile; seatla se segolo

sa ga Jehofa se dira ka bonatla.”

₁₇Ga nketla ke swa, ke tlaa tshela,

ke ba ke bolela ditiro tsa ga Jehofa.

₁₈Jehofa o nkwatlhaile mo go

botlhoko;

mme ga a a nneela losong.

₁₉Mpulela dikgoro tsa tshiamo;

ke tlaa tsena ka tsone,

ke tlaa ntshetsa Jehofa malebogo.

₂₀Kgoro e, ke ya ga Jehofa;

basiami ba tlaa tsena ka yone.

₂₁Ke tlaa go ntshetsa malebogo,

ka gobo o nkarabile,

o bile o diregile poloka ya me.

₂₂Lentswe le baagi ba le ganneng,

le diregile tlhogo ya kgokgotšho.

₂₃Mo, ke mo go dirilweng ke Jehofa;

go a gakgamatsa mo matlhong a

rona.

₂₄Le, ke letsatsi

le Jehofa o le dirileng;

re tlaa itumela,

re ipela mo go lone.

₂₅Boloka jaanong Jehofa,

re a go rapela;

Jehofa, re a go rapela,

tlisa letlhogonolo jaanong.

₂₆Go sego yo o tlang

mo ineng la ga Jehofa;

re lo segofaditse

re le mo ntlong ya ga Jehofa.

₂₇Jehofa ke Modimo,

mme o re neile lesedi;

bofang setlhabelo ka dikgole,

lo se bofelele le mo go tse e leng

dinaka tsa sebeso.

₂₈Wena o Modimo wa me,

ke tlaa go ntshetsa malebogo;

o Modimo wa me

ke tlaa go goletsa.

₂₉A ko lo ntshetse Jehofa malebogo,

gonne o molemo;

boutlwelobotlhoko jwa gagwe

bo eme ka bosakhutleng.