Pesalema 123

₁Ke tsholeletsa matlho a me

kwa go wena,

wena yo o dutseng mo magodimong.

₂Bonang, jaaka matlho a batlhanka

a tle a lebe seatla sa mong wa bone;

jaaka matlho a lelata a tle a lebe

seatla sa mohumagadi wa lone;

jalo matlho a rona

a leba Jehofa Modimo wa rona,

a ba a tle a re utlwele botlhoko.

₃Re utlwele botlhoko, Jehofa,

re utlwele botlhoko;

gonne re tladitswe lonyatso

mo go feteletseng.

₄Mowa wa rona

o tladitswe mo go feteletseng

ka lesotlo la ba ba iketlileng fela,

le ka lonyatso

lwa ba ba pelompe fela.