Pesalema 135

₁Bakang Jehofa;

lo bakeng leina la ga Jehofa;

lo mmakeng lona batlhanka

ba ga Jehofa;

₂lona ba lo emang mo ntlong

ya Jehofa, mo malwapeng

a ntlo ya Modimo wa rona.

₃Lo bakeng Jehofa;

gonne Jehofa o molemo;

opelelang leina la gagwe dipako;

gonne go monate.

₄Gonne Jehofa o ikgethetse Jakobe

go nna wa gagwe ka sebele,

le Iseraele go nna khumo

ya gagwe e e tlhophegileng.

₅Gonne ke a itse

fa Jehofa a le mogolo,

le go re Jehofa wa rona

o godimo ga medimo yotlhe.

₆Sengwe le sengwe se Jehofa

o se ratileng o dirile sone fela,

kwa legodimong le mo lefatsheng,

mo mawatleng le mo mafelong

a a boteng otlhe fela.

₇O tle a tlhatlose mouwane

kwa dikhutlong tsa lefatshe;

a direle pula dikgadima;

a ntshe phefo mo dibolokelong

tsa gagwe.

₈Ke yo o na a itaya

matsalwapele a Egepeto,

a motho le a kgomo.

₉O ne a baya ditshupo

le dikgakgamatso

mo gare ga gago Egepeto,

mo go Faro, le mo batlhankeng

ba gagwe botlhe fela.

₁₀Yo o ne a itaya merafe e le mentsi,

a bolaya dikgosi tse di thata:

₁₁Sihone kgosi ya Baamore,

le Oge kgosi ya Bašane,

le magosi otlhe a Kanana;

₁₂a aba lefatshe la bone

go nna boswa,

boswa jwa ga Iseraele,

tšhaba ya gagwe.

₁₃Leina la gago, Jehofa,

le eme ka bosakhutleng;

segopodiso sa gago, Jehofa, se ntse

mo tshikatshikeng tsotlhe fela.

₁₄Gonne Jehofa o tlaa atlhola batho

ba gagwe,

mme o tlaa ikwatlhaya ka ga

batlhanka ba gagwe.

₁₅Medimo ya disetwa ya merafe

ke selefera le gouta,

tiro ya diatla tsa batho.

₁₆E na le melomo, mme ga e bue;

e na le matlho, mme ga e bone;

₁₇e na le ditsebe, mme ga e utlwe;

mme le gone ga go na mowa

mo melomong ya yone.

₁₈Ba ba e dirang

ba tlaa tshwana nayo fela;

ee, mongwe le mongwe

yo o e ikanyang.

₁₉Lona ba ntlo ya ga Iseraele,

bakang Jehofa;

lona ba ntlo ya ga Arone,

bakang Jehofa;

₂₀lona ba ntlo ya ga Lefi,

bakang Jehofa;

lona ba lo boifang Jehofa,

lo bakeng Jehofa.

₂₁A go bakwe Jehofa mo Sione,

yo o agileng kwa Jerusalema.

Bakang Jehofa.