Pesalema 149

₁Bakang Jehofa.

Opelelang Jehofa sefela

se seša, le pako ya gagwe

mo phuthegong ya baitshepi.

₂A Iseraele a itumele

mo go ene yo o mo dirileng;

bana ba Sione ba ipele

mo kgosing ya bone.

₃A ba bake leina la gagwe

ka go bina;

a ba mo opelele dipako

ka moropana le harepe.

₄Gonne Jehofa o na le kgatlhego

mo bathong ba gagwe;

o tlaa kgabisa

ba ba pelonomi ka poloko.

₅A baitshepi ba kgane ka boitumelo

mo kgalalelong;

a ba opele ka boitumelo

ba le mo malaong a bone.

₆A dipako tse dikgolo tsa Modimo

di nne mo molomong wa bone

le tšhaka e e magale mabedi

e nne mo diatleng tsa bone:

₇Go dirafatsa pusoloso mo merafeng,

le dipetso mo ditšhabeng;

₈go golega dikgosi tsa tsone

ka diketane, le barena ba tsone

ka dikgolego tsa tshipi;

₉go dirafatsa mo go bone

katlholo e e kwadilweng;

tlotlo e, baitshepi botlhe ba gagwe

ba na nayo.

Bakang Jehofa.