Thapelo ya go dibelwa mo go ba ba gatelelang
Morapelo wa ga Dafite.
1Utlwa e e leng tshiamo Jehofa,
o tlhokomele go goa ga me;
tsebe o e beele morapelo wa me
o o sa tsweng mo dipounameng
tse di ipatang.
2Go atlholwa ga me a go tswe
mo go wena;
matlho a gago a lebe ka tekatekanyo.
3O hukuditse pelo ya me;
o ntekotse bosigo;
o ntekile, mme ga o a fitlhela sepe;
ke ikaeletse go re molomo wa me
ga o ketla o tlola.
4Ka ga ditiro tsa batho,
ke ithibile mo ditseleng
tsa bathubaki
ka lefoko la dipounama tsa gago.
5Dikgato tsa me di tshwere
ditselana tsa gago ka thata,
dinao tsa me ga di a relela.
6Ke bileditse koo go wena,
gonne o tlaa nkaraba Modimo;
sekegela tsebe ya gago kwa go nna,
o utlwe puo ya me.
7Supa bopelonomi jwa gago jwa
lorato jo bo tseanyang
wena yo o dibelang
ba ba go ikanyang,
o ba dibele ka letsogo la gago
le legolo
mo go ba ba ba tsogologelang.
8Mpoloka jaaka thaka ya leitlho,
o mphitlhe mo moriting
wa diphuka tsa gago.
9O ntshubele baikepi ba ba
nthopang, baba ba me
ba ba bolayang ba ba ntikileng.
10Ba apesitswe ke mahura a bone;
ba bua ka boikgogomoso
ka melomo ya bone.
11Ba re dikile jaanong
mo dikgatong tsa rona;
ba tlhoma matlho a bone
gore ba re digele fa fatshe.
12O ntse jaaka tau e e bogagaru
mo go se e se bolaileng,
le jaaka ekete ledumedi le le lalelang
mo mafelong a boiphitlho.
13Tloga o eme Jehofa,
o mo kgatlhantshe, o mo dige;
golola mowa wa me mo baikeping
ka tšhaka ya gago;
14mo banneng, ka seatla sa gago,
Jehofa, mo banneng ba lefatshe
ba kabelo ya bone e leng
mo botshelong jono,
le ba o ba kgorisang mpa
ka khumo ya gago;
ba itumedisiwa ke go tshola bana,
mme letlotlo le le setseng
ba le tlogelele banyana ba bone
ba bannye.
15Ka ga me, ke tlaa leba sefatlhogo
sa gago mo tshiamong;
ke tlaa itumedisiwa ke tshwano
ya gago mogang ke tsogang.
