Kgalaletso ya kgololo
Pesalema ya ga Dafite. Ya moopedi yo mogolo.
1Ke ne ka lebelela Jehofa
ka pelotelele;
a itshekegela kwa go nna,
a utlwa go gowa ga me.
2Le gone a ntlhatlosa
mo mokoleng o o boitshegang,
le mo seretseng se se maragaraga;
a tlhoma dinao tsa me mo lefikeng,
a ba a tlhomamisa
ditsamao tsa me.
3O tsentse sefela se seša
mo molomong wa me,
e bong pako ya Modimo wa rona;
batho bantsi ba tlaa go bona,
ba boifa,
mme ba tlaa ikanya Jehofa.
4Go sego monna yo o kgantshang
Jehofa; mme a sa tlhokomele
ba ba ikgodisang,
le fa e le ba ba fapogelang
kwa maakeng.
5Jehofa Modimo wa me,
di dintsi ditiro tsa gago
tse di gakgamatsang,
tse o di dirileng,
le megopolo ya gago
e e kwano go rona;
ga o ka ke wa di rulaganyediwa;
fa ke rata go di bolela,
le go bua ka ga tsone,
di feta mo go ka balwang.
6Ga o na kgatlhego mo setlhabelong
le mo tshupelong;
ditsebe tsa me o di kabolotse;
tshupelo e e fisiwang,
le tshupelelo ya boleo
ga o a ka wa di lopa.
7Foo ka re: “Bona ke tsile;
mo momenaganong wa lokwalo
go kwadilwe ka ga me ga twe:
8Ke itumela thata
go dira go rata ga gago,
Modimo wa me;
ee, molao wa gago
o mo teng ga pelo ya me.”
9Ke boletse tshiamo
mo phuthegong e kgolo;
bona, ga nketla ke thiba dipounama
tsa me, Jehofa, o a itse.
10Ga ke a fitlha tshiamo ya gago
mo teng ga pelo ya me;
ke boletse boikanngo jwa gago
le poloka ya gago;
ga ke a lobela phuthego e kgolo
bopelonomi jwa gago jwa lorato
le boammaaruri jwa gago.
11O se ka wa ntlhokisa
mapelonamagadi a gago Jehofa;
a bopelonomi jwa gago jwa lorato
le boammaaruri jwa gago
bo ntlamele ka gale le gale.
12Gonne masula a a se nang palo
a ntsentse gare;
maikepo a me a tsile go ntshwara,
ke bile ke retelelwa ke go lelala;
a mantsi bogolo go feta palo
ya meriri ya tlhogo ya me,
mme pelo ya me a mpheletse.
Thapelo ya go kopa thuso
13A go go kgatlhe Jehofa go nkgolola;
tswee, o itlhaganele go nthusa
Jehofa.
14Ba ba tsomang mowa wa me
go o senya
a ba tlhajwe ke ditlhong
ba tseanngwe mmogo;
ba ba itumelang thata
ka go utlwa botlhoko ga me
a ba busediwe kwa morago,
ba tlhokisiwe tlotlo.
15Ba ba nthayang ba re: “Ahe! Ahe!”
A ba swafale ka ntlha ya
go tlhabisiwa ditlhong ga bone.
16A botlhe ba ba go batlang
ba itumele,
ba ipele mo go wena;
a ba ba ratang poloka ya gago
ba bue ka go tlhoka go khutla ba re:
“A Jehofa a godisiwe.”
17Nna ke lehuma, ke a tlhoka;
le fa go ntse jalo, Morena o a
nkgopola; wena o thuso ya me,
le mogolodi wa me;
o se ka wa diega, Modimo wa me.
