Pesalema 44

₁Modimo, re ikutlwetse

ka ditsebe tsa rona,

borraarona ba re boleletse,

tiro e o kileng wa e dira

mo metlheng ya bone,

mo metlheng ya bogologolo.

₂Wa nna wa leleka merafe

ka seatla sa gago,

mme wa tlhoma bone;

wa patika ditšhaba,

wa di phatlalatsa.

₃Gonne ga ba a ka ba tsaya lefatshe

go le rua ka tšhaka ya bone,

le gone letsogo la bone

ga le a ka la ba boloka;

fa e se ka seatla sa gago se segolo,

le letsogo la gago,

le lesedi la sefatlhogo sa gago,

ka gobo o le ntlheng ya bone.

₄Wena Modimo, o Kgosi ya me;

laolela Jakobe kgololo.

₅Re tlaa diga baba ba rona ka wena;

ba ba re tsogologelang

re tlaa ba gataka ka leina la gago.

₆Gonne ga nketla ke ikanya bora

jwa me; tšhaka ya me le yone

ga e ketla e mpoloka.

₇Wena o re bolokile

mo babeng ba rona,

le ba ba re ilang

o ba tlhabisitse ditlhong.

₈Re tlhotse re kgana ka Modimo

letsatsi lotlhe; leina la gago

re tlaa le ntshetsa malebogo

ka bosenabokhutlo. Sela.

₉Jaana o re latlhile, o re tlotlolotse;

ga o bolole le dintwa tsa rona.

₁₀O re buseditse kwa morago

ra tshaba mmaba; mme ba ba re ilang

ba ikgapela ka go rata.

₁₁O re abile jaaka dinku

tse di tlhaoletsweng go jewa,

o re gasagasitse mo merafeng.

₁₂O rekisa batho ba gago ka lefela,

mme ga o a oketsa khumo ya gago

ka tlhwatlhwa ya bone.

₁₃O re dira kgobo mo go bankarona,

tshotlo le setshego

mo go ba ba mo tikologong ya rona.

₁₄O re tlhabile seane mo merafeng,

le thukhutho tlhogo mo ditšhabeng.

₁₅Go tlotlologa ga me go fa pele

ga me ka letsatsi lotlhe,

ke bipilwe ke ditlhong

tsa sefatlhogo sa me.

₁₆Ka ntlha ya lentswe la yo o kgobang

le yo o tlhapatsang;

le ka ntlha ya mmaba le mmusolosi.

₁₇Gotlhe mo go re wetse;

le fa go ntse jalo ga re a go lebala,

le gone ga re a dira ka tsietso

mo kgolaganong ya gago.

₁₈Pelo ya rona ga e a boela kwa

morago le gone dikgato tsa rona

ga di a theoga mo tseleng ya gago;

₁₉le fa o re thubaganyeditse

mo mannong a bophokoje,

o re khurumeditse

ka moriti wa loso.

₂₀A e re fa re kile ra lebala

leina la Modimo wa rona,

kgotsa ra otlololela

modimo o sele mabogo a rona;

₂₁a goo mo, Modimo

a ga o ketla o go tlhotlhomisa?

Ka one o itse maoma a pelo.

₂₂Ee, re tlhola re bolawa

ka ntlha ya gago ka letsatsi lotlhe;

re kaiwa jaaka dinku tsa go tlhajwa.

₂₃Morena tsoga! O robaletseng?

Tloga o eme,

se re latlhele ruri ka bosakhutleng.

₂₄O fitlhelang sefatlhogo sa gago,

wa lebala go patikwa ga rona

le go bolawa ga rona jaana?

₂₅Gonne mowa wa rona o obegetse

mo loroleng;

mpa ya rona e ngaparetse mmu.

₂₆Tsogela go re thusa,

mme o re rekolole

ka ntlha ya bopelonomi jwa gago

jwa lorato.