Pesalema 5

₁Tlhwaela mafoko a me tsebe

Jehofa, o gopole go akanya ga me.

₂Reetsa lentswe la go goa ga me,

Kgosi ya me, le Modimo wa me;

gonne ke rapela wena.

₃Jehofa, o tlaa utlwa lentswe la me

go sa le ka moso;

e tlaa re go sa le ka moso,

ke tlaa rulaganyetsa morapelo wa me

kwa go wena, mme ke tlaa lebelela.

₄Gonne ga o Modimo o o nang

le go kgatlhwa ke boikepo;

bosula ga bo ketla bo tlhola le wena.

₅Baitelaganyi ga ba ketla ba ema

mo ponong ya gago;

o ila badiri botlhe ba boikepo.

₆O tlaa senya ba ba buang maaka.

Jehofa o fedisiwa pelo fela ke monna

yo o gakaletseng polao,

le wa tsietso.

₇Fa e le ka ga me,

ke tlaa tsena mo ntlong ya gago

ka bontsi jwa mapelonomi a gago

a lorato;

le mo poifong ya gago

ke tlaa obama

ke lebile kwa tempeleng

ya gago e e boitshepo.

₈Nkgoga Jehofa mo tshiamong

ya gago ka ntlha ya baba ba me;

dira tsela ya gago

gore e bonale sentle

fa pele ga sefatlhogo sa me.

₉Gonne ga go na boikanngo

mo melomong ya bone;

boteng jwa bone ke boikepo ka bosi;

memetso ya bone ke phupu

e e atlhameng;

ba rethefatsa diteme tsa bone.

₁₀Ba kaye molato, Modimo;

a ba we ka dikgakololo

tse e leng tsa bone;

o ba kgoromeletse kwa ntle

ka bontsi jwa ditlolo tsa bone;

gonne ba go tsuololetse.

₁₁A botlhe ba ba go ikanyang

ba itumele,

ba duduetse ka boitumelo

ka gale, ka o ba femetse;

a le bone ba ba ratang leina la gago

ba ipele mo go wena.

₁₂Gone o tlaa segofatsa mosiami:

Jehofa, o tlaa mo dikanyeletsa

ka letlhogonolo

jaaka ka thebe.