Pesalema 51

₁Nkutlwela botlhoko Modimo,

ka fa bopelonoming jwa gago

jwa lorato, ka fa bontsing

jwa mautlwelobotlhoko a gago,

o phimole ditlolo tsa me.

₂Ntlhapisetsa ruri mo boikepong

jwa me,

o nntlafatse mo boleong jwa me.

₃Gonne ke ipolela ditlolo tsa me,

le boleo jwa me bo ntutse pele

ka gale.

₄Ke wena, wena wesi

yo ke go leofetseng,

ka dira se se bosula

mo ponong ya gago,

gore o tle o bonwe o le tshiamo

mogang o buang,

o bo o nne phepa

mogang o atlholang.

₅Bona,

ke ne ka bopegela mo boikepong;

mmé mmè a nkamogelela

mo boleong.

₆Bona, o eletsa boammaaruri

mo ditennyeng;

le mo bokaeng jo bo fitlhegileng

o tlaa nkitsise botlhale.

₇Ntshekisa ka mosiama,

mme ke tlaa itsheka; ntlhapisa,

mme ke tlaa nna mosweu

bogolo go kapoko.

₈Nkutlwisa boitumelo le boipelo;

gore marapo a o a robileng

a tle a itumele.

₉Subela dibe tsa me sefatlhogo

sa gago; o bo o phimole

maikepo a me otlhe fela.

₁₀Modimo, bopa pelo e e itshekileng

mo go nna;

o bo o šafatse mowa o o siameng

mo teng ga me.

₁₁O se ka wa ntatlha,

wa ntlosa fa pele ga gago;

le mowa wa gago o o boitshepo

o se o tlose mo go nna.

₁₂Nthebolela boitumelo jwa poloka

ya gago;

o ntshegetse ka mowa

o o phuthologileng.

₁₃Foo ke tlaa ruta batlodi

ditsela tsa gago;

le baleofi

ba tlaa sokologela kwa go wena.

₁₄Nkgolola mo molatong

wa go tsholola madi Modimo,

wena Modimo wa poloko ya me;

loleme lwa me lo tlaa opelela godimo

ka ga tshiamo ya gago.

₁₅Jehofa, bula dipounama tsa me;

mme molomo wa me

o tlaa bolela pako ya gago.

₁₆Gonne ga o natefelwe ke setlhabelo;

nkabo ke se ntsha;

ga o na kgatlhego

mo tshupelong e e fisiwang.

₁₇Ditlhabelo tsa Modimo

ke mowa o o phatlogileng;

pelo e e phatlogileng,

e e ngomogileng

ga o ketla o e nyatsa Modimo.

₁₈Direla Sione molemo

ka fa natefelong ya gago;

aga dithako tsa Jerusalema.

₁₉Ke gone o tlaa natefelwang

ke ditlhabelo tsa tshiamo,

le ke tshupelo e e fisiwang,

le tshupelo e e fisiwang

e le mmogo; ke gone

ba tlaa isang dikgomo ditlhabelo

mo sebesong sa gago.