Pesalema 61

₁Utlwa go goa ga me, Modimo;

ela morapelo wa me tlhoko.

₂Ke tlaa tlhaeleletsa koo go wena

ke le kwa bokhutlong jwa lefatshe,

mogang pelo ya me

e phikanngwang ke bohutsana,

nkgogela kwa lefikeng

le le godimo bogolo go nna.

₃Gonne o ntse o le botshabelo

jwa me, kago e e thata

ya phemelo fa go tshajwa mmaba.

₄Ke tlaa aga mo motlaaganeng

wa gago ka bosakhutleng;

ke tlaa tshebela mo sekhukhung

sa diphuka tsa gago. Sela.

₅Gonne wena Modimo,

o utlwile maikano a me;

o nneile go tlhakanela boswa

le ba ba boifang leina la gago.

₆O tlaa lelefatsa botshelo jwa kgosi;

dinyaga tsa yone di tlaa nna jaaka

ekete ke tsa ditshika di le dintsi.

₇E tlaa nna fa pele ga Modimo

ka bosakhutleng; a ko o etleetse

bopelonomi jwa lorato,

gore bo e boloke, le boammaaruri.

₈Jalo ke tlaa opelela leina la gago

dipako ka bosakhutleng,

gore ke nne ke diratse maikano a me

ka malatsi otlhe.