Pesalema 73

₁Ruri Modimo o molemo

go Iseraele, e bong

go ba ba itshekileng mo pelong.

₂Ka ga me,

dinao tsa me di batlile go ya,

dikgato tsa me tsa batla go relela.

₃Gonne e rile ke bona

letlhogonolo la baitelaganyi

ka nna pelotshetlha

ka ga bone baikepi.

₄Gonne ga go na dipitlagano

mo losong lwa bone;

mme thata ya bone e nitame fela.

₅Ga ba mo tlalelong

jaaka batho ba bangwe;

le gone ga ba tshwenyege

jaaka batho ba bangwe.

₆Ke gone ka mo

boikgodiso bo ba rarileng

jaaka dibaga mo thamong;

go thubaka go ba apesitse

jaaka kobo.

₇Matlho a bone

a rotologile ka monono;

ba na le mo go fetang

keletso ya pelo.

₈Ba a sotla mme ba bue patiko

ba le mo bosuleng;

ba bue ka boikgantsho.

₉Ba nyunyubetsa magodimo;

loleme lwa bone lo ralale lefatshe.

₁₀Ke gone ka moo batho ba ga gabo

ba tleng ba boele fa;

mme metsi a senwelo se se tletseng

a gopiwe ke bone.

₁₁Mme ba re:

“Modimo o itse jang?

A go na le kitso

mo go Mogodimodimo?”

₁₂Bona, bao ke bone baikepi;

e re ka ba ntse ba le mo boiketlong

ka metlha yotlhe,

boo ba totelwa ke dikhumo.

₁₃Ruri ke ntlafaleditse pelo ya me

lefela,

ka ba ka tlhapa diatla tsa me

mo go se nang molato;

₁₄gonne ke ntse ke tshwenyega

ka letsatsi lotlhe,

ka otlhaiwa ka meso yotlhe.

₁₅Fa nkabo ke rile:

“Ke tlaa bua jalo;”

bona, nka bo ke diretse bana ba

losika lwa gago ka boferefere.

₁₆E rile ke akanya gore

goo mo nka go itse jang,

ga nna tapiso e e botlhoko

mo go nna;

₁₇ka tla ka tsamaya ka tsena

mo felong ga boitshepo ga Modimo,

mme ka akanya bofelelo

jwa bone.

₁₈Ruri o ba baya mo mareleding;

o ba digela mo tshenyegong.

₁₉Ana ba kile ba senyega jang

ka ponyo ya leitlho fela!

Ba jegetse ruri ka ditherego.

₂₀Jaaka toro fa motho a kubuga;

le wena Morena, fa o kubuga,

o tlaa nyatsa setshwano sa bone jalo.

₂₁Gonne pelo ya me

e ne e le botlhoko,

mme ka tlhajwatlhajwa

mo diphilong tsa me;

₂₂ka bo ke le popego ya sefolofolo fela

mo go ntseng jaana, ke se na kitso;

ka nna jaaka phologolo fela

fa pele ga gago.

₂₃Le fa go ntse jalo

ke ntse ke na nao ka metlha yotlhe;

o ntse o tshwere seatla sa me

se segolo.

₂₄O tlaa nketelela pele

ka kgakololo ya gago,

morago o tlaa nkamogela

mo kgalalelong.

₂₅Ke na le mang kwa legodimong

fa e se wena?

Le mo lefatsheng ga go na ope

yo ke mo eletsang fa e se wena.

₂₆Nama ya me e a fela, le pelo ya me;

Modimo ke thata ya pelo ya me,

le kabelo ya me ka bosakhutleng.

₂₇Gonne, bona ba ba leng kgakala nao

ba tlaa nyelela;

o sentse botlhe ba ba go tlogelang

ba ya boakeng.

₂₈Mo go nna go molemo

go atamela Modimo;

ke dirile Morena Modimo

botshabelo jwa me,

gore ke tle ke bolele

ka ga ditiro tsa gago

tsotlhe fela.