Go hutsafalela tshenyego ya Jerusalema
Pesalema ya ga Asafe.
1Ao Modimo, ba ditšhaba
ba tsile mo bosweng jwa gago;
ba tsentse tempele ya gago
e e itshepileng leswe; ba beile
Jerusalema diphikwephikwe fela.
2Ditoto tsa batlhanka ba gago
ba di dirile dijo
tsa dinonyane tsa loapi;
nama ya baitshepi ba gago
ba e neile dibatana tsa lefatshe.
3Madi a bone ba a tsholotse
jaaka metsi mo ntlheng tsotlhe
tsa Jerusalema;
mme go ne go se na ope
yo o ba fitlhang.
4Re ntse sekgobo fela
mo go bagarona;
re lesotlo le setshego mo go
ba ba ntlheng tsotlhe tsa rona.
5E tlaa nna lobaka lo lo kaye, Jehofa?
A o tlaa nna bogale
ka bosakhutleng?
A lefufa la gago le tlaa nna le tuka
jaaka molelo fela?
6Gorometsa bogale jo bogolo
jwa gago mo go baditšhaba
ba ba sa go itseng, le mo magosing
a a sa bitseng leina la gago.
7Gonne ba jele ba laila Jakobe,
ba bile ba beile boago jwa gagwe
kgakgabalo fela.
8O se ka wa gakologelwa maikepo
a borraetsho ba bogologolo
go re sekisa ka one;
a mapelonomi a gago a manana
a re tlele pele ka bonako;
gonne re ile kwa tlase thata.
9Re thuse Modimo wa poloko
ya rona ka ntlha ya kgalalelo
ya leina la gago, o re golole;
tlhatswa o tlose dibe tsa rona,
ka ntlha ya leina la gago.
10Ana baditšhaba
ba tlaa bo ba buelang ba re:
“Modimo wa bone o kae?”
A tefiso ya madi a a tsholotsweng
a batlhanka ba gago e itsiwe mo go
baditšhaba, mo ponong ya rona.
11A go fegelwa ga mogolegwi
go fitlhe koo fa pele ga gago;
ka fa bogolong jwa thata ya gago
a ko o boloke
ba ba laoletsweng go swa;
12ba re bapileng nabo
o ba neye mo dihubeng tsa bone
gasupa, kgobo ya bone
e ba go kgobileng ka yone, Morena.
13Jalo rona batho ba re leng ba gago,
re leng dinku tsa bofulo jwa gago,
re tlaa go ntshetsa malebogo
ka bosenabokhutlo;
pako ya gago re tlaa e bonaletsa pele
mo tshikatshikeng tsotlhe.
