RUTHE 4

₁Boase a ya kgotleng a dula gone. Mme bonang, monna wa losika yo o gaufi, yo Boase o ne a buile ka ga gagwe, a tla gone. A mo raya a re: “He, wena semangmang, fapoga, o tle go dula fa.” A fapoga, a dula. ₂A tsaya banna ba le some ba bagolwane ba motse a re: “Dulang fa”; mme ba dula. ₃A raya monna wa losika yo o gaufi ka go tsalwa a re: “Naomi, yo o bileng a tsile a tswa kwa lefatsheng la Moabe, o rekisa sebata sa lefatshe se e neng e le sa ngwanaa rra rona Elimeleke. ₄Ke gopotse go go loma tsebe ke re: A ko o se reke fa pele ga bone ba ba dutseng fa, le fa pele ga bagolwane ba batho ba gaetsho. Fa o rata go se rekolola o se rekolole; fa o gana go se rekolola, foo o mpolelele, gore ke tle ke itse; gonne ga go na ope yo o ka se rekololang kwa ntle ga gago; nna ke tla morago ga gago.” Mme a re: “Ke tla se rekolola.”

₅Foo Boase a re: “Tsatsing le o rekang lotlhagare mo seatleng sa ga Naomi, o na le go se reka le mo go Ruthe wa Momoabe, mosadi wa moswi, go tsosa leina la moswi mo bosweng jwa gagwe.”

₆Monna wa losika yo o gaufi, a re: “Ga nkake ka se ithekololela, nka tla ka senya jo e leng boswa jwa me; o itseele tshiamo ya me ya go rekolola; gonne nna ga nkake ka se rekolola.”

₇Gale mo Iseraele, mokgwa wa go rekolola le wa go ananya, go tlhomamisa dilo tsotlhe, e ne e le o: Motho o ne a tle a role setlhako, mme a se neye wa ga gabo; e ne e le one mokgwa wa go tlhomamisa mo Israele.

₈Monna wa losika yo o gaufi a raya Boase, a re: “A ko o se ithekele.” Mme a rola setlhako. ₉Boase a raya bagolwane, le batho botlhe, a re: “Lo basupi gompieno, fa ke rekile gotlhe mo e neng e le ga Elimeleke, le gotlhe mo e ne e le ga Kilione, le ga Mahelone, mo seatleng sa ga Naomi. ₁₀Gape Ruthe wa Momoabe, mosadi wa ga Mahelone, ke mo rekile gore a tle a nne mosadi wa me, go tsosa leina la moswi mo bosweng jwa gagwe, gore leina la moswi le se ka la kgaolwa la tswa mo baneng ba ga rraagwe, le mo kgotleng ya felo ga gagwe; lo basupi gompieno.”

₁₁Batho botlhe ba ba mo kgotleng le bagolwane botlhe ba re: “Re basupi, mosadi yo o tsileng mo ntlong ya gago, a Jehofa a mo dire jaaka Ragele le jaaka Lea, ba e leng bone ba agileng ntlo ya Iseraele ka bobedi jwa bone; o dire mo go tshwanetseng mo Eferatha, o bo o nne motho yo o itsegeng mo Bethelehema. ₁₂A ntlo ya gago e tshwane le ntlo ya ga Perese yo Tamare o ne a mmona le Juta, wa losika lo Jehofa o tlaa lo go nayang ka morweetsana yo.”

₁₃Jalo Boase a tsaya Ruthe a nna mosadi wa gagwe, mme a tsena kwa go ene; Jehofa a mo naya boimana, a bona ngwana wa mosimane. ₁₄Basadi ba raya Naomi ba re: “A go bakweng Jehofa, yo o sa go tlogelang gompieno o se na monna wa losika yo o gaufi ka go tsalwa, a leina la gagwe le itsege mo Iseraele. ₁₅O tlaa nna mo go wena morudisi wa botshelo, le mootli wa botsofe jwa gago; gonne ngwetsi wa gago, yo o go ratang, yo o molemo mo go wena bogolo go bana ba basimane basupa, o mmelege.” ₁₆Naomi a tsaya ngwana, a mmaya mo sehubeng sa gagwe, a nna mmelegi wa gagwe.

₁₇Basadi ba ga gabo ba mo raya leina ba re: “Naomi o tsaletswe ngwana wa mosimane”; ba mo raya leina ba re, Obete; ke ene rraagwe Jese rraagwe Dafite.

₁₈Tse ke dikokomana tsa ga Perese: ₁₉Perese a tsala Heserone; Heserone a tsala Rame, Rame a tsala Aminatabe; ₂₀Aminatabe a tsala Našone, Našone a tsala Salemone; ₂₁Salemone a tsala Boase, Boase a tsala Obete; ₂₂Obete a tsala Jese, mme Jese a tsala Dafite.