SEFELA SA DIFELA 5

₁Ke tsile mo tshimong ya me,

kgaitsadiaka, mogatsaka;

ke phuthile mera ya me

le senkgisa monate sa me;

ke jele lomepe lwa me

le dinotshe tsa me;

ke nole bojalwa jwa me jwa mafine,

le maši.

Jang, ditsala;

nwa, ee, nwa ka botlalo,

wena moratwa.

₂Ke ne ke robetse,

mme pelo ya me ya thanya;

ka re, ke lentswe la moratwa wa me;

yo o kgwanyakgwanyang, a re:

“Mpulela, kgaitsadiaka,

moratwa wa me,

letseba la me, moitekanedi wa me;

gonne tlhogo ya me e tletse monyo,

le makaodi a me

ka marothodi a bosigo.”

₃Ke apotse hempe,

ke tlaa e apara jang?

Ke itlhapisitse dinao;

ke tlaa di leswefatsa jang?

₄Moratwa wa me a tsenya letsogo

la gagwe ka letshofa la setswalo,

mme pelo ya me ya tseega

ka ga gagwe.

₅Ka nanoga

ka ya go bulela moratwa wa me,

mme diatla tsa me

tsa bo di rotha mera,

le menwana ya me

e rotha mera e e metsi,

ya rothela mo matshwarong

a sepakelo.

₆Ka bulela moratwa wa me;

mme moratwa wa me a bo

a ngongwaetse, a tsamaile.

O rile a bua,

mowa wa me wa nyera; ka mmatla,

mme ka se ka ka mmona;

ka mmitsa, mme a se ka a nkaraba.

₇Balebedi ba ba tsamayatsamayang

mo motseng

ba mphitlhela, ba mpetsa,

ba nntsha dintho,

badisa ba dithako ba ntseela kobo.

₈Ke a lo ikanisa,

lona bomorwadia Jerusalema,

fa lo bona moratwa wa me,

ka re, lo mmolelele fa ke le botlhoko

ka lorato.

₉Ana moratwa wa gago e mang

bogolo go moratwa yo mongwe?

Wena yo o leng montlentle bogolo

mo basading,

ana moratwa wa gago e mang

bogolo go moratwa yo mongwe,

fa e bo ne ne fano

o re ikanisa jaana?

₁₀Moratwa wa me o mosweu

le bohibidu,

ke yo o itsegeng bogolo

mo go ba ba makgolo a lekgolo.

₁₁Tlhogo ya gagwe e ntse jaaka gouta

e e itshekileng bogolo,

makaodi a gagwe a tshophegile,

a mantsho jaaka lehukubu.

₁₂Matlho a gagwe

a ntse jaaka matseba

fa melapong ya metsi;

a tlhapisitswe ka maši;

a tlhomilwe sentle.

₁₃Marama a gagwe

a ntse jaaka temana ya ditlhatshana

tsa dinkgisa monate,

jaaka dimota tsa merogo

e e nkgang monate;

dipounama tsa gagwe

di ntse jaaka masoma,

di rotha mera e e metsi.

₁₄Diatla tsa gagwe

di ntse jaaka mehitshana ya gouta

e e tsentsweng berule;

mmele wa gagwe

o ntse jaaka e kete o dirilwe

ka naka lwa tlou,

o manegilwe disafire.

₁₅Maoto a gagwe

a ntse jaaka maotwana

a a emeng metloutlo ya marebela,

tse di tlhomilweng mo ditlhakong

tsa gouta e e itshekileng;

ponalo ya gagwe

e ntse jaaka Lebanone,

e tlotlometse jaaka masetara.

₁₆Molomo wa gagwe o monate thata;

ee, o montle fela mo go fedileng.

Yo ke ene moratwa wa me,

yoo ke ene tsala ya me,

lona bomorwadia Jerusalema.