SEFELA SA DIFELA 6

₁Kana moratwa wa gago o ile kae,

wena yo o leng montlentle bogolo

mo basading?

Moratwi wa gago o menogetse kae

gore re tle re mo go batlise?

₂Moratwi wa me

o fologetse kwa tshimong ya gagwe,

kwa ditemaneng tsa dinkgisa

monate, o ile go ja mo masimong,

le go kgetla dithunya tsa masoma.

₃Ke wa gagwe moratwi wa me,

le moratwi wa me ke wa me;

o hudisa letsomane la gagwe

mo gare ga dithunya tsa masoma.

₄O montle, wena moratwa wa me,

jaaka Tiresa, o sebopego se sentle

jaaka Jerusalema, o a boitshega

jaaka ntwa e e tshotseng mekgele.

₅Thibosa matlho a gago mo go nna,

gonne a mphentse.

Moriri wa gago

o ntse jaaka letsomane la dipodi,

le le robetseng fa mohapheng wa

Gileate.

₆Meno a gago

a ntse jaaka letsomane la dinku

tse dinamagadi,

tse di tlhatlogileng mo tlhapisong;

tse nngwe le nngwe ya tsone

e nang le bana ba mafatlha,

le tse go se nang epe mo go tsone

e e swetsweng.

₇Dipupu tsa gago tsa matlho

di ntse jaaka kgapetla ya garanate

ka fa teng ga sesiro sa gago.

₈Go na le bahumagadi ba kgosi

ba le masome a marataro,

le bagadingwana

ba le masome a a ferang mebedi,

le barweetsana ba ba se nang palo.

₉Mme letseba la me,

moitekanedi wa me o mongwe fela;

ke ene esi wa ga mmaagwe;

ke ene yo o itshenketsweng

wa gagwe yo o mo tsetseng.

Bana ba basetsana ba ne ba mmona,

mme ba mmitsa mosegofadiwi;

ee, bahumagadi ba kgosi

le bagadingwana, ba mmona,

mme ba mmaka.

₁₀E mang ene yo o gadimang jaaka

moso, a le montle jaaka ngwedi,

a itshekile jaaka letsatsi,

a boitshega jaaka ntwa e e nang

le mekgele?

₁₁Ka fologela kwa tshimong

ya dithamane,

ka ya go bona ditlhatshana

tse ditala tsa molapo,

ka ya go bona,

go re a mofine o a kukunya,

le go re, a garanate

o ntshitse dithunya.

₁₂Ya re ke sa itse sepe

ka tshoga mowa wa me o mpaya

mo gare ga dikara tsa batho ba me

ba segosi.

₁₃Boa, boa, Mošulame we;

boa, boa gore re tle re go lebe.

Ana lo ratelang go leba Mošulame,

jaaka e ka bo e le pino

ya Mahanaime?