1 DITIRAFALO 23

₁E rile Dafita a se na go tsofala le go ja lefatshe a dira Salomo morwawe kgosi ya Iseraele.

₂A ba a phutha dikgosana tsotlhe tsa Iseraele le baperesiti le Balefi. ₃Mme Balefi ba balwa go simolola ka ba ba dinyaga di le 30 le bomogoloa-bone, mme palo ya bone ka fa ditlhogong tsa bone e le banna ba le 38 000. ₄Dafita a laela a re: “Ba le 24 000 ba bone ba na le go okamela tiro ya Ntlo ya Morena; ba le 6 000 e nne bakwaledi le baatlhodi; ₅ba le 4 000 e nne badisa ba dikgoro; ba le 4 000 ba bangwe e nne ba ba bakang Morena ka diletso tse ke di diretseng go baka ka tsona.”

₆Dafita a ba a ba kgaoganya ditlhopha ka fa ditshikeng tsa bomorwa Lefi Geresone le Kahathe le Merari.

₇Boora Geresone e ne e le Laetane le Simei. ₈Bomorwa Laetane e ne e le Jehiele, wa ntlha, le Sethame le Joele, ba bararo. ₉Bomorwa Simei e ne e le Selomothe le Hasiele le Harane, ba bararo; bao e le ditlhogo tsa dikgoro tsa losika lwa ga Laetane. ₁₀Bomorwa Simei e ne e le Jahathe le Sisa le Jeuse le Beria. Ke bone bomorwa Simei ba bane. ₁₁Jahathe e ne e le wa ntlha, Sisa e le wa bobedi; mme Jeuse le Beria ba ne ba se na bana ba bantsi; ka moo ba nna kgoro e le nngwe le setlhopha se le sengwe.

₁₂Bomorwa Kahathe e ne e le Amerame le Isehare le Heberone le Usiele, ba bane. ₁₃Bomorwa Amerame e ne e le Arone le Moše. Mme Arone a ntshiwa go tsenngwa tirelong ya Felo-ga-Boitshepo-jwa-Maitshepo, ene le bomorwawe ka bosakhutleng gore a fise maswalo fa pele ga Morena, a mo direle, a tshegofatse ka leina la gagwe ka bosakhutleng. ₁₄Fa e le Moše monna wa Modimo, bomorwawe ba ne ba balelwa mo lotsong lwa ga Lefi. ₁₅Bomorwa Moše e ne e le Geresome le Eliesere. ₁₆Morwa Geresome e ne e le Sebuele tlhogo ya losika. ₁₇Morwa Eliesere e ne e le Rehabja tlhogo ya losika, mme Eliesere a se na bomorwa ba bangwe, mme bomorwa Rehabja ba ne ba le bantsi thata.

₁₈Morwa Isehare e ne e le Selomithe tlhogo ya losika. ₁₉Bomorwa Heberone e ne e le Jeria, wa ntlha, le Amaria, wa bobedi, le Jahasiele, wa boraro, le Jekameame, wa bone. ₂₀Bomorwa Usiele e ne e le Miga, wa ntlha, le Isia, wa bobedi.

₂₁Bomorwa Merari e ne e le Magedi le Muši; bomorwa Magedi e le Eleasare le Khiše. ₂₂Mme Eleasare a swa a se na bomorwa fa e se bomorwadi fela, mme ba nyalwa ke bomorwa Khiše, rrangwanaabo. ₂₃Bomorwa Muši e ne e le Magedi le Etere le Jeremothe, ba bararo.

₂₄Ke bone bomorwa Lefi ka fa dikgorong tsa bone, e bong ditlhogo tsa dikgoro ka fa ba rulagantsweng ka teng ka fa ditlhogong tsa bone ba ba neng ba dira ditiro tsa tirelo kwa Ntlong ya Morena, go simolola ka ba ba dinyaga di le 20 le bomogoloa-bone.

₂₅Gonne Dafita o ne a re: “Morena, Modimo wa Iseraele, o file morafe wa gagwe boikhutso, o bile o agile mo Jerusalema ka bosakhutleng. ₂₆Le gona Balefi ga ba tlhole ba na le go sikara Taberenakele le dilwana tsotlhe tsa tirelo ya yona.” ₂₇Gonne ka fa mafokong a bofelo a ga Dafita bomorwa Lefi ba ne ba balwa go simolola ka ba ba dinyaga di le 20 le bomogoloa-bone. ₂₈Mme tiro ya bone ke go thusa bomorwa Arone tirelong ya Ntlo ya Morena, go okamela malapa le matlwana le go phepafatsa dilo tsotlhe tse di boitshepo le ditiro tse dingwe mo Ntlong ya Modimo ₂₉le go tlhokomela dinkgwe tsa tshupo le bupe jo bo setou jwa tshupelo ya dijo le dinkgwenyana tse dipapetla tse di sa bedisiwang le moritshana le tse di fagwang le dielo tsotlhe le ditekanyo tsotlhe ₃₀le go ema ka moso mongwe le mongwe go leboga le go baka Morena le maitsiboa fela jalo; ₃₁le go direla Morena ditlhabelo tsotlhe tsa phiso ka boSabata le ka malatsi a ngwedi o o rogilweng le ka meletlo ka fa palong ya tsona ka fa di tshwanetseng ka teng ka gale fa pele ga Morena. ₃₂Ba tshwanetse go tlhokomela ditiro mo Tenteng ya Boipontsho le ditiro mo Felong-ga-Boitshepo le ditiro tsa go thusa bomorwa Arone, ba ga bone ba le tirelong ya Ntlo ya Morena.