1 DIKGOSI 14

₁Ka sebaka seo ga lwala Abia morwa Jerobeame. ₂Mme Jerobeame a raya mosadi wa gagwe a re: “A ko o nanoge o ba itimetse gore go se ka ga lemoga ope, fa o le mosadi wa ga Jerobeame, o ye kwa Silo. Teng go na le moporofeti Ahia yo o buileng ka ga me a re, ke tla nna kgosi ya morafe o. ₃O ye o tshotse dinkgwe di le some le dikuku le nkgwana ya mafura a dinotshe, o ye jalo kwa go ene; o tla go itsise se se tla dirafalelang ngwana.”

₄Mosadi wa ga Jerobeame a dira jalo, a nanoga a ya kwa Silo, a fitlha kwa ntlong ya ga Ahia; mme Ahia o ne a palelwa ke go bona; gonne matlho a gagwe a ne a foufetse ka ntlha ya botsofe jwa gagwe.

₅Mme Morena o ne a laetse Ahia a re: “Bona, mosadi wa ga Jerobeame o e tla, go botsa sengwe mo go wena ka ntlha ya ga morwawe, gonne ene o a lwala. O mmolelele jaana le jaana.”

Jaanong ya re mosadi a tsena, a ikgakisa. ₆Mme ya re Ahia a utlwa mokgwasa wa dinao tsa gagwe fa a tsena ka mojako, a mo raya a re: “Tsena, mosadi wa ga Jerobeame. Ke ka ntlha ya eng fa o inkgakisa? Mme nna ke laetswe go go bolelela mafoko a a makete. ₇Yaa o ree Jerobeame o re: ‘Morena Modimo wa Iseraele o bua jaana o a re: Ke go godisitse mo morafeng, ka go dira kgosi ya morafe wa me wa Iseraele, ₈ka gagola bogosi mo lapeng la ga Dafita, ka bo go naya. Mme ga o a ka wa nna jaaka Dafita motlhanka wa me yo o neng a tshegetsa ditaolo tsa me, a ntshala morago ka pelo yotlhe gore a dire fela tse di ntshiametseng. ₉Mme o dirile bosula bogolo go botlhe ba ba neng ba le teng pele ga gago, wa ya wa itirela medimo e sele le ditshwantsho tse di bopilweng e le go nkgakatsa, mme nna wa ntatlha, wa nkhularela. ₁₀Bona, ke gona ka moo ke tla tlisetsang lelapa la ga Jerobeame tatlhego; ke tla nyeletsa botlhe ba batonanyana ba losika lwa ga Jerobeame mo Iseraele, ke sa rekegele ope. Ke tla olola ba lapa la ga Jerobeame jaaka go olelwa mantle go tsamaya ba be ba felela. ₁₁Wa ga Jerobeame yo o swelang mo motseng o tla jewa ke dintšwa; yo o swelang kwa nageng o tla jewa ke manong a loapi; gonne Morena o buile jalo.’

₁₂“Wena, nanoga o ye kwa lapeng la gago. E tla re dinao tsa gago di tsena mo motseng, ngwana a swe. ₁₃Baiseraele botlhe ba tla mo lelela ba mo fitlha. Gonne ke ene a le esi fela wa ga Jerobeame yo o tla fitlhwang mo lebitleng, ka go fitlhetswe se se molemo mo go ene mo lapeng la ga Jerobeame fa pele ga Morena, Modimo wa Iseraele. ₁₄Mme Morena o tla itsosetsa kgosi e e tla busang Iseraele e e nyeletsang ba lapa la ga Jerobeame ka letsatsi la teng. Le gona go tloga jaanong. ₁₅Morena o tla itaya Baiseraele gore ba tshikinyege jaaka lotlhaka mo metsing; o tla kumola Baiseraele, a ba tlosa mo lefatsheng le le molemo le, le o le neileng borraabo, a ba phatlalaletsa kwa moseja ga noka ya Ferathe, ka ba dirile medimako ya bone, ba galefisa Morena ka go dira jalo. ₁₆Mme o tla neela Baiseraele mo tatlhegong ka ntlha ya boleo jwa ga Jerobeame jo o bo leofileng, jo o leofisitseng Baiseraele ka jona.”

₁₇Jaanong mosadi wa ga Jerobeame a nanoga a boela kwa Thiresa; ya re a gata mo serepoding sa ntlo, ngwana a swa. ₁₈A ba a fitlhwa, mme Baiseraele botlhe ba mo lelela ka fa lefokong la Morena le o le buileng ka moporofeti Ahia, motlhanka wa gagwe.

₁₉Ditirafalo tse dingwe tsa ga Jerobeame jaaka a ne a tlhabana le jaaka a ne a busa, kana di kwadilwe mo bukeng ya ditirafalo tsa sebaka sa dikgosi tsa Iseraele. ₂₀Mme sebaka se Jerobeame o neng a busa ka sona ke dinyaga di le 22. Mme a robala le borraagwe; jaanong Natabe morwawe a nna kgosi mo boemong jwa gagwe.

₂₁Mme Rehabeame morwa Salomo o ne a busa kwa Juta. E rile a simolola go busa, a bo a le dinyaga di le 41; a busa dinyaga di le 17 kwa Jerusalema, ona motse o Morena a o tlhophileng mo ditsong tsotlhe tsa Iseraele go baya leina la gagwe teng. Leina la ga mmaagwe e ne e le Naama wa Moamone.

₂₂Le Bajuta ba dira tse di bosula mo matlhong a Morena, ba tsosa lefufa la gagwe ka maleo a bone a ba a leofileng bogolo go tsotlhe tse borraabo ba neng ba di dira. ₂₃Le bone ba itirela dithota tsa tlhabelo le majwe a a motloutlo le medimako mo thabaneng nngwe le nngwe e e godimo le fa tlase ga setlhare sengwe le sengwe se setala. ₂₄Le gona go ne go le banna mo lefatsheng ba ba direlang medimo ka boaka, ba dira tsotlhe tse di tshwanang le makgapha a baheitane ba Morena a neng a ba lelekile fa pele ga Baiseraele.

₂₅E rile ka ngwaga wa botlhano wa puso ya ga Rehabeame, Sisake kgosi ya Egepeto a tla go tlhasela Jerusalema. ₂₆A tsaya mahumo a Ntlo ya Morena le mahumo a ntlo ya kgosi, a tsaya tse tsotlhe. Le gona a tsaya dithebe tsotlhe tsa gouta tse Salomo a di dirileng. ₂₇Mo boemong jwa dithebe tseo Rehabeame a dira tsa kgotlho, a di neela mo diatleng tsa balaodi ba batabogi ba ba disang mojako wa ntlo ya kgosi. ₂₈Mme e ne ya re fa kgosi e tsena mo Ntlong ya Morena, batabogi ba di rwale, ba be ba di busetse mo ntlwaneng ya batabogi.

₂₉Ditirafalo tse dingwe tsa ga Rehabeame le tsotlhe tse o neng a di dira kana di kwadilwe mo lokwalong lwa ditirafalo tsa sebaka sa dikgosi tsa Juta. ₃₀Go ne go le ntwa fa gare ga Rehabeame le Jerobeame ka malatsi otlhe. ₃₁Mme Rehabeame a robala le borraagwe, a fitlhwa fa go bona mo motseng wa ga Dafita. Leina la ga maagwe e ne e le Naama wa Moamone. Mme Abiame morwawe a nna kgosi mo boemong jwa gagwe.