1 SAMUELE 17

₁Mme Bafelesita ba phutha mephato ya bone go ya kwa ntweng, ya phuthegela kwa Sogo yo e leng wa Juta, ya thibelela kwa Efese-Damime fa gare ga Sogole le Aseka. ₂Saule le banna ba Iseraele le bone ba phuthega, ba thibelela mo molapong wa ditlhare tsa metherebinthe, ba ipaakanyetsa go tlhabana le Bafelesita. ₃Bafelesita ba bo ba eme mo thabeng ntlheng ele, Baiseraele ba eme mo thabeng ntlheng eno, go le leboa fa gare ga bone.

₄Jaanong ga tswa monna wa motlhabani mo mephatong ya Bafelesita, leina la gagwe e le Goliathe wa kwa Gathe; boleele jwa gagwe e le jwa mabogo a le marataro le bophara jwa seatla. ₅O ne a rwele kuane ya kgotlho mo tlhogong, a apere sefemelo sa tshipi se e keteng letlalo la kgaga; bokete jwa sona e ne e le dišekele di le 5 000 tsa kgotlho. ₆A na le dikamase tsa kgotlho mo maotong le lerumonyana la kgotlho fa gare ga magetla. ₇Lore lwa lerumo la gagwe lo ne lo le kana ka tlhomeso. Bogale jwa lerumo la gagwe e ne e le dišekele di le 600 tsa tshipi. Motshola-thebe a mo etelela pele. ₈Monna yoo a ema a kua a lebile mephato ya Iseraele, a e raya a re: “Lo bololetseng go ipaakanyetsa tlhabano? A ga ke Mofelesita, mme lona lo le batlhanka ba ga Saule fela? Itlhopheleng monna, a a fologele kwano go nna! ₉Fa a ka kgona go tlhabana le nna le go mphenya re tla nna batlhanka ba lona; mme fa nka mo kgona ka mo fenya, lo tla nna batlhanka ba rona, lo re direla.” ₁₀Mofelesita yoo a ba a re: “Ke kgobile mephato ya Iseraele kajeno ka re: ‘Mpheng monna gore re tlhabane mmogo!’ ” ₁₁Ya re Saule le Baiseraele botlhe ba utlwa mafoko ao a Mofelesita yoo, ba tshoga, ba boifa thata.

₁₂Jaanong Dafita e ne e le morwa monna yole wa Eferatha wa kwa Betleheme wa Juta yo leina la gagwe e leng Isai yo o neng a na le bomorwa ba robedi. Monna yoo o ne a setse a tsofetse mo malatsing a ga Saule, e le monna mogolo. ₁₃Mme bomorwa Isai ba bagolo ba bararo ba ne ba latetse Saule, ba ile kwa ntweng. Maina a bomorwawe ba bararo ba ba ileng kwa ntweng e ne e le Eliabe yo mogolo, a tlhomagannwa ke Abinatabe, wa boraro e le Sama. ₁₄Mme Dafita ene e ne e le gofejane. Jaanong ya re ba bagolo ba bararo ba sena go latela Saule. ₁₅Dafita a nna a tlogela Saule gangwe le gape, a ya go disa dinku tsa ga rraagwe kwa Betleheme.

₁₆Mme Mofelesita yole a atamela mo mosong le mantsiboa, a ikemisa jalo malatsi a le 40.

₁₇Jaanong Isai o kile a raya Dafita morwawe a re: “A ko o isetse bomogoloo kgetsanyana ya dipabe tse le dinkgwe di le some tse, o akofe o di ise kwa go bomogoloo kwa bothibelelong. ₁₈Dikase di le some tse tsa mašwi o di isetse molaodi wa ba le sekete, o be o botse bomogoloo bophelo, o ntlele neo ya karabo ya bone.” ₁₉Kana Saule le bone le banna botlhe ba Iseraele ba bo ba le kwa lebaleng la ditlhare tsa metherebinthe, ba ile go tlhabana le Bafelesita.

₂₀Jaanong Dafita a phakela mo mosong, a tlogela dinku le modisa, a rwala mefago ele, a tsamaya jaaka Isai a mo laetse. Ya re a fitlha kwa magololong a dikoloi, mephato e e tswelang kwa felong ga tlhabano ya tlhabela tlhabano mokgosi. ₂₁Baiseraele le Bafelesita ba ne ba ipaakantse mephato e lebaganye. ₂₂Ke fa Dafita a rola morwalo, a o tlogela le molebeledi wa dithoto a sianela kwa mephatong, a fitlha a dumedisa bomogolowe. ₂₃Ya re a ntse a bua nabo ga tlhaga monna yole wa motlhabani yo leina la gagwe e leng Goliathe Mofelesita wa kwa Gathe a tswa mo mephatong ya Bafelesita, a bua mafoko ale gape, Dafita a a utlwa. ₂₄Mme banna botlhe ba Iseraele, e ne ya re fa ba bona monna yoo ba mo tshabe ba boife thata. ₂₅Mme monna mongwe wa Iseraele a re: “A lo bonye monna yo o tsileng yoo? Kana o tsile go kgoba Baiseraele. Mme jaanong monna yo o ka mo fenyang kgosi e tla mo humisa ka khumo e kgolo, e mo neela morwadia-yona, e kgaola ba lapa la ga rraagwe mo lekgethong la Baiseraele.”

₂₆Dafita a botsa banna ba ba emeng fa go ene a re: “Monna yo o tla fenyang Mofelesita yole, a tlosa ditlhong mo Iseraeleng, o tla direlwang? Kana Mofelesita yo o sa rupang yoo ke mang mo a ka kgobang mephato ya Modimo o o phelang?” ₂₇Mme batho ba mmolelela mafoko ale ba re: “Monna yo o mo fenyang o tla direlwa jaana le jaana.”

₂₈Ya re Eliabe mogolowe yo mogolo a mo utlwa a bua le banna a tukela Dafita bogale a re: “O tletseng kwano? Dinkunyana tsele o di tlogetse le mang kwa nageng? Ke itse boikgantsho jwa gago le bosula jwa pelo ya gago. Gonne o tlile fela gore o tle o bone tlhabano.”

₂₉Mme Dafita a re: “Ke sentseng jaanong? Kana ke botsa fela.” ₃₀Jaanong a mo hularela, a leba yo mongwe, a mmotsa potso ele gape. Banna ba mmusetsa karabo e e tshwanang le karabo ya ntlha.

₃₁Ya re mafoko a a builweng ke Dafita a utlwala ba a begela Saule, mme a mmitsa. ₃₂Dafita a tla, a raya Saule a re: “A go se nne motho ope yo o nyemang moko ka ntlha ya Mofelesita yoo. Motlhanka wa gago o tla ya a tlhabana nae.”

₃₃Fela Saule a fetola Dafita a re: “Ga o a nonofa go ka tlhabana le Mofelesita yoo; gonne o lekau, mme ene ke motlhabani go tswa bokaung jwa gagwe.”

₃₄Mme Dafita a raya Saule a re: “Motlhanka wa gago e ne e le modisa wa dinku tsa ga rraagwe. Jaanong e ne ya re fa go tla tau gongwe bere e gapa kwana ya letsomane, ₃₅ke bolole, ke e latele, ke e fenye, ke golole kwana mo leganong la yona. Mme fa e re e lwa le nna ke e tshware ka ditedu, ke e fenye, ke e bolae. ₃₆Le fa e le tau gongwe bere motlhanka wa gago o di fentse ka bobedi jwa tsona. Mme Mofelesita yo o sa rupang yoo o tla direlwa fela jaaka nngwe ya tsona; gonne o kgobile mephato ya Modimo o o phelang.” ₃₇Dafita a ba a re: “Morena yo o mpholositseng mo leroong la tau le la bere o tla mpholosa le mo seatleng sa Mofelesita yoo.” Ke fa Saule a raya Dafita a re: “Yaa he, a Morena a nne nao!” ₃₈Jaanong Saule a apesa Dafita diaparo tsa gagwe, a mo rwesa kuane ya kgotlho mo tlhogong, a mo apesa sefemelo sa tshipi. ₃₉Dafita a ba a tlama tšhaka ya gagwe ka fa ntle ga diaparo, a re o simolola go tsamaya jalo; gonne o ne a ise a leke. Mme Dafita a raya Saule a re: “Ke palelwa ke go tsamaya ka dilo tse, gonne ga ke a di tlwaela.” Dafita a ba a di apola, ₄₀a tsaya thobane ya gagwe ka seatla, a itlhophela matlapana a le matlhano a a borethe mo molapong, a a tsenya mo kgwatlheng ya badisa ya gagwe, e bong mo kgetsaneng ya seragamajwe; a ba a atamela Mofelesita, a tshwere seragamajwe sa gagwe ka seatla.

₄₁Mofelesita le ene a nna a tla, a atamela Dafita; motshola-thebe a mo etelela pele. ₄₂Ya re Mofelesita a leba a bona Dafita, a mo nyatsa; gonne e ne e le lekau fela, a le mohibidu, wa sefatlhego se sentle. ₄₃Mofelesita a botsa Dafita a re: “A ke ntšwa fa o tla kwa go nna ka dithobane?” A ba a hutsa Dafita ka medimo ya gagwe. ₄₄Mofelesita a ba a raya Dafita a re: “Tlaa kwano go nna. Nama ya gago ke tla e neela dinonyane tsa loapi le dibata tsa naga.”

₄₅Mme Dafita a raya Mofelesita a re: “Wena o tla kwa go nna ka tšhaka le ka lerumo le ka lerumonyana. Mme nna ke tla kwa go wena ka leina la Morena wa masomosomo, Modimo wa mephato ya Iseraele, e o e kgobileng. ₄₆Kajeno Morena o tla go neela mo seatleng sa me gore ke go fenye, ke go kgaole tlhogo. Setoto sa gago le ditoto tsa mephato ya Bafelesita ke tla di neela dinonyane tsa loapi le dibata tsa lefatshe kajeno gore lefatshe lotlhe le tle le itse gore Baiseraele ba na le Modimo; ₄₇le gore phuthego yotlhe e ya batlhabani e lemoge gore Morena ga a pholose ka tšhaka le ka lerumo, gonne tlhabano e ke ya Morena. O tla lo neela mo diatleng tsa rona.”

₄₈Jaanong ya re Mofelesita a kgweloga go kgatlhantsha Dafita, Dafita a itlhaganela, a tabogela kwa felong ga tlhabano go kgatlhantsha Mofelesita. ₄₉Dafita a ba a tsenya seatla mo kgwatlheng, a ntsha letlapana mo go yona, a konopa ka seragamajwe, a itaya Mofelesita mo phatleng, letlapana la tsenelela kwa teng ga phatla ya gagwe, mme a wela fa fatshe, a patlama. ₅₀Dafita a fenya Mofelesita jalo ka seragamajwe le ka letlapana; a itaya Mofelesita, a mmolaya le fa go ne go se na tšhaka mo seatleng sa gagwe. ₅₁Dafita a ba a siana, a ema fa go Mofelesita, a tsaya tšhaka ya gagwe, a e somola mo kgwatlheng ya yona, a mo fofotsa, a mo kgaola tlhogo ka yona.

Ya re Bafelesita ba bona seganka sa bone se sule, ba tshaba. ₅₂Ke fa banna ba Iseraele le ba Juta ba nanoga, ba tlhaba mokgosi, ba eta ba bolaya Bafelesita go ya go fitlha kwa Gathe le kwa dikgorong tsa Ekerone. Bafelesita ba ba bolailweng ba namalala mo tseleng go tswa kwa Saaraime go fitlha kwa Gathe le kwa Ekerone. ₅₃Ya re Baiseraele ba sena go lelekela Bafelesita kgakala ba boa, ba thukhutha bothibelelo jwa bone. ₅₄Mme Dafita a tsaya tlhogo ya Mofelesita, a e isa kwa Jerusalema; dibolai tsa gagwe a di baya mo tenteng ya gagwe.

₅₅E rile Saule a bona Dafita a bolola go kgatlhantsha Mofelesita, a botsa Abenere, molaodi wa mephato, a re: “Lekau leo ke morwa mang, Abenere?” Abenere a re: “Ka bophelo jwa gago, kgosi, ga ke itse.”

₅₆Kgosi ya re: “Botsolotsa gore lekau leo ke morwa mang?”

₅₇Jaanong ya re Dafita a boa a sena go fenya Mofelesita Abenere a mo tsaya, a mo isa fa pele ga Saule, a ntse a tshotse tlhogo ya Mofelesita. ₅₈Ke fa Saule a mmotsa a re: “Wena lekau, o morwa mang?” Dafita a re: “Ke morwa Isai motlhanka wa gago wa kwa Betleheme.”