2 DITIRAFALO 24

₁E rile Joase a simolola go busa, a bo a le dinyaga di supa; a busa dinyaga di le 40 kwa Jerusalema; leina la ga mmaagwe e le Sibja wa Bereseba. ₂Joase a dira tse di siameng mo matlhong a Morena ka malatsi otlhe a ga Joyata moperesiti. ₃Joyata a mmatlela basadi ba le babedi, mme a tsala bomorwa le bomorwadi.

₄Morago ga moo Joase a ikaelela go ntšhwafatsa Ntlo ya Morena. ₅A kgobokanya baperesiti le Balefi a ba laela a re: “Tswelang kwa metseng ya Juta, lo phuthe madi mo Baiseraeleng botlhe a go baakanya Ntlo ya Modimo wa lona ka ngwaga le ngwaga, lo itlhaganele go dira jalo.” Mme Balefi bone ba se ka ba itlhaganela. ₆Ke fa kgosi e bitsa Joyata moperesiti yo mogolo e mmotsa e re: “Ke go reng, fa o sa ela tlhoko gore Balefi ba ntshise ba Juta le Jerusalema lekgetho le le beilweng ke Moše motlhanka wa Morena le ntshediwa Tente ya Tshupo ke phuthego ya Baiseraele.”

₇A re jalo ka gonne bomorwa Athalea wa moikepi ba ne ba tlhokomologile ditshenyego tsa Ntlo ya Modimo, ba bile ba neetse boBaale dineo tsotlhe tse di boitshepo tsa Ntlo ya Morena.

₈Mme ka taelo ya kgosi ba dira letlole, ba le baya ka kwa ntle fa kgorong ya Ntlo ya Morena. ₉Ba be ba tlhaba mokgosi mo Juta le Jerusalema o o reng: “A go ntshediwe Morena lekgetho le Moše motlhanka wa Modimo o kileng a le beela Baiseraele kwa sekakeng.” ₁₀Ke fa dikgosana tsotlhe le batho botlhe ba le tlisa ka boitumelo, ba le latlhela mo letloleng ga tsamaya ba fetsa. ₁₁E ne ya re fa letlole le isiwa go baokamedi ba kgosi ke Balefi, mme ba fitlhela madi a le mantsi, go tle mokwaledi wa kgosi le mookamedi wa moperesiti yo mogolo, ba tsholole letlole, ba be ba le tsee, ba le busetse kwa mannong a lone. Ba ne ba dira jalo ka letsatsi le letsatsi, ba phutha madi a mantsi.

₁₂Jaanong kgosi le Joyata ba a neela baokamedi ba tiro kwa Ntlong ya Morena; bone ba rapa babetli ba majwe le ba dikota gore ba ntšhwafatse Ntlo ya Morena le bathudi ba tshipi le ba kgotlho gore ba baakanye Ntlo ya Morena. ₁₃Baokamedi ba ne ba dira, mme tiro ya paakanyo ya tswelela pele ka diatla tsa bone; ba tsosa Ntlo ya Modimo jaaka e ne e ntse pele, ba e tiisa sentle.

₁₄Ya re ba sena go fetsa, ba isa madi a a setseng kwa kgosing le go Joyata, ga dirwa didiri tsa Ntlo ya Morena ka ona, didiri tsa tirelo le tsa go dira ditlhabelo le megopo le dilo tsa gouta le selefera. Ba tswelela go dira ditlhabelo tsa phiso fa Ntlong ya Morena ka gale ka malatsi otlhe a ga Joyata. ₁₅Jaanong Joyata a tsofala a jele lefatshe, a swa; ya re a swa, a bo a le dinyaga di le 130. ₁₆Ba mo fitlha mo motseng wa ga Dafita fa dikgosing; gonne tse o di diretseng Iseraele le Modimo le Ntlo ya ona e ne e le tse di molemo.

₁₇Mme ya re Joyata a sena go swa, dikgosana tsa Juta tsa tla tsa ikobela kgosi. Ke fa kgosi e utlwana nabo, ₁₈mme ba tlogela Ntlo ya Morena, Modimo wa borraabo, ba direla medimako ya Ašera le medimo ya diseto. Ka ntlha ya molato oo bogale jwa Morena jwa wela Juta le Jerusalema. ₁₉Ke fa Morena a roma baporofeti kwa go bone go ba busetsa kwa Moreneng le go ba tlhagisa, fela ba gana go utlwa. ₂₀Mme Mowa wa Modimo wa tsena mo go Sagaria morwa Joyata moperesiti, mme a ema fa pele ga morafe, a ba raya a re: “Modimo o bua jaana wa re: ‘Ke ka ntlha ya eng fa lo tlola ditaolo tsa Morena, mo jaanong lo tlhokang lesego; e re ka lo tlogetse Morena, le ene o lo tlogetse.’ ” ₂₁Ke fa ba mo tsosetsa moferefere, ba mo kgobotletsa ka majwe ka taelo ya kgosi mo lapeng la Ntlo ya Morena. ₂₂Kgosi Joase a se ka a ngoka bopelotlhomogi jo Joyata rraagwe a bo mo diretseng, mme a bolaya morwawe; jaanong ya re a swa, a bua a re: “Morena a se bone, a se beletse!”

₂₃Ga nna jalo, ya re ngwaga o sena go feta batlhabani ba Siria ba mmololela, ba tla kwa Juta le Jerusalema, ba bolaya dikgosana tsotlhe tsa morafe mo morafeng, ba romela thopo yotlhe ya bone kwa kgosing ya Damaseko. ₂₄Le fa batlhabani ba Siria ba ne ba tlile e le banna ba se kae fela, Morena a neela bontsi jo bogolo jwa batlhabani ba Juta mo diatleng tsa bone, ka ba ne ba tlogetse Morena, Modimo wa borraabo. Ga dirafalediwa Joase petso jalo. ₂₅Mme ya re ba tloga mo go ene, a bo a le mo malwetseng a magolo, mme batlhanka ba gagwe ba mo tsosetsa moferefere ka ntlha ya madi a ga morwa Joyata moperesiti, ba mmolaya a le mo bolaong jwa gagwe, mme a swa; ba be ba mo fitlha mo motseng wa ga Dafita, mme e seng mo mabitleng a dikgosi. ₂₆Ba ba neng ba mo tsosetsa moferefere ke Sabate morwa Simeathe mosadi wa Moamone le Josabate morwa Simerithe mosadi wa Momoabe. ₂₇Fa e le bomorwawe le bontsi jwa mafoko a baporofeti a go mo kgalemela le ntšhwafatso ya Ntlo ya Modimo kana di kwadilwe mo tlhalosong ya lokwalo lwa dikgosi. Mme Amasia morwawe a nna kgosi mo boemong jwa gagwe.