2 DIKGOSI 16

₁Ahase morwa Jothame kgosi ya Juta o ne a simolola go busa ka ngwaga wa 17 wa puso ya ga Pheka morwa Remalea. ₂Ya re a simolola go busa, a bo a le dinyaga di le 20, a busa dinyaga di le 16 kwa Jerusalema. A se ka a dira tse di siameng mo matlhong a Morena, Modimo wa gagwe, jaaka Dafita rraagwe mogolwagolwane. ₃Mme a sepela mo tseleng ya dikgosi tsa Iseraele; le gona a ralatsa morwawe molelo ka fa makgapheng a baheitane, ba Morena o kileng a ba leleka fa pele ga Baiseraele. ₄A dira ditlhabelo le go tshuba maswalo mo dithoteng tsa tlhabelo le mo dithabaneng le fa tlase ga setlhare sengwe le sengwe se setala.

₅Ka metlha eo ga bolola Resine kgosi ya Siria le Pheka morwa Remalea kgosi ya Iseraele, ba ya kwa Jerusalema go tlhabana; ba dikanyetsa Ahase ka ntwa, mme ba palelwa ke go fenya. ₆Ka sebaka seo Resine kgosi ya Siria a busetsa motse wa Elathe kwa Siria, a leleka Bajuta mo Elathe; ga tla Basiria kwa Elathe, ba nna teng go fitlha letsatsing la kajeno. ₇Mme Ahase a roma barongwi kwa go Thigelathe-Philesere kgosi ya Asiria a re: “Ke motlhanka wa gago le morwao. Bolola, o nkgolole mo diatleng tsa kgosi ya Siria le mo diatleng tsa kgosi ya Iseraele tse di ntlhasetseng.” ₈Ahase o bile a tsere selefera le gouta tse di neng di fitlhelwa mo Ntlong ya Morena le mo mahumong a ntlo ya kgosi a di romela kgosi ya Asiria e le mpho. ₉Kgosi ya Asiria ya utlwana nae, ya bolola, ya ya kwa Damaseko, ya mo thopa, ya isa batho ba teng mo botshwarong kwa Kire, ya bolaya Resine.

₁₀Jaanong kgosi Ahase a ya go kgatlhantsha Thigelathe-Philesere kgosi ya Asiria kwa Damaseko. Ya re a sena go bona aletare e e neng e le kwa Damaseko, kgosi Ahase a romela setshwantsho sa aletare le sekao sa yona fela jaaka e ne e dirilwe kwa go moperesiti Uria. ₁₁Ke fa moperesiti Uria a aga aletare eo fela jaaka a laetswe ke kgosi Ahase go tswa kwa Damaseko. Moperesiti a e dira jalo, kgosi Ahase a ise a boe kwa Damaseko. ₁₂Ya re kgosi e goroga, e tswa kwa Damaseko, ya bona aletare, ya atamela kwa go yona, ya palamela mo mapalamong a yona, ₁₃ya tshuba setlhabelo sa phiso sa yona le tshupelo ya dijo ya yona, ya tshela tshupelo ya noo ya yona, ya kgatsha madi a ditlhabelo tsa tebogo tsa yona mo aletareng. ₁₄Mme aletare ya kgotlho e e neng e le fa pele ga Morena yona a e tlosa fa pele ga Ntlo ya Morena gore e se ka ya nna fa gare ga aletare ya gagwe le Ntlo ya Morena, a e baya ntlheng ya bokone ya aletare ya gagwe. ₁₅Mme kgosi Ahase a mo laela, ene moperesiti Uria, a re: “Mo aletareng e kgolo e o tshube setlhabelo sa phiso sa mo mosong le tshupelo ya dijo ya maitsiboa le setlhabelo sa phiso sa kgosi le tshupelo ya dijo ya yona le setlhabelo sa phiso sa morafe otlhe wa lefatshe le tshupelo ya dijo le ya noo ya ona. Madi otlhe a setlhabelo sa phiso le madi otlhe a setlhabelo se sengwe o a kgatshe mo go yona. Ke tla bona se nka se dirang ka aletare ya kgotlho.” ₁₆Moperesiti Uria a dira fela jaaka kgosi Ahase e mo laetse.

₁₇Le gona kgosi Ahase a kgaola dipati tsa ditlhakore tsa dikolotsana tsa tlhatswetso, a tlosa megopo mo go tsona; a ba a folosa lewatle mo dikgomong tsa kgotlho tse di neng di le rwele, a le baya mo mannong a a agilweng ka mafika. ₁₈A ba a sutisa tsela ya Sabata e e ruletsweng ka leobo le ba neng ba le agile fa Ntlong ya Morena le botseno jwa kgosi jwa ka kwa ntle jwa go ya kwa Ntlong ya Morena ka ntlha ya kgosi ya Asiria.

₁₉Ditirafalo tse dingwe tsa ga Ahase le tse o neng a di dira kana di kwadilwe mo lokwalong lwa ditirafalo tsa sebaka sa dikgosi tsa Juta. ₂₀Mme Ahase a robala le borraagwe a ba a fitlhwa fa go borraagwe mo motseng wa ga Dafita, mme Hesekia morwawe a nna kgosi mo boemong jwa gagwe.