2 DIKGOSI 22

₁Josia o ne a le dinyaga di le robedi, fa a nna kgosi; a busa dinyaga di le 31 kwa Jerusalema. Leina la ga mmaagwe e ne e le Jedita morwadia Ataya wa Bosekathe. ₂A dira tse di siameng mo matlhong a Morena, a sepela gotlhe mo tseleng ya ga Dafita rraagwe mogolwagolwane; a se ka a fapogela ntlheng ya le le jang le e seng ya la molema.

₃E rile ka ngwaga wa 18 wa puso ya kgosi Josia, kgosi ya roma mokwaledi Safane morwa Asalea morwa Mesulame kwa Ntlong ya Morena ya re: ₄“Tlhatlogela kwa go Hilekia moperesiti yo mogolo gore a bale madi a a tlisitsweng kwa Ntlong ya Morena, a badisa ba mojako ba a phuthileng mo bathong ₅gore ba a neele mo diatleng tsa baokamedi ba tiro kwa Ntlong ya Morena, mme bao ba duele badiri ba tiro ba ba kwa Ntlong ya Morena go e baakanya fa e senyegileng teng; ₆e bong babopedi le babetli le baruledi; le gona e le go reka dikgong le mafika a a betlilweng tsa go baakanya Ntlo ya Morena.” ₇Fela madi a ba a neetsweng diatleng a se ka a balwa nabo; gonne ba dira ka go ba ikanya.

₈Ke fa Hilekia moperesiti yo mogolo a raya mokwaledi Safane a re: “Ke bonye lokwalo lwa molao mo Ntlong ya Morena.” Hilekia a ba a neela Safane lokwalo loo, mme ene a lo buisa. ₉Ya re mokwaledi Safane a sena go boela kwa kgosing, a e busetsa lefoko a re: “Batlhanka ba gago ba tsholotse madi a a kwa Ntlong ya Morena, ba a neela diatleng tsa baokamedi ba tiro kwa Ntlong ya Morena.” ₁₀Safane mokwaledi a ba a bolelela kgosi a re: “Moperesiti Hilekia o nneetse lokwalo.” Safane a ba a lo buisa fa pele ga kgosi.

₁₁Mme ya re kgosi e utlwa mafoko a lokwalo lwa molao ya ikgagola diaparo. ₁₂Kgosi ya ba ya laela moperesiti Hilekia le Ahikame morwa Safane le Agebore morwa Migaya le Safane mokwaledi le Asaya motlhanka wa kgosi ya re: ₁₃“Yaang lo mpoletse Morena le morafe le Bajuta botlhe ka ntlha ya mafoko a lokwalo lo lo bonyweng loo; gonne bogale jwa Morena bo bogolo jo bo re tuketseng, ka borraetsho ba se ka ba utlwa mafoko a lokwalo loo le e seng go dira tsotlhe tse re di kwaletsweng.”

₁₄Moperesiti Hilekia le Ahikame le Agebore le Safane le Asaya ba ya kwa go Huleta moporofeti wa sesadi, mosadi wa ga Sadume morwa Thikwa morwa Harehase mmoloki wa diaparo: – Huleta o ne a agile kwa Motseng-o-mošwa mo Jerusalema – ba bua nae. ₁₅Huleta a ba raya a re: “Morena, Modimo wa Iseraele, o bua jaana o a re: ‘Rayang monna yole yo o lo romileng kwano go nna lo re: ₁₆Morena o bua jaana a re: Bona, ke tla tlisa tatlhego mo felong fano le mo baaging ba teng ka fa mafokong otlhe a lokwalo lo kgosi ya Juta e lo buisitseng. ₁₇Ke ka gonne ba ntlogetse ba fisetsa medimo e sele maswalo, e le gore ba nkgalefise ka tiro yotlhe ya diatla tsa bone; ka moo bogale jwa me bo tla tukela felo fano, mme bo sa time. ₁₈Mme kgosi ya Juta e e lo romileng go botsa Morena lo e ree jaana lo re: Morena, Modimo wa Iseraele, o bua jaana o a re: Fa e le mafoko a o a utlwileng: ₁₉E re ka pelo ya gago e le boleta, mme o ikokobeditse fa pele ga Morena, jale fa o utlwa tse ke di omanetseng ka ga felo fano le baagi ba gona ka re: Ba tla fetoga theregiso le khutso; ka o ikgagotse diaparo, o ledile fa pele ga me, le nna ke go utlwile! Morena a re jalo. ₂₀Ka moo, bona, ke tla go phuthela kwa go borraago, o bolokwa mo lebitleng la gago ka kagiso gore matlho a gago a se ka a bona tatlhego yotlhe e ke tla e tlisetsang felo fano.’ ”

Ba busetsa kgosi karabo.