HESEKIELE 45

₁“ ‘E re lo tlhamela lefatshe tengwa go abelana boswa, lo segele Morena tshupelo, e bong naga e e boitshepo mo lefatsheng: Boleele jwa yona e nne mabogo a le dikete di le 25, boatlhamo e nne mabogo a le dikete di le 20. E tla nna yona naga e e boitshepo mo tikologong yotlhe ya molelwane wa yona. ₂Jaanong a mo go yona go segelwe Tempele setsha; ditlhakore tsa sona e nne tsa mabogo a le 500 mo dintlheng tsoo nne tikologong. Mme a se dikanyediwe ke karolo ya naga e e nnang fela; boatlhamo jwa yona e nne mabogo a le 50. ₃Jaanong mo nageng ele e e lekantsweng o sege felo gongwe: Boleele jwa gona e nne mabogo a le dikete di le 25, boatlhamo e nne mabogo a le dikete di le some; mo gona go nne Felo-ga-Boitshepo, fa go boitshepotshepo thata. ₄Ke yona naga e e boitshepo mo lefatsheng. E tla nna ya baperesiti ba ba direlang mo Felong-ga-Boitshepo, ba ba atamelang go direla Morena; e tla nna ditsha tsa malapa a bone. Ke naga e e itshepetseng Felo-ga-Boitshepo. ₅Gape karolo e nngwe ya naga e boleele jwa yona e leng mabogo a le dikete di le 25, boatlhamo e le mabogo a le dikete di le 10, e tla nna kabelo ya Balefi ba ba direlang Ntlo gore ba age metse teng.

₆“ ‘Fa e le kabelo ya naga ya motse, lo o lekanyetse boatlhamo jwa mabogo a le dikete di le tlhano le boleele jwa mabogo a le dikete di le tlhano le boleele jwa mabogo a le dikete di le 25. Ke naga e e bapileng le naga e e boitshepo; e tla nna ya Baiseraele botlhe.

₇“ ‘Mme naga e e mo dintlheng tse pedi tsa naga e e boitshepo le naga ya motse e e bapileng le naga e e boitshepo le naga ya motse e tla nna ya kgosi, go tloga mo ntlheng ya bophirimatsatsi go ya kwa bophirimatsatsi le go tloga mo ntlheng ya botlhabatsatsi go ya kwa botlhabatsatsi. A boleele jwa yona bo lekane le jwa kabelo nngwe ya ditso tsa Baiseraele go tloga molelwaneng wa bophirimatsatsi go ya molelwaneng wa botlhabatsatsi wa lefatshe. ₈Ke yona kabelo ya kgosi mo go Iseraele. Dikgosi tsa me ga di nke di tlhola di gatelela morafe wa me, mme di tla naya Baiseraele lefatshe ka fa ditsong tsa bone.’

₉“Morena Modimo o bua jaana a re: ‘Go lekanye tota, lona dikgosi tsa Iseraele! Tlosang kgatelelo le tshenyo. Dirang ka tshiamo le ka molao. Khutlang go leleka morafe wa me mo nageng ya one le mo malapeng a one!’ Morena Modimo o buile jalo.

₁₀“ ‘Lo nne le dilekanyetso tse di siameng le efa e e siameng le batha e e siameng.

₁₁“ ‘A efa le batha e nne selekanyo se le sengwe fela. A efa di le some di tlatse homere, le batha di le some di tlatse homere. A di laolwe ke homere ka bobedi jwa tsona.

₁₂“ ‘Šekele e nne gera di le masome a mabedi. Šekele di le tlhano a e nne di le tlhano. Šekele di le some a e nne di le some. Šekele di le somatlhano a e nne mane mo go lona.

₁₃“ ‘Lekgetho le lo tla le ntshang ke le: Go ntshiwe karolo ya borataro ya efa mo homereng ya mabele le karolo ya borataro ya efa mo homereng ya garase. ₁₄Fa e le lekgetho la lookwane: A go ntshiwe karolo ya bosome ya batha mo korong ya lookwane; kana koro ke dibatha di le some. ₁₅Gape a go ntshiwe kwanyana e le nngwe mo dinkung di le kgolamabedi tsa mafulo a a metsi a Iseraele; a e nne tshupelo le setlhabelo se se fisiwang gongwe sa tebogo gore ba itshwarelwe dibe,’ go bua Morena Modimo.

₁₆“ ‘A batho botlhe ba lefatshe ba ntshetse kgosi ya Iseraele lekgetho le le ntseng jalo. ₁₇E tla nna tshwanelo ya kgosi go ntsha setlhabelo se se fisiwang le tshupelo ya dijo le ya noo ka meletlo le ka malatsi a ngwedi o o rogilweng le ka boSabata le mo dikgobokanong tsotlhe tsa meletlo ya Baiseraele; ke yona e e tla dirang setlhabelo sa boleo, le tshupelo, le setlhabelo sa phiso, le ditlhabelo tsa tebogo, e le go batlela Baiseraele boitshwarelo.’

₁₈“Morena Modimo o bua jaana a re: ‘Ka la ntlha la kgwedi ya ntlha lo ne lo tsaya poana mo dikgomong e e se nang bogole, lo tlhatswa Felo-ga-Boitshepo boleo. ₁₉A moperesiti a tsee madi a setlhabelo sa boleo, a a tshase mo disaneng tsa mojako wa Ntlo le mo dikhutlong tsoo nne tsa direpodi tsa aletare le mo disaneng tsa dikgoro tsa lelapa la ka fa teng. ₂₀Le gona lo dire jalo ka la ntlha la kgwedi ya bosupa ka ntlha ya bone ba ba leofileng ka bokoa gongwe ka go tlhoka kitso, gore lo tlhatswe Ntlo boleo.

₂₁“ ‘Ka letsatsi la 14 la kgwedi ya ntlha go ne go nna moletlo wa Tlolaganyo mo go lona; e nne wa malatsi a supa go jewe dinkgwe tse di sa bedisiwang. ₂₂A ka letsatsi leo kgosi e dire poana setlhabelo sa boleo, e le go itirela le batho botlhe ba lefatshe. ₂₃A ka letsatsi lengwe le lengwe la malatsi a supa a moletlo e direle Morena setlhabelo sa phiso ka dipoana tse supa le ka diphelehu tse supa tse di se nang bogole, le setlhabelo sa boleo ka phoko ka letsatsi lengwe le lengwe la malatsi a supa ao. ₂₄Le gona a e baakanye tshupelo ya dijo: Efa ya bupe mmogo le poana e le nngwe, le efa ya bupe mmogo le phelehu e le nngwe. Le gona e tshele hina ya lookwane mo bupeng jwa efa.

₂₅“ ‘Ka letsatsi la 15 la kgwedi ya bosupa, ka moletlo a e dire tse di tshwanang le tsele ka malatsi a supa: Ditlhabelo tsa boleo le ditlhabelo tse di fisiwang le ditshupelo tsa dijo le lookwane, a di tshwane fela le tsele.’