HESEKIELE 46

₁“Morena Modimo o bua jaana a re: ‘Kgoro ya lelapa la ka fa teng e e lebileng kwa botlhabatsatsi a e nne e tswetswe ka malatsi a marataro a go dira, mme e bulwe ka letsatsi la Sabata le ka letsatsi la ngwedi o o rogilweng. ₂Jaanong a kgosi e tsene mo go yona ka tsela ya leobo, e tswa kwa ntle, e eme fa sesaneng sa kgoro. Baperesiti ba dire setlhabelo sa yona sa phiso le ditlhabelo tsa yona tsa tebogo; yona e obamele fa serepoding sa kgoro, e be e tswe. Mme kgoro e se ka ya tswalwa go fitlha mantsiboa. ₃Le batho ba lefatshe a ba obamele fa mojakong wa kgoro eo fa pele ga Morena ka boSabata le ka malatsi a ngwedi o o rogilweng.

₄“ ‘Setlhabelo sa phiso se kgosi e tshwanetseng go se isetsa Morena ka letsatsi la Sabata ke sa dikwana di le thataro tse di se nang bogole le sa phelehu e e se nang bogole. ₅Tshupelo ya bupe e nne jwa efa mmogo le phelehu; dikwana di okediwe ka tshupelo ya bupe ka fa kgosi e nonofileng ka teng. Le gona e tshele hina ya lookwane mo efeng ya bupe. ₆Mme ka letsatsi la ngwedi o o rogilweng a e nne setlhabelo sa poana e e se nang bogole le sa dikwana di le thataro le sa phelehu tse di itekanetseng. ₇A e baakanye tshupelo ya bupe jwa efa mmogo le poana le jwa efa mmogo le phelehu; e bo okeletse dikwana ka fa e kgonang ka teng. Le gona e tshele hina ya lookwane mo efeng ya bupe. ₈Fa kgosi e tsena, a e tsene ka tsela ya leobo la kgoro, e be e tswe gape ka tsela eo ya yona.

₉“ ‘Jaanong fa batho ba lefatshe ba tla fa pele ga Morena ka meletlo, a ba ba tsenang ka kgoro ya bokone go obamela ba tswe ka kgoro ya borwa; ba ba tsenang ka kgoro ya borwa, a ba tswe ka kgoro ya bokone. Ga ba a tshwanela go boa ka kgoro e ba tsenyeng ka yona, mme a ba tswe ka kgoro e ba lebileng kwa go yona. ₁₀A e re ba tsena, kgosi e tsene nabo, e le mo gare ga bone; e re ba tswa, e tswe nabo. ₁₁Mme ka malatsi a meletlo le a go phuthega a tshupelo ya bupe e nne jwa efa mmogo le poana le jwa efa mmogo le phelehu, mme dikwana a di okediwe ka bupe ka fa kgosi e nonofileng ka teng. Le gona e tshele hina ya lookwane mo efeng ya bupe.

₁₂“ ‘Mme a e re fa kgosi e direla Morena setlhabelo sa phiso ka boyona gongwe ditlhabelo tsa tebogo ka boyona, a e bulelwe kgoro e e lebileng kwa botlhabatsatsi, e tlise setlhabelo sa phiso sa yona le tsa tebogo tsa yona, jaaka e dira ka letsatsi la Sabata, e be e tswe gape. Fa e sena go tswa, a kgoro e tswalwe.

₁₃“ ‘A kgosi e direle Morena setlhabelo sa phiso sa kwana ya ngwaga o le mongwe e e se nang bogole ka letsatsi lengwe le lengwe, a e se mo direle mo mosong mongwe le mongwe. ₁₄Le gona a e se oketse ka tshupelo ya bupe mo mosong mongwe le mongwe: E nne karolo ya borataro ya efa ya bupe, le karolo ya boraro ya hina ya lookwane gore lo kolobise bupe, e le tshupelo ya dijo ya Morena. Ke ona molao wa setlhabelo sa metlha yotlhe. ₁₅A go baakanngwe jalo kwana mmogo le tshupelo ya bupe le lookwane mo mosong mongwe le mongwe. Ke sona setlhabelo sa phiso sa metlha yotlhe.’

₁₆“Morena Modimo o bua jaana a re: ‘Fa kgosi e naya mongwe wa bomorwaa-yona mpho ya naga ya yona, yona e tla nnela ruri ya bomorwaa-yona; ke boswa jo ba bo ruisang. ₁₇Mme fa e naya mongwe wa batlhanka ba yona mpho ya naga ya yona, e tla nna ya gagwe fela go fitlha ngwageng wa kgololo. Morago e nne ya kgosi gape. Ke naga ya bomorwaa-yona fela e e tla nnang ya bone e le boswa. ₁₈A kgosi e se ka ya tsaya sepe sa naga ya batho ka go ba leleka ka thata mo bosweng jwa bone. A e jese bomorwaa-yona boswa jwa naga ya yona, mme go se ka ga lelekwa ope wa morafe wa me mo kabelong ya naga ya gagwe.’ ”

₁₉Ke fa a ntsenya ka botseno jo bo fa lotlhakoreng lwa kgoro, a nkisa kwa matlwaneng a a boitshepo a baperesiti a a lebileng kwa bokone, ka fitlhela felo teng fa go kwa moragorago ntlheng ya bophirimatsatsi. ₂₀A nthaya a re: “Ke gona felo fa baperesiti ba apeelang ditlhabelo tsa molato le tsa boleo teng; ke fa ba besang ditshupelo tsa bupe gore ba se ka ba di ntshetsa kwa lapeng la ka fa ntle, ba tloga ba itshepisa morafe.”

₂₁A ba a nkisa kwa lapeng la ka fa ntle, a mphetisetsa pele kwa dikhutlong tse nne tsa lelapa leo, ka fitlhela go le lelapana gape mo sekhutlong sengwe le sengwe sa lelapa leo. ₂₂Mo dikhutlong tse nne tsa lelapa leo go ne go le malapana a a ageletsweng, a le boleele jwa mabogo a le 40 le boatlhamo jwa mabogo a le 30. Malapana ao a dikhutlo a ne a lekalekana fela ka bone jwa ona. ₂₃A ne a ageletswe ka dipota ka bone jwa ona. Go ne go dirilwe maiso fa fatshe go bapa le dipota tseo mo tikologong. ₂₄A ba a nthaya a re: “Ke ona matlo a a apeelang, fa badiredi ba Ntlo ba apeelang teng ditlhabelo tse di jewang tsa batho.”