JOBE 41

₁“A o ka goga kwena ka kobe

le go gatelela loleme lwa yona

ka lodi?

₂A o ka tsenya mogala wa

motlhatlha mo nkong ya yona?

A o ka e phunya lesama ka kobe?

₃A e ka go kokotlela thata?

Gongwe e bua nao ka boleta?

₄A e ka dira kgolagano nao

gore o e tshole,

e nne motlhanka wa gago

ka metlha yotlhe?

₅A o ka tshameka nayo

jaaka e kete ke nonyane?

A o ka e golegela basetsana

ba gago?

₆A batshwari ba ditlhapi

ba ka e bapatsa

ba e kgaoganyetsa barekisi?

₇A o ka tsepamisa marumo

mo letlalong la yona

gongwe dikobe tsa ditlhapi

mo tlhogong ya yona?

₈Baya seatla sa gago mo go yona!

O gopole tlhabano!

Ga o kitla o dira gape.

₉Bona, tsholofelo ya go

e tshwara e a aketsa;

motho o tla wa fela, fa a e bona.

₁₀Ga go na ope yo o pelokgale

go ka e rumola!

Jaanong yo o ka emelanang

le nna ke mang?

₁₁Ke mang yo o kileng

a nnaya sengwe,

yo ke ka mmusetsang?

Kana tse di fa tlase ga legodimo

lotlhe ke tsa me.

₁₂Ga nkitla ke didimala

ka ga ditokololo tsa yona;

ke raya dithata tsa kwena

le bontle jwa popego ya yona.

₁₃Ke mang yo o ka e apolang

letlalo?

Ke mang yo o ka tsenang

mo gare ga metlhagare

e mebedi ya yona e ntse e utlwa?

₁₄Ke mang yo o ka bulang kgoro

ya legano la yona?

Meno a yona a boitshega

ka ntlha tsotlhe.

₁₅Mokokotlo wa yona ke methalo

ya dithebe tsa makape;

a tshwaragantswe ka sekano

se se tiileng.

₁₆Lengwe le pataganye

le le lengwe;

ga go tsene phefo

mo gare ga ona.

₁₇Makape a ngaparelanye

a lomaganye;

ga a ka ke a patologana.

₁₈Go ethimola ga yona

go phatsimisa lesedi;

dintshi tsa matlho a yona

di tshwana le mahube.

₁₉Mo leganong la yona

go tswa dirumola;

go tswa ditlhase tsa molelo.

₂₀Dinko tsa yona

di kua musi jaaka pitsa

e e bedisiwang ka molelo

wa metlhatlha.

₂₁Pudulo ya yona e tukisa magala.

Kgabo ya molelo e tswa

mo leganong la yona.

₂₂Thata e mo thamong ya yona;

poitshego e e etelela pele.

₂₃Matlhakore a mmele wa yona a

ngaparelanye a tiile mo go yona;

ga a tshikinyege.

₂₄Pelo ya yona e thata jaaka lefika;

e tiile jaaka lelwala.

₂₅Fa e tsoga, go boifa dinatla,

di tlhakane tlhogo ka go rerega.

₂₆Le fa motho a e rema ka tšhaka,

tšhaka ga e kgone sepe,

le fa e le lerumo gongwe motsu

gongwe selepe.

₂₇Kwena e kaya tshipi bojang fela;

kgotlho e e kaya dikgong

tse di bodileng.

₂₈Motsu ga o ka ke wa e tshabisa;

mafika a seragamajwe

ke dirite mo go yona.

₂₉Molamu e o kaya dirite fela;

e tshega mosumo wa lerumo.

₃₀Ka fa tlase e na le matlape

a a bogale;

e tlogela metlhala mo lorageng

jaaka selei se se phothang.

₃₁E bedisa bodiba jaaka pitsa;

e hudua letsha jaaka go huduiwa

pitsana ya ditlhare.

₃₂E phatsimisa metsi

fa morago ga yona;

motlhala wa yona o tshwana

le moriri o mmududu.

₃₃Mo lefatsheng ga go na selekane

sa yona; e bopetswe go se boife.

₃₄E lebile tsotlhe tse dikgolo

e sa boife,

ka yona e le kgosi ya dibata

tsotlhe tse di mabela.”