LEFITIKO 27

₁Morena a ba a raya Moše a re: ₂“Bua le Baiseraele o ba ree o re: ‘Fa motho a dira maikano ka boene a go re mangmang e nne wa Morena, o ka gololwa ka fa a kaiwang ka teng.

₃“ ‘Fa e le monna, o tla mo kaya jaana: Yo o dinyaga di le 20 go ya dinyageng di le 60 o tla mo kaya dišekele di le 50 tsa selefera, e bong dišekele tse di tletseng tsa Felo-ga-Boitshepo.

₄“ ‘Fa e le mosadi, o mo kaye dišekele di le 30.

₅“ ‘Fa e le wa dinyaga di le tlhano go ya dinyageng di le 20, o kaye yo motonanyana dišekele di le le yo monamagadi dišekele di le some.

₆“ ‘Fa e le ngwana wa kgwedi go ya dinyageng di le tlhano, o kaye mosimane dišekele di le tlhano tsa selefera, mme mosetsana o mo kaye dišekele di le tharo tsa selefera.

₇“ ‘Fa e le motho wa dinyaga di le 60 le go feta foo, monna o mo kaye dišekele di le 15, mme mosadi o mo kaye dišekele di le some.

₈“ ‘Mme fa motho a humanegile, a palelwa ke go ntsha tlhwatlhwa ya thekololo e o e mo kaileng, a a emisiwe fa pele ga moperesiti gore moperesiti a mo kaye. Yo o ikanneng a moperesiti a mo kaye ka fa a nonofileng ka teng.

₉“ ‘Fa e le sengwe sa diruiwa se se ka tlhabelwang Morena, gona sengwe le sengwe sa tsona se motho a se neelang Morena se tla nna boitshepo. ₁₀A a se ka a tlhanoga ka sona, le e seng go ananya se se siameng ka se se sa siamang, gongwe se se sa siamang ka se se siameng. Mme fa a re o ananya seruiwa ka seruiwa, sona le se a reng o ananya ka sona di tla nna boitshepo ka bobedi jwa tsona. ₁₁Mme fa e le seruiwa se se sa itshekang, se se sa tshwanelang go tlhabelwa Morena, a moikani a bee seruiwa seo fa pele ga moperesiti. ₁₂A moperesiti a se atlhole gore a se siame gongwe ga se a siama. Go tla nna jaaka wena moperesiti o atlhotse. ₁₃Mme fa a rata go se golola, a a oketse karolo ya botlhano godimo ga tlhwatlhwa ya sona e o e kaileng.

₁₄“ ‘Fa motho a itshepisetsa Morena ntlo ya gagwe go e mo neela, a moperesiti a e sekaseke, fa e siame gongwe e sa siama; ka fa moperesiti a e kayang ka teng, go nne jalo. ₁₅Jaanong fa yo o itshepisitseng ntlo ya gagwe a rata go e reka gape, a a oketse tlhwatlhwa e o e kaileng ka karolo ya botlhano ya yona; foo e tla mmoela.

₁₆“ ‘Fa motho a itshepisetsa Morena tshimo nngwe ya boswa jwa gagwe, o e kaye ka fa peong e e jwalwang mo go yona. Fa peo ya garase e tlatsa homere, o e kaye dišekele di le 50 tsa selefera. ₁₇Fa a itshepisa tshimo ya gagwe go tloga ka ngwaga wa tuduetso, a go nne jalo ka fa o e kaileng ka teng. ₁₈Mme fa a itshepisa tshimo ya gagwe morago ga ngwaga wa tuduetso, a moperesiti a mmeele tlhwatlhwa ka fa dinyageng tse di setseng go ya ngwageng wa tuduetso, mme e o e kaileng e fokodiwe jalo. ₁₉Fela fa yo o itshepisitseng tshimo a rata go e reka gape, a a oketse tlhwatlhwa e o e kaileng ka karolo ya botlhano ya yona; foo e tla mmoela. ₂₀Fa a sa ithekele tshimo gape, mme a e rekisa mo monneng yo mongwe, ga e kitla e tlhola e gololwa. ₂₁E re tshimo eo e gologa ka ngwaga wa tuduetso, e itshepele Morena jaaka tshimo e e hutsitsweng. E tla nna ya moperesiti e le boswa jwa gagwe.

₂₂“ ‘Mme fa a itshepisetsa Morena tshimo e a e rekileng e e seng ya masimo a boswa jwa gagwe, ₂₃gona a moperesiti a mmeele tlhwatlhwa e e lekanyeng go ya ngwageng wa tuduetso; a a ntshe ka lone letsatsi leo tlhwatlhwa e o e kaileng, e nne neo e e boitshepo ya Morena. ₂₄Ka ngwaga wa tuduetso tshimo eo e tla boela kwa go ene yo moikani a e rekileng mo go ene yo e neng e le naga ya boswa jwa gagwe.

₂₅“ ‘Tsotlhe tse o di kayang o di kaye ka šekele ya Felo-ga-Boitshepo. Šekele ke digera di le 20. ₂₆Fela maitibolo a diruiwa, ka e le a Morena ka go tsalwa pele, a go se nne ope yo o a itshepisang, a e leng a kgomo gongwe a sefutshane; kana ona e ntse e le a Morena. ₂₇Mme fa e le seruiwa se se sa itshekang, a a se golole ka fa o se kayang ka teng, a be a oketse karolo ya botlhano ya teng; fa se sa gololwe, a se rekisiwe ka fa o se kayang ka teng.

₂₈“ ‘Fela tsotlhe tse di hutsitsweng tse motho a di hutseditseng Morena, di tswa mo go tse e leng tsa gagwe, le fa e le motho gongwe seruiwa gongwe tshimo nngwe ya boswa jwa gagwe, tsone ga di kitla di rekisiwa le e seng go gololwa. Tsotlhe tse di hutsitsweng ke tse di boitshepotshepo tsa Morena. ₂₉Le fa e le motho ofe yo o hutsitsweng ga a kitla a gololwa. O tshwanetse go bolawa.

₃₀“ ‘Dikarolo tsotlhe tsa lesome tsa lefatshe tsa dijwalo tsa masimo le tsa maungo a ditlhare ke tsa Morena; di itshepetse Morena. ₃₁Mme fa motho a rata go golola karolo ya lesome ya gagwe, a a ntshe tlhwatlhwa ya yona, a ba a e oketse ka karolo ya botlhano. ₃₂Fa e le karolo yotlhe ya lesome ya dikgomo le ya difutshane, tsotlhe tse di huhumelang ka fa tlase ga thobane ya modisa, ya lesome nngwe le nngwe e tla itshepela Morena. ₃₃A go se ka ga sekasekwa fa e siame gongwe e sa siama; le gona e se ka ya ananngwa. Mme fa motho a re o e ananya, foo yona le e a reng o ananya ka yona, di tla nna boitshepo tsoo pedi; ga se tse di ka gololwang.’ ”

₃₄Ke tsona ditaelo tse Morena o di laetseng Moše kwa thabeng ya Sinai gore a di laele Baiseraele.