NUMERI 6

₁Morena a ba a raya Moše a re: ₂“Bua le Baiseraele o ba ree o re: ‘Fa monna gongwe mosadi a ikana maikano a moikiledi ka boene a go ikilela Morena, ₃gona a a itime weine le dino tse di tlhapelang, a se ka a nwa aseine ya weine le aseine ya motatswa, le e seng go nwa matute a moweine; le gona a se ka a ja maungo a mašwa a moweine le e seng maswabi a ona. ₄Ka malatsi otlhe a ikilelo ya gagwe a se ka a ja sepe se se dirwang ka maungo a moweine le e seng dithapo, le fa e le matlape a ona.

₅“ ‘Ka malatsi otlhe a maikano a ikilelo ya gagwe go se ka ga tla logare mo tlhogong ya gagwe. A a nne boitshepo go tsamaya malatsi a fele a o ikileletseng Morena ka ona. A a lese moriri wa gagwe o gole fela. ₆Ka malatsi otlhe a go ineela Morena ka boikilelo a se ka a atamela setoto sa moswi. ₇Le fa go sule rraagwe gongwe mmaagwe gongwe morwa-rraagwe gongwe kgaitsadie, a se ka a iitshekolola ka bone; gonne itshepelo ya Modimo wa gagwe e mo tlhogong ya gagwe. ₈O itshepetse Morena ka malatsi otlhe a boikilelo jwa gagwe.

₉“ ‘Mme fa motho a swela fa go ene ka tshoganyetso, mme a itshekolola tlhogo ya itshepelo ya gagwe, foo a a ipeole tlhogo ka letsatsi le a itshekang gape ka lone, e bong ka letsatsi la bosupa. ₁₀Mme ka letsatsi la robedi a ise maphoi a le mabedi gongwe maebana a le mabedi kwa go moperesiti kwa mojakong wa Tente ya Boipontsho. ₁₁Lengwe a moperesiti a le dire setlhabelo sa boleo, le lengwe a le dire setlhabelo sa phiso, a mo direle thuanyo, ka a tsenywe ke sefifi ka ntlha ya moswi. A be a itshepise tlhogo ya gagwe gape ka letsatsi leo, ₁₂a ineele Morena sešwa ka boikilelo malatsing a itshepelo ya gagwe, a be a tlise kwana e tonanyana ya ngwaga o le mongwe go nna setlhabelo sa molato. Mme malatsi a pele a se ka a balwa, gonne o itshekologile mo itshepelong ya gagwe.

₁₃“ ‘Molao wa moikiledi wa Modimo ke o: Ka letsatsi le malatsi a itshepelo ya gagwe a felang ka lone a a tle kwa mojakong wa Tente ya Boipontsho. ₁₄A isetse Morena neo ya tlhabelo ya gagwe, e bong kwana e le nngwe e tonanyana ya ngwaga o le mongwe e e se nang bogole ya setlhabelo sa phiso le kwana e le nngwe e namagadi ya ngwaga o le mongwe e e se nang bogole ya setlhabelo sa boleo le phelehu e le nngwe e e se nang bogole ya setlhabelo sa tebogo ₁₅le seroto sa dinkgwe tse di sa bedisiwang tsa bupe jo bo boleta, e bong dikuku tse di budilweng ka lookwane le dinkgwana tse dipapetla tse di sa bedisiwang tse di tshasitsweng lookwane le ditshupelo tsa dijo le tsa dino tsa teng.

₁₆“ ‘Jaanong a moperesiti a di tlise fa pele ga Morena, a mo direle setlhabelo sa boleo le setlhabelo sa phiso. ₁₇Mme phelehu a e direle Morena setlhabelo sa tebogo mmogo le seroto sa dinkgwe tse di sa bedisiwang. Le gona moperesiti a mo direle tshupelo ya dijo le tshupelo ya dino. ₁₈Jaanong a moikiledi a ipeole tlhogo ya itshepelo ya gagwe kwa mojakong wa Tente ya Boipontsho, a be a tsee moriri wa tlhogo ya itshepelo ya gagwe, a o latlhele mo molelong o o fa tlase ga setlhabelo sa tebogo.

₁₉“ ‘Gape a moperesiti a tsee letsogo le le apeilweng la phelehu le kuku e le nngwe e e sa bedisiwang mo serotong le senkgwana se sepapetla se se sa bedisiwang se le sengwe, a di bee mo diatleng tsa moikiledi, a sena go ipeola tlhogo ya itshepelo ya gagwe, ₂₀mme moperesiti a di kgadikanye go nna tshupelo ya kgadikanyo fa pele ga Morena; ke tse di boitshepo tsa moperesiti mmogo le sehuba sa kgadikanyo le serope sa seabe. Morago ga moo moikiledi o ka nwa weine.

₂₁“ ‘Ke ona molao wa moikiledi yo o ikanetseng Morena neo ya tlhabelo ya gagwe ka ntlha ya itshepelo ya gagwe kwa ntle ga tse dingwe tse a ka kgonang go di tlisa. A a dire ka fa maikanong a gagwe a o a ikanneng ka fa molaong wa itshepelo ya gagwe.’ ”

₂₂Morena a ba a raya Moše a re: ₂₃“Raya Arone le bomorwawe o re: ‘Tshegofatsang Baiseraele jaana ka go ba raya lo re:

₂₇“A ba bee leina la me jalo mo Baiseraeleng, mme nna ke tla ba tshegofatsa.”