DIANE 2

₁Morwaaka, fa o ka amogela mafoko a me, wa boloka ditaolo tsa me mo go wena, ₂fa o sekegela botlhale tsebe, o lebisa pelo ya gago kwa tlhaloganyong; ₃ee, fa o bitsa temogo, o tlhatlosetsa tlhaloganyo lentswe la gago, ₄fa o bo batla jaaka selefera, o bo fukutsa jaaka khumo e e fitlhegileng, ₅foo o tla tlhaloganya go boifa Morena, o tla bona kitso ya go itse Modimo. ₆Gonne Morena o aba botlhale; kitso le tlhaloganyo di tswa mo molomong wa gagwe. ₇O bolokela basiami thuso; ke ene thebe ya ba ba sepelang ka boitekanelo ₈le yo o bolokang ditselana tsa tshiamo le yo o tsamayang mo tseleng ya ba ba mmoifang.

₉Foo o tla tlhaloganya tshiamo le molao le tsa nnete le tselana nngwe le nngwe e e molemo. ₁₀Gonne botlhale bo tla tsena mo pelong ya gago; kitso e tla nna monate mo go wena. ₁₁Kakanyo e tla go disa, tlhaloganyo e tla go boloka; ₁₂e le go go falodisa mo tseleng ya ba ba bosula le mo bathong ba ba buang tse di sokameng, ₁₃ba ba tlogelang ditselana tse di tlhamaletseng gore ba tsamae mo ditseleng tsa lefifi; ₁₄ba ba itumelang go dira bosula ba dudueletsa bokgopo jwa yo o sa siamang, ₁₅ba ditselana tsa bone di kgopameng, ba metlhala ya bone e leng ya boikepo.

₁₆E tla go falodisa mo mosading o sele yo e seng wa gago wa mafoko a a borethe; ₁₇yo o tlhalang molekane wa bošwa jwa gagwe, a lebale kgolagano e o e ikanetseng fa pele ga Modimo wa gagwe. ₁₈Gonne lapa la gagwe le fologela kwa losong; ditselana tsa gagwe di ya kwa baswing. ₁₉Botlhe ba ba yang kwa go ene ga ba boe; ga ba fitlhe mo ditselaneng tsa bophelo. ₂₀Tseo ke gore o sepele mo tseleng ya ba ba molemo, o tlhamalele fela mo ditselaneng tsa basiami. ₂₁Gonne ba nnete ba tla nna mo lefatsheng; baitekanedi ba tla sadisiwa mo go lone. ₂₂Mme baikepi ba tla nyelediwa mo lefatsheng; balotsana ba tla kumolwa mo go lone.