DIPESALEME 137

₁Re ne re dutse fa dinokeng

tsa Babele,

ra ba ra lela, fa re gopola Sione.

₂Re ne re pega diharepa tsa rona

mo megokareng ya teng.

₃Gonne ke teng kwa batshwari

ba rona ba neng ba batla mafoko

a sefela mo go rona gona;

ba ba re thopileng ba senka

boitumelo mo go rona ba re:

“Re opeleleng sefela sengwe

sa Sione.”

₄Kana re ne re ka opela

sefela sa Morena jang,

re le mo nageng e sele!

₅Fa nka go lebala, wena Jerusalema,

a seatla sa me se se jang se lebale

tiro ya sona.

₆A loleme lwa me lo kgomarele

magalapa a me, fa ke sa go gopole,

fa ke sa itumelele Jerusalema

bogolo go dilo tsotlhe!

₇Morena, gopola Baetomo,

ba ka letsatsi la Jerusalema

ba rileng:

“Mo rutleng, mo phomeng

go fitlha mo motheong!”

₈Morwadi Babele, wena mogateledi,

go sego yo o tla go busetsang

ditiro tsa gago tse o di re diretseng!

₉Go sego ena yo o tla phamolang

masea a gago,

a a thubaganya mo lefikeng!