1 DITIRAFALO 10

₁Bafelesita ba kile ba tlhabana le Baiseraele, mme banna ba Iseraele ba tshaba ba lelekwa ke Bafelesita, ba bolawa ba wela mo dithabeng tsa Gileboa. ₂Mme Bafelesita ba khutšhela Saule le bomorwawe, ba bolaya Jonathane le Abinatabe le Malekhišua bomorwa Saule. ₃Jaanong ya re tlhabano e ketefalela Saule, mme ba ba hulang ka mara ba mmona, a tlalelwa thata ka ntlha ya bahudi. ₄Ke fa Saule a raya morwala-dibolai wa gagwe a re: “Somola tšhaka ya gago, o mphololetse ka yona, e se re gongwe ga tla ba ba sa rupang bale ba ntirela ka tshotlo.” Mme morwala-dibolai wa gagwe a gana, ka a boifa thata. Ke fa Saule a tsaya tšhaka a itigela mo go yona. ₅Ya re morwala-dibolai wa gagwe a bona Saule a sule le ene a itigela mo tšhakeng ya gagwe, a swa. ₆Saule a swa jalo le bomorwawe ba bararo le botlhe ba lapa la gagwe, ba swa mmogo. ₇Ya re banna botlhe ba Iseraele ba kwa lebaleng ba bona Baiseraele ba tshabile le Saule le bomorwawe ba sule, ba tlogela metse ya bone, ba tshaba; ga tla Bafelesita ba nna mo go yona.

₈Ya re kamoso Bafelesita ba tla go thukhutha ba ba bolailweng dilo, ba fitlhela Saule le bomorwawe ba namaletse mo dithabeng tsa Gileboa; ₉ba mo thukhutha, ba tsaya tlhogo ya gagwe le dibolai tsa gagwe, ba di romela kwa lefatsheng la Bafelesita ntlheng tsotlhe, e le go bolelela medimo ya bone le morafe mafoko a phenyo. ₁₀Ba baya dibolai tsa gagwe mo ntlong ya ga Dagone modimo wa bone, logata lwa gagwe le lone ba lo kokotela mo go yona. ₁₁E rile baagi botlhe ba Jabese kwa Gileate ba utlwela tsotlhe tse Bafelesita ba di diretseng Saule, ₁₂ga nanoga banna botlhe ba ba pelokgale, ba tsaya serepa sa ga Saule le tsa bomorwawe, ba di isa kwa Jabese, ba fitlha marapo a bone fa tlase ga mooka kwa Jabese, ba itima dijo malatsi a supa.

₁₃Saule a swela jalo mo boikanyologong jwa gagwe jo o neng a leofetse Morena ka jona ka ntlha ya lefoko la Morena le a se kang a le tshegetsa; le gona ka ntlha ya go botsa mowa wa moswi go batla kgakololo. ₁₄Mme a se ka a batla kgakololo mo Moreneng. Ka moo Morena a mo gogela losong, mme a sokololela bogosi kwa go Dafita morwa Isai.