1 DITIRAFALO 24

₁Le boora Arone ba ne ba na le ditlhopha tsa bone. Bomorwa Arone e ne e le Natabe le Abihu le Eleasare le Ithamare. ₂Mme Natabe le Abihu ba swa pele ga rraabo ba se na bana; baperesiti ya nna Eleasare le Ithamare fela. ₃Dafita a ba dira ditlhopha, a na le Satoke wa losika lwa ga Eleasare le Ahimelege wa losika lwa ga Ithamare, a ba tsenya mo ditirong tsa bone ka fa ditlhopheng tsa bone. ₄Mme ga fitlhelwa ba losika lwa ga Eleasare ba le bantsi go feta ba losika lwa ga Ithamare, fa go balwa ditlhogo tsa banna. Ka moo ba ba kgaoganya jaana: Ditlhogo tsa dikgoro tsa losika lwa ga Eleasare ya nna di le 16, mme tsa dikgoro tsa losika lwa ga Ithamare ya nna di le robedi. ₅Ba kgaoganya bao le bao ka ditengwa; gonne go ne go le bagolo ba ba boitshepo, e bong bagolo ba Modimo mo losikeng lwa ga Eleasare le mo losikeng lwa ga Ithamare. ₆Mme mokwaledi Semaya morwa Nethanele mongwe wa Balefi a ba kwala fa pele ga kgosi le dikgosana le Satoke moperesiti le Ahimelege morwa Abjathare le ditlhogo tsa dikgoro tsa baperesiti le Balefi; ga ntshiwa dikgoro tse pedi ka tengwa tsa losika lwa ga Eleasare, ga ba ga ntshiwa e le nngwe ya losika lwa ga Ithamare.

₇Tengwa ya ntlha ya wela Joyaribe, ya bobedi ya wela Jetaya; ₈ya boraro ya wela Harime, ya bone ya wela Seorime; ₉ya botlhano ya wela Malekhia, ya borataro ya wela Miyamine; ₁₀ya bosupa ya wela Hakose, ya robedi ya wela Abia; ₁₁ya robongwe ya wela Jesua, ya some ya wela Seganya; ₁₂ya 11 ya wela Eliasibe, ya 12 ya wela Jakime; ₁₃ya 13 ya wela Hupha, ya 14 ya wela Jesebeabe; ₁₄ya 15 ya wela Bileka, ya 16 ya wela Imere; ₁₅ya 17 ya wela Hesire, ya 18 ya wela Haphisese; ₁₆ya 19 ya wela Phethaya, ya 20 ya wela Hesekiele; ₁₇ya 21 ya wela Jagine, ya 22 ya wela Gamule; ₁₈ya 23 ya wela Delaya, ya 24 ya wela Maasia.

₁₉Ke yona thulaganyo ya bone tirelong ya bone ya go tsena Ntlong ya Morena ka fa tshwanelong e ba e beetsweng ke Arone rraabo jaaka ene a laetswe ke Morena, Modimo wa Iseraele.

₂₀Fa e le boora Lefi ba bangwe go ne go le teng Subaele, oora Amerame le Jedia mongwe wa bomorwa Subaele; ₂₁le Isia yo mogolo oora Rehabja; ₂₂le Selomothe oora Isehare le Jahathe mongwe wa bomorwa Selomothe. ₂₃Bomorwa Heberone e ne e le Jeria wa ntlha, le Amaria wa bobedi, le Jahasiele wa boraro, le Jekameame wa bone. ₂₄Morwa Usiele e ne e le Miga, mongwe wa bomorwa Miga e le Samire. ₂₅Morwa-rraagwe Miga e ne e le Isia; mongwe wa bomorwa Isia e le Sagaria. ₂₆Bomorwa Merari e ne e le Magedi le Muši; ngwana wa ngwana wa gagwe e le Jaasia. ₂₇Boora Merari bomorwa Jaasia e ne e le Sohame le Sakhure le Iberi. ₂₈Magedi o ne a na le Eleasare yo o neng a se na bana le Khiše. ₂₉Fa e le Khiše morwawe e ne e le Jeramele. ₃₀Bomorwa Muši e ne e le Magedi le Etere le Jerimothe. Ke bone bomorwa Balefi ka fa dikgorong tsa bone.

₃₁Le bone ba tlhamelwa ditengwa fela jaaka ba ga bone boora Arone fa pele ga kgosi Dafita le Satoke le Ahimelege le ditlhogo tsa dikgoro tsa baperesiti le Balefi; tlhogo ya kgoro ya direlwa fela jaaka monnawe yo mmotlana.