1 DIKGOSI 20

₁Mme Benehatate kgosi ya Siria ya kgobokanya mephato yotlhe ya yona, e na le dikgosi di le 32 mmogo le dipitse le dikoloi tsa ntwa, ya bolola, ya dikanyetsa motse wa Samaria ka ntwa, ya o tlhasela; ₂ya ba ya roma barongwi kwa go Ahabe kgosi ya Iseraele kwa teng ga motse ₃go ya go mo raya ba re: “Benehatate o bua jaana a re: ‘Selefera ya gago le gouta ya gago ke tsa me; le basadi ba gago ba bantle le bana ba gago ba bantle ke ba me.’ ”

₄Mme kgosi ya Iseraele ya araba ya re: “A go nne ka fa o buileng ka teng, kgosi morena wa me, ke wa gago le tsotlhe tse ke nang natso.”

₅Mme barongwi ba be ba tla gape ba re: “Benehatate o bua jaana a re: ‘Kana nkile ka roma koo go wena ka re: Mphe selefera ya gago le gouta ya gago le basadi ba gago le bana ba gago. ₆Mme e tla re fa ke roma batlhanka ba me koo go wena kamoso ka nako e, foo ba tla fukutsa ntlo ya gago le matlo a batlhanka ba gago, mme tsotlhe tse di rategang mo matlhong a gago ba tla baya diatla tsa bone mo go tsone, ba di tsaya.’ ”

₇Ke fa kgosi ya Iseraele e bitsa bagolo botlhe ba lefatshe e re: “A ko lo lemoge, lo bone gore yoo o batla bosula. Gonne o ne a romile kwano go nna, a batla basadi ba me le bana ba me le selefera ya me le gouta ya me, mme ga ke a ka ka gana ka tsona.”

₈Mme bagolo botlhe le morafe otlhe ba e araba ba re: “Se tlhole go mo utlwa le e seng go dumela.”

₉Ka moo a raya barongwi ba ga Benehatate a re: “Rayang kgosi mong wa me lo re: ‘Tsotlhe tse o neng o romile go di batla mo motlhankeng wa gago pele, ke ne ka utlwisisa go di dira. Mme se o se bolelang jaanong ke palelwa ke go se dira.’ ” Ke fa barongwi ba tsamaya ba mmusetsa karabo. ₁₀Mme Benehatate a roma gape kwa go ene a re: “A medimo e ntirele jaana, e be e nkokeletse jaana, fa lerole la Samaria le ka lekana go tlala diatla tsa banna botlhe ba ba ntshetseng morago.”

₁₁Mme kgosi ya Iseraele ya araba ya re: “Mo reeng lo re: ‘Yo o ikgatlhang ka tsa tlhabano, a se ka a ipoka jaaka yo o di ikgatlhololang.’ ”

₁₂Ya re Benehatate a utlwa lefoko le – a ntse a nwa bojalwa ene le dikgosi tsele mo maobong – a raya batlhanka ba gagwe a re: “Tlhaselang!” Mme ba tlhasela motse.

₁₃Ke fa moporofeti mongwe a atamela Ahabe kgosi ya Iseraele a re: “Morena o bua jaana a re: ‘A o bona masomo a magolo otlhe a? Bona, ke tla a neela mo diatleng tsa gago kajeno gore o tle o itse, fa e le nna Morena.’ ”

₁₄Ahabe a re: “Ka mang?” Yole a re: “Morena o bua jaana a re: ‘Ka makau a dikgosana tsa dikarolo tsa naga.’ ” Ahabe a boela a re: “Ke mang yo o tshwanetseng go simolola ntwa?” Yole a re: “Ke wena.”

₁₅Ke fa Ahabe a bala makau a dikgosana tsa dikarolo tsa naga, mme a ne a le 232; morago ga one a bala batlhabani ba Baiseraele botlhe, ba nna dikete di supa.

₁₆Mme ba bolola motshegare Benehatate a ntse a nwa, a tagwa mo maobong le dikgosi tsele; e ne e le dikgosi di le 32 tse di mo thusang. ₁₇Makau a dikgosana tsa dikarolo tsa naga a bolola pele. Benehatate o ne a romile batlhodi, mme ba mo itsise ba re: “Banna ba setse ba bolotse kwa Samaria.” ₁₈Mme ene a re: “Ba tshwareng fela, lo se ba bolae, le fa ba bololetse kagiso gongwe tlhabano.”

₁₉Jaanong e rile Baiseraele ba sena go bolola mo motseng, e bong makau a dikgosana tsa dikarolo tsa naga le mephato e e a latelang, ₂₀mongwe le mongwe a bolaya yo a mo tshwarang, Basiria ba tshaba, mme Baiseraele ba ba khutšhela. Benehatate, kgosi ya Siria yona ya falola e palame pitse e na le bapalami ba bangwe. ₂₁Kgosi ya Iseraele e ne ya bolola jalo, ya thopa dipitse le dikoloi tsa ntwa, ya gaila Basiria ka polao e kgolo.

₂₂Ke fa moporofeti yole a atamela kgosi ya Iseraele a e raya a re: “Yaa o ithatafatse, o ele tlhoko o bone se o ka se dirang; gonne e tla re isago ka nako e kgosi ya Siria e go bololele gape.”

₂₃Mme batlhanka ba kgosi ya Siria ba e raya ba re: “Medimo ya bone ke medimo ya dithaba, ke ka moo ba re paletseng; mme fa re ka tlhabana nabo mo lebaleng, ruri, re ka ba fenya! ₂₄Ka moo dira jaana: Tlosa dikgosi tsele mo mannong a tsone, o bee balaodi mo boemong jwa tsona. ₂₅O be o kue mephato e e lekanang le e e go latlhegetseng le dipitse tse di kana ka tsa pele le dikoloi tsa ntwa tse di kana ka tsa pele, mme a re tlhabaneng nabo mo lebaleng. Ruri, re tla ba fenya!” Kgosi ya utlwa se ba se bolelang, ya dira jalo. ₂₆Mme ya re ngwaga o sena go feta, Benehatate a bala Basiria, a bolola a tla kwa Afeke go tlhabana le Baiseraele. ₂₇Ya re Baiseraele ba sena go balwa le go fiwa mefago, ba ya go ba kgatlhantsha. Baiseraele ba thibelela fa pele ga bone, ba tshwana le matsomanenyana a mabedi a dipodi, mme Basiria ba saila mo nageng.

₂₈Ke fa monna wa Modimo yole a atamela kgosi ya Iseraele gape a re: “Morena o bua jaana a re: ‘E re ka Basiria ba rile, Morena ke Modimo wa dithaba fela, e seng Modimo wa melapo, ke ka moo ke tla neelang bontsi jotlhe jo bogolo jole mo diatleng tsa gago gore lo tle lo itse tota, fa e le nna Morena.’ ”

₂₉Mme ba thibelela ba lebaganye nabo malatsi a supa. Mme ka letsatsi la bosupa tlhabano ya simologa. Ke fa Baiseraele ba bolaya Basiria ba le 100 000 e le ba dinao ka letsatsi le le lengwe. ₃₀Ba ba setseng ba tshabela kwa Afeke kwa motseng, mme lobota lwa wela banna ba le 27 000 ba ba setseng. Le Benehatate a tshaba, a tsena mo motseng, a tsena ntlo le ntlwana. ₃₁Mme batlhanka ba gagwe ba mo raya ba re: “A ko o bone, re utlwile go twe, dikgosi tsa Baiseraele ke dikgosi tse di bopelotlhomogi. Nte re apare dikgetse mo mathekeng, re rwale dikgole mo ditlhogong, re tswele kwa kgosing ya Iseraele. E ka re gongwe ya rekegela bophelo jwa gago.” ₃₂Ke fa ba itlama matheka ka dikgetse tsa bohutsana, ba ithara ditlhogo ka dikgole, ba tla kwa kgosing ya Iseraele ba re: “Benehatate motlhanka wa gago a re: ‘Nte ke phele!’ ” Mme Ahabe a re: “A o sa ntse a phela? Fa go le jalo, ke morwa-rre!”

₃₃Mme banna bao ba fitlhela mafoko a e le sesupo se se molemo, ba a amogela ka pele mo go ene ba re: “Benehatate ke morwa-rraago!” Ene a re: “Yaang go mo tsisa.” Ke fa Benehatate a tswela kwa go ene, mme Ahabe a mo palamisa mo koloing, a bapa nae. ₃₄Ke fa Benehatate a mo raya a re: “Metse e rre o neng a e amoga rraago ke tla e busa. Le gona o ka itirela mafelo a go bapatsa kwa Damaseko jaaka go dirile rre kwa Samaria.” Ahabe a mo raya a re: “Ke tla go naya tsela ka kutlwano e e ntseng jalo.” Mme a dira kgolagano nae, a mo lesa a tsamaya.

₃₅Ke fa monna mongwe wa barutwana ba boporofeti a raya molekane wa gagwe ka taelo ya Morena a re: “Ntitee tlhe!” Mme monna yoo a gana go mo itaya. ₃₆A ba a mo raya a re: “E re ka o ganne go utlwa lentswe la Morena, bona, fa re kgaogana, o tla bolawa ke tau.” Mme ya re a sena go tloga fa go ene, tau ya kgatlhana nae, ya mmolaya.

₃₇A ba a bona monna yo mongwe gape a re: “A ko o ntitee!” Monna yoo a mo itaya a mo ntsha dintho. ₃₈Jaanong moporofeti yo a ya a emela kgosi mo tseleng, a e ikgakisa ka go iphapa matlho ka lesela. ₃₉Jaanong ya re kgosi e feta, a goela kgosing a re: “Motlhanka wa gago o ne a bolotse a ya tlhabanong. Ka bona monna mongwe a fapoga a tlisa monna go nna a re: ‘Disa monna yo! Fa a ka timela, bophelo jwa gago bo tla emela bophelo jwa gagwe gongwe o tla lefa talente ya selefera.’ ₄₀Mme ya re motlhanka wa gago a ntse a tshwere tiro fa le fale, a timela.” Ke fa kgosi ya Iseraele e mo raya e re: “Katlholo ya gago e ntse jalo. O ikatlhotse ka wesi.”

₄₁Ke fa a akofa a iphapolola lesela mo matlhong, mme kgosi ya Iseraele ya mo itse, fa e le mongwe wa baporofeti. ₄₂Jaanong a e raya a re: “Morena o bua jaana a re: ‘E re ka o lesitse monna yole a tšhomola mo diatleng tsa gago yo ke mo hutsitseng, ka moo o tla swa mo boemong jwa gagwe le morafe wa gago mo boemong jwa morafe wa gagwe.’ ”

₄₃Ke fa kgosi ya Iseraele e ya kwa gae e ngadile e galefile; ya tsena teng kwa Samaria.