1 MAKABISE 11

₁Jaanong Kgosi ya Egepeto e ne ya kokoanya lekoko la batlhabani ba bantsi jaaka motlhaba wa lotshitshi lwa lewatle. A kgobokanya dikepe tse dintsi. A bo a leka go ya go itseela puso ya ga Aleksandere ka bolotsana, a oketsa puso ya gagwe ka yone. ₂Petolemi a ya Siria ka mafoko a kagiso. Mme batho ba metse ba mmulela dikgoro ba mo thologela, gonne kgosi Aleksandere o ne a laetse gore a amogelwe ka mabogo a mabedi, ka ene Petolemi e ne e le mogogwadiagwe. ₃Fela Petolemi ene ya re a tsena mo metseng e, a baya mephato ya batlhabani-balebeledi mo go yone yotlhe. ₄Ya re a goroga kwa Asotuse a bontshiwa tempele ya ga Dagone e e neng e tshubilwe, Asotuse le metsana ya teng e le matlotla fela. Ditopo di gasagasame, le digau tsa ditopo tsa ba Jonathane a neng a ba bolaile ka go ba fisa mo ntweng, di ntse mekoakoa mo a fetang teng. ₅Ba tlhalosetsa kgosi se Jonathane a neng a se dirile, ba ithaya ba re e tla bontsha go sa rateng ga yone. Fela kgosi ya itidimalela fela. ₆Jonathane a bo a ya go amogela kgosi ka matlomo kwa Joppa, kwa ba neng ba dumedisana ba bo ba lala teng mmogo. ₇Jonathane a pata kgosi go fitlhelela kwa noka e e bidiwang Eleutheruse a bo a boela kwa Jerusalema. ₈Kgosi Petolemi ene a nna mo metseng e e bapileng le lewatle go fitlhelela kwa Seleukia mo kgaolong ya lotshitshi lwa lewatle. Nako e yotlhe o ne a ntse a loga maano kgatlhanong le Aleksandere.

₉A romela batho kwa go kgosi Demeteriuse a re, “Tlaa re dire kgolagano mmogo. Ke tla go nyadisa morwadiake, yo jaanong Aleksandere a mo nyetseng. Mme O tlaa busa mo pusong ya ga rrago. ₁₀Ke ikotlhaela gore ke ne ke ntse ke nyadisetsang morwadiake monna yole yo jaanong e le yo a batlang go mpolaya yo.” ₁₁O ne a mmua maswe jaaka a ne a eletsa puso ya gagwe. ₁₂A tsaya morwadie, a mo naya Demeteriuse mme ba kgaogana le Aleksandere. Bobaba jwa bone jwa nna mo pepeneng jaanong. ₁₃Petolemi ya re a tswa foo, a tsena mo Antioko mme a nna kgosi mo Asia. A rwala dirwalo tsa segosi tse pedi, sa Egepeto le sa Asia.

₁₄Ka nako e, Kgosi Aleksandere ene o na a le mo Silisia, gonne batho ba dikgaolo tseo ba ne ba tsositse mokubukubu. ₁₅Fela e rile a utlwa dikgang tse a ya go tlhasela mmaba wa gagwe. Petolemi le ene a tsena mo ntweng. A thulana nae ka namane e tona ya mophato mme a mo alola. ₁₆Aleksandere a tshabela kwa Arabia, mme kgosi Petolemi a ja meletlo ya phenyo. ₁₇Sabediele wa Learabea a kgaola Aleksandere tlhogo mme a e romela kwa go Petolemi. ₁₈Ya re morago ga malatsi a mararo kgosi Petolemi a swa. Mme baagi ba moo ba bolaya batlhabani-balebeledi ba Maegepeto ba ba neng ba le mo dikagong tsa phemelo. ₁₉Ke fa Demeteriuse a nna kgosi ka ngwaga wa 167.

₂₀Ka yone nako eo Jonathane a kokoanya banna ba Juta gore ba ye go tlhasela Motsana wa Phemelo o o neng o le mo Jerusalema. Mme ba dira dibetsa tsa ntwa tse di thubang go ya go o tlhasela. ₂₁Fela baitimokanyi bangwe ba ba neng ba tlhoile setšhaba sa ga bone ba ne ba ngwegela kwa kgosing go ya go e bolelela gore Jonathane o tlhasetse Motsana wa Phemelo ka thekeletso. ₂₂Dikgang tse tsa galefisa kgosi mo go maswe. Mme ya re fela jaaka e sena go bolelelwa ya bolola, ya tla mo Petolemaise. A kwalela Jonathane, a mmolelela gore a tlogele go tlhasela mme a tle go kopana nae kwa Petolemaise ka bonako, ba buisane.

₂₃Fela Jonathane ene ya re a utlwa se, a laela gore tlhaselo e nne e tswelele pele. A bo a tlhopha bagolwane bangwe ba Iseraele le baprista, a bo a itsenya mo kotsing ka bomo, ₂₄ka gore e rile a ya go bona kgosi kwa Petolemaise, a tsaya selefera le gouta le diaparo tsa gagwe le dimpho tse dingwe tse dintsi. Mme o ne a dira gore a mo rate. ₂₅Le gone, le mororo baitimokanyi bangwe ba setšhaba ba ne ba mo ngongoregela, ₂₆kgosi yone e ne ya mo tsaya sentle fela jaaka ba ba neng ba busa pele ga yone ba ne ba mo tsaya. Ya mo naya maemo godimo fa pele ga ditsala tsotlhe tsa yone. ₂₇Ya mo tlhomamisa mo bopristeng jwa gagwe jo bogolo, le mo ditlotleng tsotlhe tse a neng a setse a ntse a na natso. A bo a mo tsenya mo lesomong la Ditsala tsa Ntlha.

₂₈Jaanong Jonathane a kopa kgosi go golola Juta le dikgaolo tse tharo tsa Samaria mo lekgethong, a e solofetsa go e naya ditalente di le 300. ₂₉Kgosi ya dumela. Mme ya kwalela Jonathane taolo, e bua ka dilo tse tsotlhe ka mafoko a:

₃₀“Nna, Kgosi Demeteriuse ke kwalela Jonathane, morwarre, le setšhaba sa Bajuta ka re: Madume.

₃₁“Re kwaletse Lasethenese, ntsalaarona, re bua ka lona. Mme jaanong re lo romelela mafoko a taolo e, gore lo nne lo itse gore eng ke eng:

₃₂“ ‘Nna kgosi Demeteriuse ke kwalela rre, Lasethenese ka re: madume. ₃₃Batho ba setšhaba sa Bajuta ke ditsala tsa rona mme se ba tshwanetseng go se re direla ba a se dira. Mme ka ntlha ya gore ba molemo mo go rona re ikaeletse go ba bontsha bopelotshweu jwa rona. ₃₄Re tlhomamisa go nna le kgaolo ya Juta ga bone le dikgaolo tse tharo tsa Afairema, Lidda le Ramathaima. Dikgaolo tse mmogo le dikgaolonyana tse di tshwaraganyeng natso di ne tsa tshwaraganngwa le Juta di kgaoganngwa le lefatshe la Samaria. Mo go tla thusa botlhe ba ba neelang tshupelo mo Jerusalema. Re ba golola mo lekgethong la dikabelo tsa kgosi tse kgosi e neng e kile ya bo e di amogela mo go bone ngwaga nngwe le nngwe di tswa mo thobong ya temo ya mmu le mo thobong ya maungo. ₃₅Re ba golola botlhe go simologa gompijeno gape, mo dikgafeleng le mo makgethong a re neng re tshwanetse go a amogela le mo mampung otlhe a letswai le mo makgethong a mmuso a re neng re tshwanetse go a amogela. ₃₆Ga go na epe ya dikgololo tse e e tlaa bong e beelwe kwa thoko, go simologa gompijeno, go ya bosakhutleng.

₃₇“ ‘O tshwanetse gore O tle O laele mongwe a kwale mafoko a lokwalo lo gape. A neelwe Jonathane, mme a bewe mo pontsheng mo thabeng e e boitshepo!’ ”

₃₈E rile Kgosi Demeteriuse a bona gore lefatshe le mo kagisong ka nako e a neng a busa ka yone. le gore ga go na ope yo o mo tsogologelang, a phatlalatsa mephato, a romela banna botlhe gae, fa e se makoko a batswa-kwa a o neng a a thapile mo ditlhakeng tsa ditšhaba, mme ka mokgwa o a itlhoisa makoko a bogologolo a a neng a kile a direla borraagwe-mogolwagolwana. ₃₉Jaanong e rile Terifo, mongwe wa ba ba neng ba kile ba thusa Aleksandere, a bona gore makoko a ngongorega ka Demeteriuse, a bua le Iamleku wa Learabea, yo o neng a godisa Antiokuse morwa Aleksandere. ₄₀A mo kopa gantsintsi gore a mo letle a tseye mosimane yo, gore a tle a buse mo maemong a ga rraagwe. A mmolelela ka ga se Demeteriuse a neng a ikaeletse go se dira le gore se tenne mephato jang. O ne a nna nako e telele teng.

₄₁Ka nako e Jonathane o ne a kopa kgosi Demeteriuse gore a ntshe makoko a a neng a le mo Motsaneng wa Phemelo mo Jerusalema, a bo a tlose batlhabani balebeledi mo metseng ya phemelo, gonne ba ne ba tlhola ba lole le Iseraele. ₄₂Demeteriuse a fetola Jonathane a re, “Mo ga se gone fela mo ke tlaa go go direlang, wena le setšhaba sa gago, ke tlaa bo ke go kgobelele ditlotla, wena le setšhaba sa gago, fa nka bona nako nngwe e e siameng. ₄₃Jaanong jaana, go ne go ka nna botoka fa O ne O ka ntlhatlhelela, gonne mephato ya me yotlhe e mphatlalaletse.”

₄₄Jonathane ke fa a mo romelela batlhabani ba ba itseng ntwa kwa Antioko. Ya re ba goroga kgosi ya itumela thata. ₄₅Baagi ba ka ne ba le 120 000 ba kgobokana fa gare ga motse, ba ikaeletse go bolaya kgosi. ₄₆Kgosi ya tshabela mo tlung ya bogosi fa baagi bone ba ne ba ipaya mo mebileng e megolo ya motse mme ba simolola go tlhasela. ₄₇Kgosi ya kopa Bajuta gore ba e thuse. Mme bone ba mo kgobokanela ba le seoposengwe. Ba bo ba phatlalalela mo motseng, mme tsatsi leo ba tlhola ba bolaile baagi ba one ba le 100 000. ₄₈Ba tshuba motse, ba feta ba itseela dithopo tse dintsi. Ba sireletsa kgosi. ₄₉Ya re baagi ba bona gore motse o mo diatleng tsa Bajuta ba kgobega marapo, mme ba bokololela kgosi, ba e kopa ba re, ₅₀“A O ko O re neye kagiso, mme a Bajuta ba tlogele go re tlhasela, rona le motse wa rona.” ₅₁Ba piriganya dibetsa tsa bone, mme ba nna le kagiso. Kgosi le batho botlhe mo pusong ya yone ba galaletsa Bajuta thata. Ya re ba sena go tuma jaana mo pusong ya yone ba boela kwa Jerusalema ba rwele dithopo. ₅₂Kgosi Demeteriuse a tswelelapele go nna a busa mo pusong ya gagwe, mme ya re a ntse a busa jaana lefatshe la nna mo kagisong. ₅₃Fela a se ka a dira jaaka a ne a solofeditse, mme a itlhoisa Jonathane. A se ka a ntshetsa ditiro tsotlhe tse Jonathane a neng a di mo diretse sepe. A mpa a mo utlwisa botlhoko gongwe le gongwe.

₅₄Morago ga mo Terifo o ne a tla le mosimane Antiokuse, mme ene a nna kgosi a ba a rwesiwa serwalo. ₅₅Mephato yotlhe ya ntwa e Demeteriuse o neng a e phatlaladitse fela kwa ntle ga go e akanyetsa, e ne ya kokoanela Antiokuse, mme ya tlhasela Demeteriuse. A ba supa ka direthe, a inaya naga. ₅₆Terifo a gapa ditlou mme a tsaya motse wa Antiokuse. ₅₇Ke fa lekwana le, Antiokuse, le kwalela Jonathane lokwalo lo, le re: “Ke go tlhomamisa mo bopristeng jo bogolo jwa gago. Ke go tlhoma gore O laole dikgaolo tse nne. Ke go dira mongwe wa Ditsala tsa Kgosi.” ₅₈A mo romelela dijana tsa gouta, a bo a mo letlelela go nwela mo dinwelong tsa gouta, le go apara bohibidu jo bo mokgona le go rwala le go kopela ka kgokelo ya gouta. ₅₉A dira morwarraagwe Simone motsamaisi wa batlhabani wa kgaolo ya go tswa kwa kgaolong ya “Lere ya Tire” go fitlha kwa melelwaneng ya Egepeto.

₆₀Ke fa Jonathane a tsamaya a ralala Transeuferatese le metse ya teng. Mme lekoko lotlhe la ntwa la Siria la gorometsegela kwa go ene go ya go mo thusa. A fitlha kwa Asekalone mme baagi ba teng ba mo amogela ka matlomo a magolo. ₆₁Yare a tswa foo a tlhamalalela kwa Gasa. Fela batho ba Gasa bone ba mo tswalela kwa ntle. Ke fa a o tlhasela, a tshuba metsana ya one, a e thopa. ₆₂Batho ba Gasa ba bo ba rapela Jonathane, a ba a dira kagiso nabo. Fela o ne a tsaya bana ba basimane ba magosana a teng a ba dira magolegwa a peelelo, a ba romela kwa Jerusalema. Ke fa a ralala lefatshe a ya go fitlha kwa Damaseko.

₆₃Jaanong Jonathane a utlwa fa balaodi ba batlhabani ba ga Demeteriuse ba gorogile kwa Kadeshe mo Galalea ka namane e tona ya lekoko la ntwa, e le gore ba ikaeletse go mo tlogedisa tiro ya gagwe. ₆₄A bo a ya go kopana nabo, a tlogela Simone morwarraagwe mo lefatshing le. ₆₅Simone a thekeletsa motse wa Bethesure, a o tlhasela malatsi othle. A kganelela baagi ba teng mo teng, ₆₆go fitlhela ba bo ba kopa kagiso. A e ba naya, le mororo a ne a ba ntsha ka motse, a o tsaya, a bo a baya batlhabani-balebeledi teng.

₆₇Ka nako e, Jonathane le batlhabani ba lekoko la gagwe bone ba ne ba thibeletse go bapa le Letsha la Galelea. Mme ba bo ba sale ba phakela. Ya re e sale mo mosong ba bo ba setse ba le mo leboeng la Hasore. ₆₈Batlhabani ba lekoko la batswakwa ba tla go ba tlhasela mo leboeng moo, ba sena go ba lalela mo dithabeng. Ya re segopa se segolo se tlhamalala go ya go tlhasela Bajuta, ₆₉batlhabani ba mephato e e neng e laletse ba rotoga mo ba neng ba ntse ba iphitlhile teng, ba tlhasela pele. ₇₀Banna botlhe ba ba neng ba na le Jonathane ba inaya naga. Ga se ka ga bo ga sala ope fa e se Mathatia morwa Abesalone le Judase morwa Kalefi, ba e neng e le balaodi ba lekoko la gagwe. ₇₁Ya re Jonathane a bona se a ikgagolela diaparo, a ikgasa lerole mo tlhogong, a rapela. ₇₂A bo a ya go lwa le baba ba gape. A feta a ba gasagasa, ba bo ba sia. ₇₃Ya re ba mephato ya gagwe ba ba neng ba mo tshabetse ba bona se ba menoga ba tla go thusana nae go alola baba go fitlhelela kwa Kadeshe kwa baba ba neng ba thibeletse teng. Le bone ba feta ba ba thibelela teng. ₇₄Tsatsing leo ga swa banna ba ka ne ba le 3 000 ba mephato ya batswakwa. Jonathane a bo a boela kwa Jerusalema.