1 MAKABISE 12

₁E rile Jonathane a bona gore o tswa sentle, a tlhopa banna ba a ba ikantseng a ba roma kwa Roma, go ya go gagamatsa le go ntšhafatsa kgolagano ya botsala le Baroma. ₂A bo a romela dikwalo kwa Maseparteng le kwa mafelong a mangwe, a ntse a bua ka sone selo se. ₃Barongwa ba ba ya kwa Roma mme ba feta ba tsena mo Lekgotleng la Bagolo mme ba bolela molaetsa o: “Jonathane moprista yo mogolo le setšhaba sa Bajuta ba re romile kwa go lona, gore re tle go ntšhafatsa kgolagano ya botsala le tshwaragano nabo jaaka go ne go ntse go ntse pele.” ₄Baroma ba ba neela makwalo a a yang kwa babusing ba mafelo otlhe, ba ba kopela tsela tshweu go ya kwa lefatsheng la Juda.

₅Mafoko a lokwalo lo Jonathane a neng a lo kwalela Maseparta ke a: ₆“Nna, Jonathane, moprista yo mogolo, Lekgotla la Bagolo ba Setšhaba, baprista le botlhe ba setšhaba sa Bajuta, re kwalela lona, Maseparta, bakaulengwe, ra re: Madume. ₇Mo nakong e e fetileng Areiose, mongwe wa magosi a lona, o ne a romelela Oniase moprista yo mogolo lokwalo, a bolela gore lo tota lo le bakaulengwe ba rona, jaaka lo re lo gokeletseng fa, lo supa. ₈Oniase a amogela barongwa ka tlotlo, lokwalo le lone a lo amogela sentle. Mme mo go lone go ne go umakwa botsala le tshwaragano ka mafoko a a utlwalang. ₉Jalo he, le mororo re sa tlhoke dilo tse di ntseng jaaka tse, ka re gomodiwa ke Dikwalo tse di boitshepo tse re nang natso, ₁₀re tsaya matsapa a go lo romelela lokwalo lo go ntšhafatsa botsala jwa bokaulengwe le lona, gore re se ka ra tloga ra nna baeng mo go lona, gonne tota go setse go fetile nako e telele lo re romeletse lokwalo lo. ₁₁Tota re ka nna ra lo bolelela gore gantsi, nako le nako, mo meletlong ya rona le mo malatsing a mangwe a a laotsweng, re a lo gakologelwa, fa re ntsha ditshupelo, re ntse re rapela, jaaka go siame e bile go tshwanela gore re lo gakologelwe lona bakaulengwe ba rona. ₁₂Re itumelela tumo ya lona. ₁₃Fa e le rona, re nnile le diteko tse dintsi, ra lwa dintwa tse dintsi, magosi a a re dikologileng a re tlhasela. ₁₄Re ne re sa rate go lo tshwenya kgotsa go tshwenya batshwaragani ba bangwe ba rona le ditsala tsa rona fa re ntse re lwa dintwa tse. ₁₅Fela jaanong ka re ne ra thusiwa ke One wa legodimo re ne ra gololwa mo diatleng tsa baba ba rona, ba jaanong e le bone ba digetsweng kwa tlasetlase. ₁₆Ke gone ka moo re tlhopileng Numeniuse morwa Antiokuse, le Antipatere morwa Jasone, ra ba roma kwa Baromeng, go ya go ntšhafatsa kgolagano ya botsala le tshwaragano e re kileng ra bo re na nayo nabo. ₁₇Re bile re ba laetse, go ya koo kwa go lona go lo dumedisa le go lo naya lokwalo lo lwa rona lo lo buang ka ntšhafatso ya bokaulengwe. ₁₈Re tlaa lebogela karabo thata.”

₁₉Mafoko a lokwalo lo lo neng lwa romelelwa Oniase ke a: ₂₀“Nna ke le Areiose, kgosi ya Maseparta, ke kwalela Oniase, moprista yo mogolo, ke re, madume. ₂₁Go lemogilwe mo lokwalong longwe lo lo buang ka Maseparta le Bajuta gore batho ba ke bana ba motho, e bile ke ba setšhaba sa ga Abrahama. ₂₂Ka jaanong re itse selo se, re tlaa itumela thata go utlwa gore lo tsoga jang. ₂₃Molaetsa wa rona go lona ke o: Dinku tsa lona le diruiwa tsa lona ke tsa rona, le tsa rona ke tsa lona. Mme re bolelela barongwa ba rona gore ba lo neye molaetsa o o lo bolelelang selo se.”

₂₄Jonathane a utlwa fa balaodi ba batlhabani ba ga Demeteriuse ba bolotse ka batlhabani ba bantsi go feta pele, go tla go mo tlhasela. ₂₅Ke gone ka moo a neng a tswa mo Jerusalema go ya go thulana nabo mo kgaolong ya Hamathe, a ba hupetsa gore ba se ka ba bo ba bona phatlhanyana ya go tla go tlhasela lefatshe la gagwe. ₂₆A romela ditlhola kwa bothibelelong jwa bone, tse e rileng di boa tsa feta tsa mmolelela gore baba ba ne ba dira theko gore ba tle ba lale ba tlhasetse Bajuta bosigo. ₂₇Fa tsatsi le phirima Jonathane a bolelela banna ba gagwe gore ba nne ba tlhometse, ba ipaakanyeditse go lwa nako nngwe le nngwe bosigo. A baya batlhabani-balebeledi gongwe le gongwe mo bothibelelong. ₂₈Ya re baba ba lemoga gore Jonathane le banna ba gagwe ba ipaakanyeditse go lwa ba tshoga, mme ka dipelo tse di ruthang ba tshuba melelo mo bothibelelong jwa bone. ₂₉Ka Jonathane le banna ba gagwe ba ne ba lebeletse go tuka ga melelo mo bothibelelong jwa bone ba ne ba se ka ba lemoga gore baba ba a sia, go fitlhelela mo mosong. ₃₀Jonathane a re o a ba latela. Fela a se ka a bo a ba tsnwara, gonne ba ne ba setse ba kgabagantse noka ya Eleutheruse. ₃₁Ke fa Jonathane a tlhasela Maarabea a a bidiwang Masabadaea. A ba fenya, a ba thopa. ₃₂Ya re a huduga foo a ya kwa Damaseko, a ya a raletse kgaolo yotlhe.

₃₃Fa tse di ntse di diragala Simone le ene o ne a bolotse mme a thothometse a ba a ya go fitlha kwa Asekalone le metse ya phemelo e e gaufi le teng. A ya a lebile motse wa Joppa, mme a itlhaganelela go ya go o gapa. ₃₄gonne o ne a utlwile gore batho ba batla go neela bathusi ba ga Demeteriuse motse o wa phemelo. A baya batlhabani-maleta-motse teng go o lebelela.

₃₅Ya re Jonathane a boa a feta a epa pitso ya bagolwane ba batho, mme a dumalana nabo go aga dikago tsa phemelo mo Juta, ₃₆le go goletsa dipota tsa Jerusalema le go aga thibedi e e kwa godimo fa gare ga Motsana wa phemelo le motse, go kgaoganya Motsana o le motse le go o beela kwa thoko, gore baagi ba teng ba tle ba palelwe ke go reka kgotsa go rekisa. ₃₇Ba kokoanela go aga motse gape. Bontlhanngwe jwa lebotana ntlheng ya kgophu e e kwa botlhabatsatsi jone bo ole. A bo a tlhabolola kgaolo e e bidiwang Kafenatha. ₃₈Ka nako e Simone ene o ne a aga Adida mo Dipoweng, a o thatafatsa, a dira dikgoro tse di nang le mepako.

₃₉Terifo o ne a eletsa thata go nna kgosi ya Asia, go rwala serwalo sa bogosi, le go fenya kgosi Antiokuse. ₄₀O ne a tshaba gore Jonathane ga a na go dumelela go dira jalo, le gore o ka ba a nna a mo tlhasela. Ke gone ka moo a neng a bolola, a tla mo Betheshane, a solofetse gore o tla bona seipatonyana sengwe teng sa go mo tshwara, a mmolaya. ₄₁Jonathane a ya go mo kgaoletsa ka banna ba le 40 000 ba a neng a ba tlhophile e le ditswerere mo ntweng, mme a fitlha kwa Betheshane. ₄₂Ya re Terifo a mmona teng a na le mophato o mogolo, a utlwa a tshaba go tlhasela. ₄₃A bo a mo amogela ka tlotlo e kgolo, a mmolelela ditsala tsotlhe tsa gagwe a mmoka, a bo a otlolola seatla a a mo neela dimpho. A bolelela ditsala tsa gagwe le batlhabani ba makoko a gagwe gore ba mo ikobele fela jaaka ba ne ba ka ikobela ene Terifo. ₄₄A raya Jonathane a re, “Tota O lapiseditseng batho ba, gonne nna le wena ga re lwe? ₄₅Ba busetse gae. Itlhophele banna ba se kaee fela go go lebelela, re bo re ya mmogo kwa motseng wa Petolemaise. Ke tla feta ke o go naya, mmogo le dikago tsa phemelo tse dingwe le makoko a mangwe le magosana otlhe. Ke tlaa bo ke ya gae, gonne e rile ke tla fa ke ne ke ntse ke ikaeletse go tla mono.” ₄₆Jonathane a mo ikanya mme a dira jaaka a ne a buile. A phatlalatsa mephato ya gagwe, ya boela kwa lefatshing la Juta. ₄₇A sala ka banna ba le 3 000. Ba ba 2 000 a ba tlogela kwa Galelea, a patwa ke ba le 1 000. ₄₈Fela e rile jaaka Jonathane a sena go tsena mo Petolemaise batho ba Petolemaise ba tswala dikgoro ba mo phamola, ba bolaya botlhe ba ba neng ba tsenye nae ka tšhaka.

₄₉Terifo a romela mephato le batlhabani-bapalami kwa Galelea le kwa Leboeng le legolo go ya go feleletsa bathusi ba ga Jonathane botlhe. ₅₀Fela bone, ka ba ne ba lemoga gore Jonathane o tserwe, le gore o sule le ba ba neng ba mo patile, ba ne ba kgothatsana, mme ba tsamaya ba kgotlhaganye, ba ipaakanyeditse go lwa. ₅₁Ba ba ba lateletseng ba, ya re ba bona gore ba tla itwela, ba boa. ₅₂Bajuta bone botlhe ba ya go fitlha kwa lefatshing la Juta ba sa kgonwa ke sepe, fela ba lelela Jonathane le bamopati ba gagwe. Ba tshogile fela. Batho botlhe ba Iseraele ba hutsafala thata. ₅₃Baheitane botlhe ba ba neng ba ba dikologile jaanong ba senka mekgwa ya go ba bolaaka. Ba ne ba re “Ga ba na moeteledipele, ga ba na bathusi. Fa re ka ba tlhasela ka nako e, re ka dira gore ba se ka ba bo ba tlhola ba gakologelwa ke ope.”