1 MAKABISE 16

₁Fa Johane a tswa mo Gasere a ya go bolelela Simone rraagwe se Cendebaeuse a neng a tshwere a se dira. ₂Ya re Simone a utlwa se a bitsa bomorwawe ba batona bo-Judase le Johane, a ba raya a re, “Nna le bomorwarre le ba-Ntlo ya ga Rre re lole le baba ba Iseraele re sa ntse re le babotlana go fitlhelela gompijeno. Ditiro tse re neng re di dira di ne di kgonega. Mme re ne ra golola Iseraele gantsi. ₃Fela jaanong ke setse ke tsofetse, mme lona lo setse lo gamogile sentle. Tsayang maemo a me le a bomorwarraalona, lo tsweng lo ye go lwela setšhaba sa ga rona. Mme a One o o kwa legodimong o ko o lo thuse.”

₄Ke fa a itlhophela batlhabani le batlhabani-bapalami ba le 20 000. Mme bone ba ya go tlhabana le Cendebaeuse, ba lala kwa Modeine. ₅Ba tsoga ba phakela, mme ba ya kwa leboeng. Ba fitlhela namane e tona ya lekoko la ntwa le emetse go thulana nabo, e le la batlhabani-batsamai le batlhabani-bapalami. Fela go ne go na le molapo fa gare ga bone. ₆Johane le banna ba gagwe ba dira theko ba lebaganye nabo. Fela ya re a bona gore banna ba ba tshaba go kgabaganya molapo ga kgabaganya ene pele. Ya re banna ba gagwe ba bona a kgabaganya, le bone ba kgabaganya, ba mo setse morago. ₇A bo a kgaoganya mophato wa gagwe ka ditlhopha tse pedi tsa batlhabani-batsamai, a baya motlhabani-mopalami fa gare ga tsone, gonne batlhabani-bapalami ba baba ba ne ba le bantsi thata. ₈Tsa galaotega diphala, mme Cendebaeuse le batlhabani ba lekoko la gagwe ba unyaladiwa. Ba bantsi ba bone ba wa ba bolaesegile mo go maswe, mme ba bangwe ba tshabela mo kagong ya phemelo. ₉Ke ka nako e, Judase morwarraagwe Johane a neng a kobesega. Fela Johane o ne a ba alola go fitlhelela Cendebaeuse a fitlha kwa motseng wa Kederone, o a neng a o thatafaditse. ₁₀Ba sia ba bo ba ya go fitlha kwa dikagong tse di godileng tsa phemelo tse di neng di le le mo nageng ya Sotuse, mme Johane a di ja ka molelo. Baba ba latlhegelwa ke banna ba le 10 000. Johane a boela sentle kwa Juta.

₁₁Jaanong Petolemi morwa Abubuse o ne a dirilwe motsamaisi wa batlhabani kwa leboeng la Jeriko. O ne a na le namane e tona ya selefera le gouta. ₁₂E ne e bile e le mogwe wa moprista yo mogolo. ₁₃O ne a nna le keletso e e feteletseng, o ne a ikaeletse thata fela go itira morena wa lefatshe leo lotlhe, mme a simolola go loga maano a go feleletsa Simone le bomorwawe. ₁₄Simone o ne a ntse a tlhatloba metse gongwe le gongwe mo lefatshing leo, mme a ntse a bona se se ka neng se tlhokafala mo go yone, fa e tlaa re tsatsi lengwe a fitlhe kwa Jeriko a na le bo-Mathatia le Judase bomorwawe, mo ngwageng wa 177, mo kgweding ya bo-11, kgwedi ya Shebate. ₁₅Morwa Abubuse a ba okisetsa mo kagonyaneng ya phemelo e e bidiwang Doke, e o neng a e agile. A feta a ba direla moletlo o mogolo wa dijo. Mme gone moo, a bo a fitlhile banna. ₁₆Ya re Simone le bomorwawe ba tlhapetswe, Petolemi a ema ka dinao a na le banna ba gagwe, ba phamola dibolao tsa bone, ba kgwelogela Simone a le mo tlung-lehalahala ya modiro, ba mmolaya, ene le bana ba gagwe ba babedi le batlhanka ba bangwe ba gagwe. ₁₇Ka mokgwa o a dira namane e tona ya bolalome, a duela bomolemo ka bosula.

₁₈Petolemi a kwala kaga tiragalo e mme a romelela kgosi lokwalo lo, a solofela gore o tla tlhatlhelelwa ka batlhabani ba bangwe a bo a fiwe metse le dikgaolo. ₁₉A romela banna ba bangwe kwa Gasere go ya go bolaya Johane, a bo a kwalela balaodi ba batlhabani a ba laela go tla kwa go ene, gore a tle a ba fe selefera le gouta le dimpho. ₂₀A romela ba bangwe go ya go gapa Jerusalema le thaba ya Tempele. ₂₁Fela mongwe o ne a mo rakile, a setse a boleletse Johane kwa Gasere gore rraagwe le bomorwarraagwe ba sule, a bo a oketsa ka go re, “O bile o rometse batho go tla go go bolaya le wena.” ₂₂Johane a imelwa ke dikgang tse, mme a tshwara banna ba ba neng ba tsile mo go mmolaya, a ba bolaya, gonne o ne a setse a itse maanonyana a bone a go mmolaya.

₂₃Ditiro tse dingwe tsa ga Johane, dintwa tse neng a di tlhabana, ditiro tsa bonatla tse a neng a di dira, dipota tsa metse tse a neng a di aga, le ditiro tse dingwe tsotlhe tse a neng a kgona go di dira, ₂₄di ka nna tsa fitlhelwa mo lokwalong lwa Ditiragalo tsa nako e a neng a le moprista yo mogolo ka yone, go simologa ka nako e a neng a tsaya maemo a ga rraagwe e le moprista yo mogolo.